Mutindu ya Kuzwa Nzila Yango

KETI NGE KE KUDITADILAKA BONSO MUNTU YINA KE VANDAKA NA KIESE? Kana mpidina, nki ke pesaka nge kiese? Dibuta, kisalu to lukwikilu ya dibundu na beno? Ziku nge ke sosaka kima yina lenda pesa nge kiese, mu mbandu kumanisa nzo-nkanda, kuzwa kisalu ya mbote to kusumba kamio ya mpa.

Bantu mingi ke waka kiese ntangu bo ke lungisaka lukanu mosi buna to ntangu bo ke zwaka kima yina bo vandaka kusosa. Ebuna kiese yina ke bakaka bantangu ikwa? Mbala mingi yo ke bakaka ntangu fioti mpi yo lenda lembisa bo.

Bantu ke tubaka nde kiese kele mutindu ya kudiwa mbote ntangu yonso mpi yo ke monanaka ntangu muntu ke sepelaka mpi ke waka kiese ya mingi ya kulanda kuzinga, mpi yandi ke vandaka ti mpusa nde yo vanda ntangu yonso mutindu yina.

Diaka, sambu yo kele kudiwa mbote ntangu yonso, kiese kele ve nsuka ya nzietelo to lukanu na yo kansi yo kele nzietelo. Kutuba nde, “Mono ta vanda na kiese ntangu . . .” kele kuvutula kiese na nima.

Mu mbandu, fwanisa kiese ti mavimpi ya mbote. Inki beto ke salaka sambu na kuvanda ti mavimpi ya mbote? Beto ke bakaka balukanu ya mbote na yina me tala madia, bangalasisi mpi luzingu na beto ya mvimba. Mutindu mosi, sambu na kuvanda na kiese, beto fwete baka balukanu ya mbote na luzingu, disongidila kuzinga na kuwakana ti minsiku ya mbote.

Inki minsiku to bikalulu ke nataka na nzila ya kiese? Ata minsiku to bikalulu ya nkaka kele mfunu mingi kuluta ya nkaka, minsiku ti bikalulu yai ya ke landa kele mfunu:

• KUSEPELA TI BIMA YINA BETO KELE NA YO MPI KIKALULU YA KUKABA

• MAVIMPI YA NITU MPI KUKANGA NTIMA

• ZOLA

• KIKALULU YA KULOLULA

• LUKANU NA LUZINGU

• KIVUVU

Mukanda mosi ya mayele yina bantu ke zitisaka mingi kibeni ke tuba nde: “Kiese na bantu yina me konda kifu na luzingu [to “na nzila”] na bo.” (Nkunga 119:1) Bika beto tadila nzila yango.