Bibaka ya Yeriko

AWA yau kele bibaka ya Yeriko kele na kubwa. Yau kemonana bonso nde bau melosila yau bombe. Kansi na ntangu yina bombe kuvandaka ntete ve, bau kuvandaka ve nkutu ata ti minduki. Yau kele dyaka kidimbu ya nkumbwa ya Jéhovah! Inki mutindu yau kusalamaka?

Jéhovah tubaka na Josué nde: ‘Nge ti bantu na nge ya mvita, beno tambula na nzyunga ya mbanza mpi beno zyunga yau mbala mosi. Beno sala mutindu yina konso kilumbu, na bilumbu sambanu. Beno vanda na sanduku ya ngwakana. Banganga-Nzambi nsambwadi fwete tambula na ntwala mpi kubula bampungi na bau.

‘Na kilumbu ya nsambwadi, beno tazyunga mbanza mbala nsambwadi. Na nima, beno tabula mpungi ntangu mingi mpi beno tatula byololo ya mvita. Mpi bibaka tabwa na mbala mosi!’

Josué na bantu yonso kusalaka mutindu Jéhovah kusongaka bau. Ntangu bau vandaka kuzyunga mbanza, ata muntu mosi ve vandaka kutuba. Kaka mazu ya mpungi vandaka kuwakana mpi mazu ya makulu. Bantu ya Yeriko vandaka na boma ya mingi. Keti beno kemona nsinga ya mbwaki na nela mosi? Yina kele nela ya nzo ya Rahab; yandi vukisaka kikanda na yandi na kisika mosi. Bau yonso kekinga.

Na kilumbu ya nsambwadi, ntangu bau zyungaka mbanza mbala nsambwadi, bau bulaka mpungi mpi bantu ya mvita tulaka byololo, na nima, bikaka kubwaka. Sambu na yau, Josué kutubaka nde: ‘Beno fwa bantu yonso mpi beno yoka bau, beno yoka mbanza tiya. Beno bika kaka wolo, mbongo, kwivre mpi bibende; beno tula yau na kibumbilu ya Jéhovah.’

Josué tubaka na bantu yina kwendaka kuzikisa insi nde: ‘Beno kota na nzo ya Rahab mpi beno basisa yandi na dibuta na yandi.’ Rahab ti kikanda na yandi kugulukaka kaka mutindu bantu yina kusilaka yandi.