Mapasa yai Kuswaswanaka

BANA ya babakala yai zole ya beno kemona na kifwanisu kele mpila mosi ve. Keti beno mezaba bazina na bau? Muzombi kele Ezaü mpi mutwisi kele Jacob.

Ezaü na Jacob vandaka bana ya mapasa yina Isaac mpi Rebeka kubutaka. Isaac vandaka kuzola mingi Ezaü, yina vandaka muzombi ya mayele mpi vandaka kukanga bambisi sambu na kudya na nzo. Kansi Rebeka vandaka kuzola Jacob, yina vandaka mwana ya mawete.

Nkaka na bau Abraham vandaka kaka na luzingu. Jacob vandaka kuwidikila yandi mingi ntangu yandi vandaka kutubila sambu na Jéhovah. Abraham fwaka ntangu yandi kumaka na bamvula 175. Na ntangu yina mapasa kuvandaka na bamvula 15.

Ntangu Ezaü kumaka na bamvula 40, yandi kwelaka bankento zole ya Kana. Isaac na Rebeka kuwaka ntantu mingi, sambu bankento yina vandaka kusambila Jéhovah ve.

Na nima, kilumbu mosi, mambu kubwaka yina kukotisaka kimbeni na kati ya Ezaü na Jacob. Ntangu kumaka sambu Isaac kusakumuna mwana na yandi ya ntete. Bonso Ezaü vandaka mbuta, yandi vandaka kuyindula nde yandi muntu tabaka lusakumunu yina. Yandi vilaka nde kilumbu mosi yandi tekaka kimbuta na yandi na Jacob. Na ndambu yankaka, Nzambi tubaka banda ntama nde lusakumunu tapesama na Jacob. Yau lunganaka kaka mutindu yina. Isaac pesaka lusakumunu na mwana na yandi Jacob.

Ntangu Ezaü kuwaka mambu yina yonso, yandi wilaka Jacob makasi. Makasi vandaka ya kuluta kiteso mpi yandi yantikaka na kuyunsa kufwa Jacob. Bau kuzabisaka mambu yina yonso na Rebeka, mpi yandi yantikaka kudibanza-banza mpi tubaka na Isaac nde: ‘Yau tavanda mbi mingi kana Jacob kukwela dyaka nkento ya nsi ya Kana.’

Sambu na yau, Isaac kubingaka mwana na yandi Jacob mpi kuzabisaka yandi nde: ‘Kukwela nkento ya insi ya Kana ve. Kwenda na nzo ya Betuel, tata ya mama na nge na Haran, mpi kwela nkento na kati ya bana na yandi ya bankento yina butaka mwana na yandi Laban.’

Jacob kulemfukilaka tata na yandi. Yandi sukininaka ve, mpi yandi kwendaka na Haran, kisika vandaka kuzinga kikanda ya mama na yandi.