Kuditula Na Kisika Ya Bantu Ya Nkaka
Kikuma Yina Ke Salaka nde Bantu Kuditula Ve na Kisika ya Bantu ya Nkaka
Kana beto ke yindula kaka mutindu bantu ya nkaka kele ve mpila mosi ti beto, beto lenda kuma kumona kuswaswana yina bonso kifu. Nkutu, beto lenda kuma kuyindula nde beto me luta bo. Kana beto me kuma ti bangindu yai ya mbi sambu na bantu ya nkaka, yo ta kuma mpasi sambu beto kuditula na kisika na bo.
Mambu Yina Biblia Ke Tubaka
“Beno vanda na kiese ti bantu yina kele na kiese; beno dila ti bantu yina ke dila.”—BAROMA 12:15.
Verse yai ke tendula nki? Na bunkufi, verse yai ke tendula nde beto fwete kuditula na kisika ya bantu ya nkaka. Kuditula na kisika ya bantu ya nkaka ke tendula kuwa mutindu bo ke kudiwa.
Sambu na Nki Kuditula na Kisika ya Bantu ya Nkaka Kele Mfunu?
Kana beto ke kuditula na kisika ya bantu ya nkaka, beto ta bakisa nde beto kele mpila mosi ti bo. Diaka, beto ta bakisa nde, bantu ya nkaka ke kudiwaka mpi ke salaka mambu bonso beto. Kuditula na kisika ya bantu ya nkaka ke sadisaka beto na kumona nde bantu yonso kele kiteso mosi yo vanda bo ke zingaka na nki kisika yina. Kana beto ke bakisa nde beto yonso kele mpila mosi, beto ta bakila diaka ve bantu ya nkaka bangindu ya mbi.
Kuditula na kisika ya bantu ya nkaka ta sadisa beto mpi na kuzitisa bo. Anne-Marie ya ke zingaka na Sénégal. Yandi vandaka kubaka ve na valere kimvuka mosi yina bantu mingi vandaka kumona bo mpamba. Kansi kikalulu ya kuditula na kisika ya bantu ya nkaka sadisaka yandi. Yandi ke tuba nde: “Ntangu mono vandaka kumona mutindu bantu yina vandaka kuniokwama, mono yindulaka mutindu mono zolaka kudiwa kana yo vandaka mono. Yo sadisaka mono na kubakisa nde mono me luta bo ve mpi kele ve ata ti kima mosi ya ke sala nde mono luta bo.” Ya kieleka, kana beto ke sala yonso sambu na kubakisa bampasi ya bantu ya nkaka, beto ta kuditula na kisika na bo mpi beto ta tuba ve mambu ya mbi sambu na bo.
Mambu Yina Nge Lenda Sala
Kana nge kele ti bangindu ya mbi sambu na bantu ya nkaka, sosa kubakisa mambu yina ke salaka nde beno vanda mpila mosi. Mu mbandu, yindula mutindu bo ke kudiwaka ntangu:
Kuditula na kisika ya bantu ya nkaka ke sadisaka beto na kumona nde bantu yonso kele kiteso mosi
Bo ke diaka ti bantu ya mabuta na bo
Bo ke manisaka kusala kisalu mosi ya ngolo na kilumbu
Bo ke lutisaka ntangu ti banduku na bo
Bo ke landaka miziki yina bo ke zolaka mingi
Na nima, yindula mutindu nge zolaka kudiwa kana yo vandaka nge. Kudiyula nde:
‘Inki mono zolaka kusala, kana muntu mosi kumona nde mono kele ve mfunu?’
‘Inki mutindu mono zolaka kudiwa, kana muntu mosi bakilaka mono bangindu ya mbi, nkutu na ntwala nde beto zabana ti yandi?’
‘Kana mono vandaka kuzinga ti bantu yina, inki mutindu mono ta zola nde bantu kusadila mono mambu?’