Jezabel—Mfumu-nkento ya Imbi

NA NIMA ya lufwa ya Jeroboam, bantotila yonso ya kubakaka kimfumu ya makanda 10 vandaka bantotila ya mbi. Ntotila ya kuluta mbi vandaka Akab. Keti beno kezaba sambu na nki? Sambu yandi vandaka kulanda mambu ya nkento na yandi Jezabel.

Jezabel vandaka nkento ya Israele ve. Yandi vandaka mwana ya ntotila ya Sidon. Yandi vandaka kusambila Baal mpi yandi bendaka bakala na yandi na lusambu ya nzambi na yandi na bantu yankaka mingi ya Israele. Yandi vandaka kuzola Jéhovah ata fyoti ve mpi yandi fwaka bambikudi mingi ya Jéhovah. Bankaka tinaka sambu na kufwa ve na maboko na yandi. Jezabel vandaka kuwa ata boma ya kima mosi ve, ata kufwa muntu yina mesala mambi ve.

Kilumbu mosi, Akab vandaka na ntantu. Jezabel yulaka yandi: ‘Sambu na nki nge kele na ntantu?’

Yandi vutulaka nde: ‘Yau kele sambu na Nabot. Mono mezola kusumba bilanga na yandi ya vinu, kansi yandi mebuya na kutekila yau mono.’

Jezabel tubaka nde: ‘Kumona mpasi ve, mono kebaka yau sambu na nge.’

Ebuna Jezabel sonikaka mikanda na bambuta yankaka na mbanza yina Nabot vandaka kuzinga. Yandi sonikaka nde: ‘Beno baka bimpumbulu mpi beno songa bau na kutuba nde Nabot mesawula Nzambi na ntotila. Na nima beno basisa yandi na mbanza mpi beno fwa yandi na matadi.’

Ntangu Jezabel waka nde Nabot mefwa, yandi kwisaka kutuba na Akab nde: ‘Kwenda kubaka bilanga ya vinu ya Nabot.’ Keti Jezabel bakaka ndola sambu na mambi ya mutindu yai?

Inga, sambu na nima ya mwa bilumbu, Jéhovah tindaka Jehu sambu na kulola yandi. Ntangu yandi waka nde Jehu mekuma, Jezabel kudipakulaka mukubu na lukika ya meso, yandi kudiyidikaka nitu mpi kwendaka kuvanda na nela. Kansi Jehu tubaka, ntangu yandi monaka yandi nde: ‘Beno bwisa yandi na ntoto!’ Bantu zole yina vandaka kuna losaka yandi mutindu kifwanisu kemonisa yau. Yau kele mpila yina Jezabel, mfumu-nkento ya mbi, kufwaka.