Jozafat Me Kudipesa na Nzambi

KETI beno zaba banani bantu yai mpi nki bau kesala? Bau kekwenda na mvita mpi bantu kele na ntwala keyimba. Bonso beno kemona yau, bayimbidi kele na binwaninu ve: bau kele na bambele ve, mpi madyonga ve. Sambu na nki?

Jozafat vandaka ntotila ya makanda zole. Yandi vandaka kuyala na bilumbu ya Ntotila Akab mpi mfumu-nkento Jezabel, bamfumu ya kintinu ya makanda 10. Kansi, Jozafat vandaka ntotila ya mbote, bonso tata na yandi Asa. Na bamvula kumi, kintinu ya makanda zole vandaka na ngemba.

Kansi kilumbu mosi, mambu kubwaka yina kumonisaka bantu mpasi na boma. Bangenzi kwisaka kutubila Jozafat nde: ‘Basoda mingi mekatuka na Moab; na Ammon mpi na ngumba Seir kekwisa na nge.’ Ebuna, bana ya Israele kutanaka na kimvuka na Yerusaleme sambu na kusosa lusadisu ya Jéhovah. Bau kwendaka na tempelo mpi kuna, Jozafat sambilaka mutindu yai: ‘O Jéhovah, beto kemona ve nki beto fwete sala na bantu yai mingi. Beto ketula ntima na beto yonso na nge.’

Jéhovah kuwaka mbote mpi yandi pusaka mosi na bansadi na yandi na kutuba nde: ‘Beno ve tanwana, kaka Nzambi. Beno tala kaka mpi beno tamona nki mpila Jéhovah tagulusa beno.’

Kilumbu ya kulandaka, Jozafat tubaka na bantu nde: ‘Beno tula ntima na Jéhovah. Ebuna yandi tulaka na ntwala ya basoda na yandi bayimbidi, mpi bau yimbaka sambu na kukumisa Jéhovah. Ntangu basoda kumaka na kisika ya mvita, Jéhovah kotisaka mavwanga na bambeni na bau mpi bau yantikaka na kunwana bau na bau. Ntangu bana ya Israele kumaka, bau kutaka kaka bamvumbi melala-lala na ntoto!

Keti Jozafat vandaka ve na mayele ya kutula ntima na yandi na Yehowa? Yau kele mayele kana beto tula ntima na Yandi mpi.