Kapu 2

Yandi Mekumisama na Ntwala Yandi Kubutuka

NA NIMA ya wanzyo Gabriele metubila mwana-ndumba Maria nde yandi tabuta mwana ya bakala yina takituka ntotila ya mvula na mvula, Maria keyufula nde: “Nki mutindu mambu yina lenda vanda? Sambu mono me zabanaka ntete ti bakala ve.”

Gabriele ketendula nde: “Mpeve ya Nzambi ta kwisa kulumuka na zulu na nge; ngolo ya [muntu ya Kuluta Kuzanguka, NW] ta kwisa kufika nge. Yo yina, mwana yina ta butuka bo ta binga yandi muntu ya santu ti Mwana ya Nzambi.”

Sambu na kusadisa Maria na kundima nsangu na yandi, Gabriele kelanda nde: “Tala, mpangi na nge Elisabeti yandi mpi ke na divumu ata yandi kele mununu; yandi ta buta mwana ya bakala. Ata yandi vandaka mukobo, kansi ntangu yai yandi ke na divumu ya bangonda sambanu. Sambu Nzambi lunga sala mambu yonso.”

Maria mendima ndinga ya Gabriele. Mpi inki kele mvutu na yandi? Yandi ketuba nde: “Mono kele muntu ya kisalu ya Mfumu Nzambi! Mbote mambu yina kwisila mono mutindu nge me tuba.”

Nswalu na nima ya kukatuka ya Gabriele, Maria meyilama mpi mekwenda kutala Elisabeti, yina kezingaka ti bakala na yandi, Zakaria, na insi mosi ya bangumba ya Yudea. Katuka na bwala ya Maria na Nazareti, yai kele nzyetolo ya nda yina lenda kubaka mbala ya nkaka bilumbu tatu to iya.

Ntangu Maria mekuma na nzo ya Zakaria, yandi mekota mpi mepesa mbote. Na mbala mosi, Elisabeti mefuluka na mpeve santu, mpi yandi metubila Maria nde: “Nzambi me sakumuna nge kuluta bankento ya nkaka; yandi me sakumuna mpi mwana yina ya nge ta buta! Mono nani yai ya mama ya Mfumu na mono me kwisa kutala? Sambu tala, ntangu mono me wa mbote yina ya nge me pesa mono, mwana me nikana na kiese na divumu na mono.”

Ntangu yandi mewa mambu yai, Maria mevutula ti ntonda ya kekatuka na ntima nde: “[Moyo na mono kekembila Yehowa, mpi mpeve na mono lenda ve kudipimisa na kuyangalala na Nzambi Ngulusi na mono; sambu yandi metala nkadilu ya bunsukami ya mpika na yandi ya nkento. Sambu, tala, NW]! katuka ntangu yai, bantu yonso ta tuba nde Nzambi me sakumuna mono.” Kansi, ata yandi mebaka lemvo, Maria kepesa lukumu yonso na Nzambi. Yandi ketuba nde: “Zina na yandi kele [ya Santu. Bambandu yonso, NW] yina ke zitisaka yandi, yandi ke wilaka bo mawa.”

Maria kelanda na kukembila Nzambi na nkunga ya mbikudulu ya kupemama, na kutubaka nde: “Yandi ke salaka bisalu ya nene na ngolo ya maboko na yandi; yandi ke panzisaka bantu yina ke yindulaka na ntima na bo nde bo kele bantu ya nene. Yandi ke katulaka bantotila na bakiti na bo ya kimfumu; kansi yandi ke pesaka lukumu na bantu yina me konda lukumu. Yandi ke pesaka bima mingi ya mbote na bayina ke na nzala; kansi yandi ke vutulaka bamvwama maboko mpamba. Yandi ke sadisaka bantu ya Israele yina ke sadilaka yandi; mvula na mvula yandi ke vilaka ve kusonga ntima na yandi ya [mawa, NW], na Abrahami ti na bana na yandi, mutindu yandi silaka na bankaka na beto.”

Maria mevanda ti Elisabeti kiteso ya bangonda tatu; mpi na ntembe ve, yandi kele nsadisi ya nene na bamposo yai ya nsuka ya divumu ya Elisabeti. Yau kele mpenza mbote nde bankento yai zole ya kwikama, ya kele na mavumu na nsadisa ya mpeve ya Nzambi, lenda kuvanda kisika mosi na ntangu yai ya kusambulama ya luzingu na bau!

Keti nge mesimba lukumu ya Yezu kubakaka ata nkutu na ntwala ya kubutuka na yandi? Elisabeti bingaka yandi “Mfumu na mono,” mpi mwana na yandi na divumu kupamukaka na kyese ntangu Maria kumonanaka na mbala ya ntete. Na ndambu ya nkaka, na nima, bantu ya nkaka kupesaka ve luzitu na Maria ti mwana na yandi yina tabutuka mutindu beto tamona yau. Luka 1:​26-56.

▪ Inki Gabriele ketuba sambu na kusadisa Maria na kubakisa mutindu yandi takuma na divumu?

▪ Inki mutindu Yezu kukumisamaka na ntwala yandi kubutuka?

▪ Inki Maria metuba na nkunga mosi ya mbikudulu sambu na kukembila Nzambi?

▪ Maria mevanda ti Elisabeti bantangu ikwa, mpi sambu na inki yau kele mbote nde Maria kuvanda ti Elisabeti na ntangu yai?