Mwana Ngombe ya Wolo

INKI mambu keluta awa! Bantu kesala inki? Bau kesambila mwana-ngombe! Inki mesimba bau?

Bonso Moïse kusukininaka na ngumba, bantu tubaka nde: ‘Beto zaba ve nki makambu mebwila yandi. Beto kudisadila nzambi yina tasonga beto nzila.’

Aaron, mpangi ya Moïse tubaka nde: ‘Beno katula bima na beno ya makutu ya wolo mpi beno natila yau mono.’ Ntangu yandi bakaka yau, yandi tulaka wolo yina na tiya mpi yandi salaka kiteki ya mwana-ngombe ya wolo. Ebuna bana ya Israele tubaka nde: ‘Tala Nzambi na beto ya kubasisaka beto na insi Egypte!’ Na nima bau yimbaka mpi kinaka sambu na kukembila mwana-ngombe ya wolo.

Ntangu Jéhovah monaka mambu yina, yandi waka makasi mingi. Yandi tubaka na Moïse nde: ‘Kulumuka ntinu. Bantu mekituka mbi kibeni. Bau mevila bansiku na mono mpi bau kefukimina mwana-ngombe ya wolo.’

Moïse lemfukaka. Ntangu yandi kumaka penepene na camp, yandi monaka mwana-ngombe mpi bantu vandaka kuyimba mpi kukina na lweka na yau! Moïse kufunzaka nganzi mpi yandi losaka matadi zole yina vandaka ti bansiku na ntoto mpi yau pasukaka. Yandi bakaka mwana-ngombe ya wolo mpi yandi tulaka yau na tiya. Na nima yandi kumisaka yau mfututu.

Bantu yina salaka mbi ya nene. Yau yina Moïse kupesaka nswa na bantu yankaka na kubaka bambele mpi na kufwa bantu yina kusambilaka kiteki ya mwana-ngombe ya wolo. Bantu 3000 kufwaka kilumbu yina! Nkenda yai ya Bible kemonisa beto nde beto fwete sambila ve banzambi yankaka, kansi kaka Jéhovah.