Banzila yina bau kesadilaka sambu na kupanza nsangu
Bakristu bakaka ntuma ya ‘kukitula bantu ya makanda yonso balongoki,’ kansi ata mpidina, bau ke na nswa ve na kusala yau to na kubalula ntima ya bantu na kingolongolo. Yezu pesamaka kisalu ya “kuzabisa nsangu na bansukami,” na “kunata kyese na bayina kemona mpasi,” na “kuyangidisa bayina ke na mpasi.” (Matai 28:19; Isaya 61:1, 2; Luka 4:18, 19) Ba Témoins de Jéhovah keyunsaka na kusala mutindu yina sambu na kusamuna nsangu ya mbote yina ke na kati ya Bible. Bonso mbikudi Ezekiel, bau kesala ngolo na kukutana ti bantu “yina kemona mpasi mpi kedila sambu na mambi yonso yai ke na kusalama.”—Ezekiel 9:4.
Kati na banzila yina yonso ba Témoins de Jéhovah kesadila sambu na kukutana ti bantu yina kemona mpasi sambu na mavwanga yai ke na kusalama bubu yai, nzila ya mezabana mingi ke kisalu ya kusamuna nzo na nzo. Mpidina, bau ketula bikesa na masonga yonso sambu na kukutana ti bantu yonso, na kulandaka mbandu ya Yezu yina vandaka kukwenda “mbanza na mbanza mpi bwala na bwala, na kusamuna mpi na kulonga nsangu ya mbote ya kimfumu ya Nzambi.” Balongoki nandi ya ntete mpi kusalaka mpidina. (Luka 8:1; 9:1-6; 10:1-9) Bubu yai, kana mpila memonana, ba Témoins de Jéhovah ketulaka ngolo na kuluta na byelo yonso mbala mingi na mvu na mpila nde bau kusolula mwa ntangu fyoti ti bantu mambu yina ketadila nzyunga na bau to ntoto ya mvimba. Bau ketangaka mukapu mosi to zole ya Bible. Kana bau mekutana na bantu yina kesepela na nsangu, bau kesilaka na kuvutukila bau na ntangu mefwana sambu na kulanda disolo. Bau kepesaka ba Bibles, ebuna, kana muntu memonisa kuyangalala nandi na nsangu, bau kevutukilaka yandi sambu na kusadisa yandi na kulonguka Masonuku, ya ofele. Na 1988, na nza ya mvimba, ntalu ya bantu yina kulongukaka Bible mbala na mbala kuvandaka 3 250 000.
Ba Témoins kevukanaka mbala na mbala na banzo yina kebingamaka Salles du Royaume. Yina ke mosi ya mitindu mpi bau kesadilaka sambu na kuzabisa “nsangu ya mbote ya kimfumu.” Na kati ya ba Salles yina balukutakanu mingi kesalamaka na mposo. Ikele na diskur ya bantu yonso kesalamaka, yau ketendulaka mambu ya mfunu sambu na bantu yonso. Na nima ya diskur yina, malongi yankaka kepesamaka sambu na kutendula disolo mosi to mbikudulu ya Bible na lusadisu ya La Tour de Garde. Lukutakanu yankaka ya nzo-nkanda ya bunzambi kesalamaka sambu na kukumisa ba Témoins bansamuni ya kikesa mpenza ya nsangu ya mbote. Ndambu ya zole ya lukutakanu yina keyidikamaka sambu na kupesana bangindu mpi ba eksperianse sambu na kisalu ya kusamuna nsangu ya mbote na teritwar ya dibundu na bau. Na nima ba Témoins kevukanaka na banzo ya bampangi yankaka, na bibuka ya fyotifyoti, sambu na kulonguka Bible mposo na mposo.
Balukutakanu yonso yina ke sambu na bantu yonso. Kuna bau kesalaka nsinsani to ba quêtes ve. Balukutakanu yina ke na mfunu mingi sambu na bantu yonso. Kuwa yina Bible ketuba: “Beto banzana bamosi na bankaka, sambu na zola mpi sambu na bisalu ya mbote. Kutina ve lukutakanu na beno, bonso yau ke kifu ya bankaka; kansi beno pesana kikesa, awa ya beno kemona nde kilumbu kefinama.” Sambu na kulanda mbote lukutakanu yina, yau kelomba na nge na kutanga mingi mpi kusala kikesa ya kudiyidika nge mosi, ebuna kuvukana mpidina kumosi ti bampangi tayedisa kimpeve na beto. Bible ketuba nde: “Butadi kekumaka makasi na butadi yankaka, muntu mpi kepedisaka mpeve ya mpangi nandi.”—Ebeleo 10:24, 25, Osty; Bingana 27:17, Dhorme.
Ba Témoins kesadilaka mabaku yonso yina bau kekutanaka na yau na luzingu ya lumbu na lumbu sambu na kutubila nsangu ya mbote. Bau keyunsaka na kupesa kimbangi na mabaku yonso yina bau kekutana na yau mumbandu: na ntangu bau kesolula ti bamfinangani na bau to na nduku ya nzyetolo; ntangu bau kesolula ti nduku to ti mpangi ya kinsuni; ntangu bau kesolula ti nduku ya kisalu ya kinsuni na ntangu ya kupema. Yezu, yandi mpi, pesaka kimbangi na mabaku yonso: ntangu yandi vandaka kulenga mfinama na mbu, ntangu yandi vandaka na zulu ya ngumba, ntangu bau vandaka binga yandi sambu na kudya to na nkinsi ya makwela, ntangu yandi vandaka lenga na mbu ya Galilea na maswa ya kulobila bambisi. Yandi vandaka kulonga na basynagoga mpi na tempelo ya Yeruzalem. Na bisika yonso yina yandi vandaka, Yezu vandaka kusosa mabaku ya kusamuna nsangu ya Kimfumu ya Nzambi. Ba Témoins de Jéhovah kesalaka kikesa sambu na kulanda bitambi nandi na dyambu yina.—1 Petelo 2:21.
KISALU YA KUSAMUNA MUMBANDU
Ata mosi ve na banzila yonso ya kesadilamaka sambu na kusamuna nsangu ya mbote lendaka nunga kana nde nsamuni yandi mosi kesadila ve mambu yina yandi kelonga. Muntu yina ketuba kima yankaka kansi kesala kima yankaka ke muntu ya luvunu. Luvunu ya lusambu metinisaka bamiliyo ya bantu na kukwikila mpi na kulanda Bible. Na kutuba kyeleka, mpila ya kubangika Ndinga ya Nzambi kele ve. Bansoniki mpi bafarizye vandaka na Masonuku ya ki-hébreu, kansi Yezu bedisaka bau sambu bau vandaka bantu ya luvunu. Na nima, ntangu yandi zabaka nde bantu yina longamaka na Nsiku ya Moïse, Yezu yikaka mambu yai na balongoki nandi nde: “Beno sala mpi beno landa mambu yonso yina bau ketubila beno. Kansi beno landa bikalulu na bau ve, sambu bau kesalaka ve mambu yina bau kelonga bantu yankaka na kusala.” (Matai 23:3) Bikalulu ya mbote ya bukristu mpamba melunga na kulonga bantu na sika ya kusala masolo ya ndanda. Ikele sambu na dyambu yai ntumwa mosi pesilaka ndongisila na bankento bakristu yina babakala na bau vandaka bakwikidi ve nde: “[Mbalankaka] bau lenda bakama, kukonda ndinga, na kulanda bikalulu na beno ya vumi bankento na bau, na nima ya kumona bikalulu na beno ya luzitu.”—1 Petelo 3:1, 2.
Yau yina, ba Témoins kesalaka ngolo sambu na kunungisa nsangu ya mbote mutindu yina mpi, yau zola tuba nde, na kuvandaka bau mosi mbandu ya mbote sambu na yina ketadila bikalulu ya mbote ya bukristu na mambu yina bau kelonga na nkweno. Bau ketulaka ngolo na ‘kusadila bankaka mambu yina bau kezola nde bantu yankaka kusadila bau.’ (Mat. 7:12) Bau ketulaka ngolo na kusala mpidina na bantu yonso, kansi ikele ve nde kaka bau na bau ba Témoins to na banduku na bau, to na bamfinangani to na bampangi na bau ya kinsuni. Konso ntangu bau kenungaka ve na mambu yonso, sambu na kukonda kulunga ya nitu mpi sambu na bunsumuki. Kansi ata mpidina, na masonga yonso, bau kezodila sadila bantu yonso mambote, kaka na kusamunilaka bau nsangu ya mbote ve, kansi mpi na kupesaka bau lusadisu ya kisuni yina bantu yango ke na yau mfunu kana mpila kele.—Yakobi 2:14-17.
[Bangogo sambu na kubenda dikebi ya kele na lutiti 21]
Bau mebakama kukonda ndinga
[Bifwanisu ya kele na lutiti 20]
Ba Salles du Royaume, yina metungama mutindu mosi ya kufwana, ke bisika sambu na masolo ya Bible
[Bifwanisu ya kele na lutiti 22]
Na dibuta mpi na bangwizani na bau ti nkweno, ba Témoins ketulaka ngolo na kusadila mambu yina bau kelonga na bantu yankaka