Hulda Lungisaka Lukanu na Yandi

KANA nge kwendaka kutala kisanga ya fioti (ntoto yina kele na kati-kati ya masa) ya Sangir Besar na Indonésie mwa bamvula me luta, mbala ya nkaka nge zolaka kumona bampangi na beto tatu ya bankento na lweka ya masa. Bo me zabanaka mingi na kisanga yina sambu bo ke sadisaka bantu na kubakisa Biblia. Kansi na dibaku yina, bo vandaka kusala kima ya nkaka.

Ntete, bo vandaka kukota na masa, kusosa matadi ya nene mpi kubasisa yo na nganda. Matadi ya nkaka vandaka nene bonso babalon. Na nima, bo vandaka kuvanda na zulu ya bazune mpi kupasula yo na bamarto. Bo vandaka kupasula matadi yina na bitini ya fioti bonso maki ya nsusu. Na nima, bo vandaka kutula matadi yina na ba bassin ya plastike mpi kunata yo na nzo yina bo vandaka kuzinga. Na nsuka, bo vandaka kutula matadi yina na basaki ya nene yina bo lenda nata na kamio mpi kusadila yo sambu na kutunga banzila.

Mpangi-nkento mosi na kati na bo vandaka Hulda. Mambu yina yandi vandaka kukutana ti yo salaka nde yandi lutisa ntangu mingi na kisalu yina kuluta bampangi yina ya nkaka. Yandi vandaka kusadila mbongo yina yandi vandaka kuzwa sambu na kusumba bima yina dibuta na bo vandaka ti yo mfunu. Kansi ntangu yai, yandi vandaka kusala ti lukanu ya nkaka mpi na ntu. Yandi zolaka kusumba tablete sambu na kusadila JW Library^®. Hulda zabaka nde bavideo mpi bima ya nkaka yina kele na jw.org ta sadisa yandi na kisalu ya kulonga nsangu ya mbote, na kulonguka Biblia mpi na kubakisa yo mbote-mbote.

Hulda vandaka kusala bangunga zole konso suka na kiteso ya ngonda mosi ti ndambu, mpi yandi vandaka kupasula matadi mingi yina lendaka kufulusa kamio mosi ya fioti. Nsuka-nsuka, yandi zwaka mbongo ya kusumba tablete.

Hulda tubaka nde: “Ata mono vandaka kulemba mingi na kisalu yina, kansi mono vilaka bampasi yonso yina mono monaka ntangu mono sadilaka tablete na mono ya mpa sambu na kulonga nsangu ya mbote mpi na kuyidika mbote-mbote balukutakanu ya dibundu.” Yandi tubaka diaka nde tablete yina sadisaka yandi mingi na luyantiku ya maladi ya coronavirus sambu balukutakanu mpi mambu mingi ya kimpeve vandaka kusalama na nzila ya video. Beto kele na kiese sambu mpangi Hulda lungisaka lukanu na yandi.