DIBANZA YA BIBLIA
Bawanzio
Bo ke monisaka bawanzio na mikanda, na bifwanisu, mpi na bafilme. Kansi, bo kele banani, mpi inki kele kisalu na bo?
Bawanzio kele banani?
MAMBU YINA BIBLIA KE TUBAKA
Na ntwala ya Nzambi kusala bima yonso mpi bantu ya ntete, yandi salaka ntete bigangwa ya mayele yina me luta bantu. Bo kele ngolo mingi kuluta bantu, mpi bo ke zingaka kisika mosi ti Nzambi, kisika yina bantu lenda kuma ve mpi bo lenda mona ve. (Yobi 38:4, 7) Biblia ke bingaka bigangwa yina ya me luta bantu nde “bampeve” mpi “bawanzio.”—Nkunga 104:4.a
Bawanzio ke vandaka ikwa? Bo kele mingi kibeni. Ntalu ya bawanzio yina kele na lweka ya kiti ya kimfumu ya Nzambi kele “bamiriade ya bamiriade” to “makumi ya mafunda mbala makumi ya mafunda.” (Kusonga 5:11; noti na nsi ya lutiti) Kana beto baka bangogo yai na ntendula na yo ya ntete-ntete, ntalu ya bawanzio kele bankama ya bamilio!
“Mono monaka . . . bawanzio mingi na nziunga ya kiti ya kimfumu . . . , mpi ntalu na bo vandaka bamiriade ya bamiriade mpi mafunda ya mafunda.”—Kusonga 5:11.
Inki mambu bawanzio salaka na ntangu ya ntama?
MAMBU YINA BIBLIA KE TUBAKA
Mbala mingi, bawanzio vandaka kusala bonso binati-ndinga to binati-nsangu ya Nzambi.b Biblia ke tuba mpi nde bo ke salaka bisalu ya kuyituka ya Nzambi. Nzambi tindaka wanzio mosi sambu na kusakumuna Abrahami mpi kubuyisa yandi na kutambika mwana na yandi Izaki. (Kuyantika 22:11-18) Wanzio mosi monanaka na Moize na kati-kati ya mwa-nti ya vandaka kupela tiya sambu na kupesa yandi nsangu yina sobaka luzingu na yandi. (Kubasika 3:1, 2) Ntangu bo losaka profete Daniele na dibulu ya bantambu, “Nzambi . . . tindaka wanzio na yandi mpi yandi kangaka munoko ya bantambu.”—Daniele 6:22.
“Ebuna wanzio ya Yehowa monanaka na [Moize] na ludimi ya tiya na kati-kati ya mwa-nti ya bansende.”—Kubasika 3:2.
Bawanzio ke sala nki bubu yai?
MAMBU YINA BIBLIA KE TUBAKA
Beto lenda zaba ve mambu yonso yina bawanzio ke sala bubu yai. Kansi, Biblia ke monisa nde bo ke pesa maboko na kusadisa bantu ya ntima-masonga na kuzaba mambu mingi ya Nzambi.—Bisalu 8:26-35; 10:1-22; Kusonga 14:6, 7.
Yakobi lalaka ndosi mosi yina katukaka na Yehowa. Na ndosi yango, yandi monaka bawanzio ke tombuka na zulu mpi ke kulumuka na ntoto na “kimatilu” mosi. (Kuyantika 28:10-12) Ziku na nzila ya ndosi yina, Yakobi bakisaka mutindu beto mpi lenda bakisa, nde Yehowa Nzambi ke tindaka bawanzio na ntoto sambu na kusadisa bantu ya kwikama yina kele ti mfunu ya lusadisu.—Kuyantika 24:40; Kubasika 14:19; Nkunga 34:7.
“Kuvandaka ti kimatilu mosi me telama na ntoto, mpi nsongi na yo kumaka tii na zulu; ebuna bawanzio ya Nzambi vandaka kutombuka mpi kukulumuka na zulu na yo.”—Kuyantika 28:12.
a Biblia ke tuba nde bampeve ya nkaka kolamaka na kiyeka ya Nzambi, mpi yo ke bingaka bawanzio yina ya mbi nde “bademo.”—Luka 10:17-20.
b Ya kieleka, ngogo ya kisina ya Kiebreo mpi ya Kigreki ya bo ke sadilaka na Biblia sambu na “wanzio” ke tendula “kinati-nsangu.”