Na Nsi ya Kimfumu ya Nzambi “Ngemba Ta Kuma Mingi”

Kubika fioti, Kimfumu ya Nzambi, disongidila luyalu yina Nzambi me tulaka yina beto ke vingilaka banda ntama, ta sala nde bantu kuzinga na ngemba mpi na bumosi. Nkunga 72:7 ke tuba nde: “Ngemba ta kuma mingi.” Kansi nki ntangu Kimfumu ya Nzambi ta yantika kuyala ntoto ya mvimba? Inki mutindu yo ta yantika kuyala? Mpi nki mutindu luyalu na yo lenda natila nge mambote?

INKI NTANGU KIMFUMU YA NZAMBI TA KWISA?

Biblia tubilaka mambu ya kuyituka yina ta monisa nde ntama mingi ve Kimfumu ya Nzambi ke kwisa. Mambu yango ke salaka “kidimbu” yina ke tadila mpi bitumba ya ntoto ya mvimba, nzala, maladi, kunikana ya ntoto mpi kikalulu ya kufwa nsiku yina ke salama mingi.—Matayo 24:3, 7, 12; Luka 21:11; Kusonga 6:2-8.

Mbikudulu ya nkaka ke tuba nde: “Na bilumbu ya nsuka bantangu ya mpasi mpi ya nku ta vanda. Sambu bantu ta vanda bantu ya ke kudizolaka, bantu ya ke zolaka mbongo, . . . bantu ya ke lemfukaka ve na bibuti, bantu ya ke pesaka ve matondo, bantu ya me konda kwikama, bantu ya ke zolaka ve bantu ya nkaka, bantu ya ke zolaka ve kuwakana, bantu ya ke kusilaka bankaka makambu, bantu ya me konda kudiyala, bantu ya nku, bantu ya ke zolaka ve mambu ya mbote, . . . bantu ya me fuluka ti lulendo, bantu ya ke zolaka biese na kisika ya kuzola Nzambi.” (2 Timoteo 3:1-4) Banda ntama bantu ke vandaka ti bikalulu yai, kansi bubu yai yo ke monanaka na bantu mingi.

Bambikudulu yai yantikaka kulungana na mvu 1914. Bantu yina ke longukaka mambu ya ntama, bantu yina ke tadilaka mambu ya bansi mpi bansoniki tubilaka mutindu nsi-ntoto sobaka na nima ya mvula yina. Mu mbandu Peter Munch, muntu ya Danemark yina ke longukaka mambu ya me lutaka, sonikaka nde: “Bitumba yina salamaka na mvu 1914 me nataka nsoba ya nene na luzingu ya bantu. Na ntwala ya mvula yina bantu vandaka kuyindula nde mambu ya nsi-ntoto vandaka kukuma mbote kibeni, . . . kansi na nima, mambu ya mpasi, mambu ya ke pesaka boma, kimbeni mpi kukonda lutaninu kumaka bisika yonso.”

Na nima ya mambu yai yonso, ngemba ta vanda na zulu ya ntoto. Yo ke monisa nde Kimfumu yina ta yala ntoto ya mvimba me finama. Ya kieleka, Yezu tubilaka mpi diambu yai ya kiese na kidimbu yai ya ta monisa nde nsuka me finama: “Bo ta samuna nsangu yai ya mbote ya Kimfumu na ntoto ya mvimba sambu na kuta kimbangi na makanda yonso, ebuna nsuka ta kwisa.”—Matayo 24:14.

Nsangu ya mbote kele ntu-diambu ya mfunu ya malongi ya Bambangi ya Yehowa. Ya kieleka, zina ya zulunalu na bo yina bo ke sadilaka mingi kele Nzozulu ya Nkengi Kesamunaka Kimfumu ya Yehowa. Bubu yai Nzozulu ya Nkengi kele na bandinga kuluta 338 mpi mbala mingi yo ke tubilaka mambu ya mbote yina Kimfumu ya Nzambi ta sala sambu na bantu mpi sambu na ntoto.

INKI MUTINDU KIMFUMU YA NZAMBI TA YANTIKA KUYALA?

Mvutu ke tadila mpi mambu yai iya ya mfunu:

1. Kimfumu yai ta sadila ve bamfumu ya politiki ya nsi-ntoto yai.

2. Bamfumu ya politiki ya nsi-ntoto yai ta zola ve kuyambula kuyala mpi bo ta sala buzoba ya kunwanisa Kimfumu ya Nzambi.—Nkunga 2:2-9.

3. Kimfumu ya Nzambi ta fwa baluyalu ya politiki yina ke zolaka kaka kuyala bantu. (Daniele 2:44; Kusonga 19:17-21) Biblia ke bingaka bitumba yai ya nsuka nde Armagedoni.—Kusonga 16:14, 16.

4. Bo ta tanina bantu yonso yina ke lemfukaka na Kimfumu ya Nzambi na Armagedoni sambu bo zinga na nsi-ntoto ya mpa ya ngemba. Biblia ke tuba nde bantu yina ta vanda “kimvuka mosi ya nene,” yina ziku ntalu na bo ta vanda bamilio ya bantu.—Kusonga 7:9, 10, 13, 14.

INKI MUTINDU LUYALU YA KIMFUMU LENDA NATILA NGE MAMBOTE?

Diambu ya ntete yina beto fwete sala sambu na kukuma bantu ya Kimfumu ya Nzambi kele kulonguka mambu ya Nzambi. Ya kieleka, Yezu sambaka Nzambi nde: “Luzingu ya mvula na mvula ke tendula nde, bo zaba nge, Nzambi mosi kaka ya kieleka, mpi muntu yina nge tindaka, Yezu Kristu.”—Yoane 17:3.

Ntangu bantu ke zabaka Yehowa Nzambi bonso muntu ya kieleka, bo ke bakaka mambote na mitindu mingi. Beto tadila mitindu zole: Ya ntete, bo ke kumisaka ngolo lukwikilu na bo na yandi. Lukwikilu yai ya kieleka ke ndimisaka bo nde Kimfumu ya Nzambi kele luyalu ya kieleka mpi nde ntangu yina yo ta yantika kuyala me finama. (Baebreo 11:1) Ya zole, zola na bo sambu na Nzambi mpi sambu na bantu ya nkaka ke kumaka ngolo. Zola sambu na Nzambi ke pusaka bo na kulemfukila yandi na ntima na bo ya mvimba. Zola sambu na bantu ya nkaka ke pusaka bo na kusadila mambu yai ya Yezu tubaka: “Mutindu beno ke zola nde bantu kusadila beno mambu, beno sala mutindu mosi sambu na bo.”—Luka 6:31.

Bonso Tata mosi ya zola, Ngangi na beto ke zodilaka beto kibeni mambu ya mbote. Yandi ke zolaka nde beto vanda ti luzingu yina Biblia ke bingaka nde “luzingu ya kieleka.” (1 Timoteo 6:19) Kansi bubu yai ‘luzingu kele ve ya kieleka.’ Luzingu ya bantu ya nkaka kele mpasi kibeni mpi bo ke zingaka na mpasi. Sambu na kumonisa nge na ntwala mutindu “luzingu ya kieleka” ta vanda, beto tadila mambu ya nkaka ya kitoko yina Kimfumu ya Nzambi ta sala sambu na bantu na yo.