Inki Lenda Sadisa Nge na Kundima?
“Zulu, ntoto ti bima yonso ya kele na kati lenda kudibasikila kaka yo mosi.”—Stephen Hawking ti Leonard Mlodinow, bantu ya mayele (physiciens), 2010.
“Nzambi gangaka zulu ti ntoto.”—Biblia, Kuyantika 1:1.
Keti Nzambi muntu salaka zulu ti ntoto mpi bima yina kele na kati to yo kudibasikilaka? Mambu yina bantu zole ya mayele ya beto me tubila awa na zulu me tuba mpi mambu yina Biblia ke tuba na luyantiku sambu na kupesa mvutu na ngiufula yai wakana ve ata fioti, mpi na kati ya bangindu yai zole, bantu na bantu ke nwaninaka ngindu yina bo ke zolaka. Ata mpidina, bantu mingi ke zabaka ve na nki simu bo fwete vanda, sambu mikanda ya me zabanaka mingi mpi mambu yina bantu ke tubaka na televizio ke salaka nde bantu kuzaba ve na nki simu bo fwete vanda.
Mbala ya nkaka balongi na nge ya nzo-nkanda ke tubaka nde zulu ti ntoto mpi bima yina kele na kati yina ke zingaka me kudibasikilaka mpi nde ata Muntu Mosi ve Me Salaka yo. Kansi, keti balongi na nge me songisaka nge mambu yina ke monisaka nde yo kele ve ata ti Muntu Mosi ya Me Salaka yo? Na ndambu ya nkaka, mbala ya nkaka nge me waka mpi bamfumu ya mabundu ke longa nde yo kele ti Muntu Yina Me Salaka Bima Yonso. Kansi, keti bo me songisaka nge dezia inki ke pusaka bo na kutuba mpidina? To bo me songaka nge kaka nde muntu yina kele ti “lukwikilu” fwete ndima dilongi yina?
Mbala ya nkaka, nge mosi, nge me tadilaka dezia diambu yai mpi nge ke monaka nde ata muntu mosi ve lenda zaba kibeni kana yo kele ti Muntu Yina Me Salaka Bima Yonso to ve. Diaka, nge lenda kudiyula nde: Keti kuzaba mvutu na ngiufula yai kele kibeni mfunu?
Nimero yai ya Telama! ta tubila ntete mambu yina me ndimisaka bantu mingi nde yo kele ti Muntu Yina Me Salaka Bima Yonso. Na nima, yo ta monisa sambu na nki kuzaba mvutu na yina me tala kisika yina luzingu ya kele awa na ntoto katukaka kele mfunu.