Mbongo ya Bibende Zole ya Mbalu Fioti

Mutindu mosi ya mbote ya kupesa maboko na mambote ya Kimfumu kele ya kutula makabu ya mbongo sambu na kisalu ya kusamuna ya kesalamaka na ntoto ya mvimba. Inki beto fwete sala kana beto kele na mbongo mingi ve?

Kilumbu mosi Yezu monaka mufwidi mosi ya nsukami ketula makabu ya mbongo ya bibende zole ya mbalu fioti na kesi ya tempelo. Zola na yandi sambu na Yehowa pusaka yandi na kupesa “mbongo yonso ya yandi vandaka na yo sambu na kuzinga,” ata yandi vandaka nsukami. (Marko 12:41-44) Mutindu Yezu tubilaka dyambu yai kemonisa nde makabu ya mufwidi yina vandaka na mbalu mingi na meso ya Nzambi. Kiteso mosi, Bakristu ya mvu-nkama ya ntete kumonaka ve nde mukumba ya kupesa mbongo sambu na kupesa maboko na kisalu ya kusamuna vandaka kaka ya Bakristu yina kele bamvwama. Ntumwa Polo tubaka sambu na Bakristu ya Masedonia nde: “Ata bo vandaka bansukami . . . bo bondilaka beto ngolo sambu beto pesa bo nswa ya kupesa makabu.”—2 Kor. 8:1-4.

Yo yina, kana beto kele na kikalulu ya kupesa makabu, ‘ata bibende zole ya mbalu fioti,’ beto fwete vila ve nde kana bo vukisa makabu yonso ya fyoti-fyoti yo lenda kuma ya mingi kibeni. Makabu ya beto kepesaka na ntima ya mvimba kesepedisaka Tata na beto ya zulu, yina kekabaka; “sambu Nzambi ke zolaka nde bantu kupesa makabu ti kiese.”—2 Kor. 9:7.