ZINGA MUTINDU BAKRISTU FWETE ZINGA
Vanda na Kiese ya Kusamuna Nsangu ya Mbote
Keti bantangu ya nkaka nge ke kukaka ve kusamuna? Bamingi ta tuba nde: “Ee.” Sambu na nki? Ziku, sambu mbala na mbala bantu ke tulaka ve dikebi na nsangu na beto; bantu ya teritware na beto ke mengaka beto to beto ke waka boma na kusolula ti bantu yina beto me zaba ve. Ya kieleka, mambu yai lenda manisa beto kiese. Kansi, beto ke sambilaka Nzambi ya kiese yina ke zolaka nde beto sadila yandi na kiese yonso. (Nk 100:2; 1Tm 1:11) Inki mambu tatu lenda pusa beto na kusamuna na kiese yonso?
Ya ntete, nsangu na beto ke pesaka kivuvu. Ata bubu yai bantu kele diaka ve ti kivuvu, beto lenda fulusa bantima na bo ti “nsangu ya mbote ya kima mosi ya kuluta mbote.” (Yez 52:7) Kansi, nsangu ya mbote ya Kimfumu ya Nzambi lenda fulusa mpi bantima na beto ti kiese. Na ntwala ya kukwenda kusamuna, yindulula balusakumunu yina Kimfumu ya Nzambi ta natila bantu na ntoto.
Ya zole, nsangu ya mbote yina beto ke samunaka ke natilaka bantu mambote na kinsuni mpi na kimpeve. Yo ke longaka bo na kuyambula mambu ya mbi mpi yo ke pesaka bo kivuvu ya kuzinga mvula na mvula. (Yez 48:17, 18; Bar 1:16) Kuvila ve nde kisalu na beto kele ya kusosa mpi ya kugulusa bantu. Ata bantu ya nkaka ke zola ve kuguluka, beto fwete landa kusosa bantu yina ke zola kuguluka.—Mat 10:11-14.
Ya tatu mpi ya kuluta mfunu, kisalu na beto ya kusamuna ke pesaka Yehowa lukumu. Yandi ke bakaka kisalu na beto ya kuta kimbangi na mbalu mingi. (Yez 43:10; Ebr 6:10) Diaka, yandi ke pesaka beto mpeve santu na yandi sambu na kulungisa kisalu yai. Yo yina, beto lomba Yehowa na kupesa beto kiese. Yo kele kikalulu ya mbuma ya mpeve santu. (Bag 5:22) Yehowa ta sadisa beto na kununga mambu yina ke kangaka beto nzila ya kusamuna ti kikesa. (Bis 4:31) Na nima, ata bantu ke sepela to ve na nsangu na beto, beto ta vanda na kiese ya kulungisa mukumba na beto ya kusamuna.—Eze 3:3.
Nge ke kudiwaka nki mutindu na kisalu ya kusamuna? Inki mutindu nge lenda monisa nde nge ke vandaka na kiese?
BENO TALA VIDEO BAKA DIAKA KIESE NA NZILA YA KULONGUKA MPI YA KUYINDULULA, MPI NA NIMA BENO PESA MVUTU NA BANGIUFULA YAI:
Ata beto ke samunaka mingi konso ngonda, sambu na nki beto fwete tula dikebi na kulonguka na beto mosi?
Inki mutindu beto lenda landa mbandu ya Maria?
Inki ntangu nge ke yindululaka Ndinga ya Nzambi?
Inki ke pesaka nge kiese ntangu nge ke samunaka nsangu ya mbote?