Bikalulu ya Mbote mpi Luzitu ya Mudindu Lenda Pusa Nkwelani ya Nkaka na Kundima Kieleka

Mbala mingi bikalulu ya mbote ya bankento yina kele Bambangi ya Yehowa mpi ya me kwelaka ke sadisaka babakala na bo na kundima kieleka. Bantangu ya nkaka, yo ke lombaka kukanga ntima na bampasi bamvula mingi. (1Pi 2:21-23; 3:1, 2) Kana bakala na nge ke monisa nge mpasi, landa kusala mambu ya mbote sambu na kununga mambu ya mbi. (Bar 12:21) Ziku mbandu na nge ya mbote lenda pusa yandi na kusoba mutindu yandi ke tadilaka kieleka.

Meka kutadila mambu mutindu nkwelani na nge ke tadila yo. (Fil 2:3, 4) Kuditula na kisika na yandi mpi sala bikesa sambu na kulungisa mbote mikumba na nge. Widikilaka yandi na dikebi yonso. (Yak 1:19) Vanda ntima nda mpi songa yandi nde nge ke zolaka yandi. Ata bakala na nge ke monisilaka nge ve mawete mpi luzitu mutindu nge ke salaka yo, nge lenda vanda na kiese sambu nge me zaba nde Yehowa ke sepelaka ti kwikama na nge.—1Pi 2:19, 20.

SONGA VIDEO YEHOWA KE PESAKA BETO NGOLO YA KUNATA KIZITU NA BETO, NA NIMA BENO PESA BAMVUTU NA BANGIUFULA YAI:

• Inki mambu Grace Li kutanaka ti yo na luyantiku ya makwela na yandi?

• Inki pusaka yandi na kundima kieleka?

• Inki mutindu mpangi Li kangaka ntima na bampasi yina yandi kutanaka ti yo na nima mbotika?

• Inki mpangi Li vandaka kulomba na kisambu sambu na bakala na yandi?

• Inki balusakumunu mpangi Li bakaka sambu na bikalulu na yandi ya mbote mpi luzitu na yandi ya mudindu?