Kapu 4
Na Divumu Kansi Yandi Mekwelaka Ntete Ve
MARIA mekuma na divumu ya bangonda tatu. Nge tayibuka nde yandi lutisaka bangonda ya luyantiku ya divumu na yandi na nzo ya Elisabeti, kansi sesepi yai yandi mevutuka na bwala na yandi na Nazareti. Nswalu mvwandilu na yandi tazabana na bantu yonso, na kati ya mbanza na yandi. Ya kyeleka, yandi kele na boma ya mingi!
Kima kekumisa mambu ngolo kele nde Maria mesilamaka na makwela na nketi ya nti, Yozefi. Mpi yandi kezaba nde, na nsiku ya Nzambi kupesaka bana ya Izraele, nkento yina bau mesila na makwela na bakala kansi yina mezaba bakala ya nkaka na luzolo yonso bau fwete kufwa yandi na matadi. Inki mutindu yandi lenda kutendula divumu na yandi na Yozefi?
Mutindu Maria kwendaka kusala bangonda tatu, beto lenda kundima nde Yozefi kele na mpusa ya ngolo ya kumona yandi. Ntangu bau mekutana, ngatu Maria ketela yandi nsangu. Yandi lenda kusala yonso sambu na kutendula nde yandi mebaka divumu na ngolo ya mpeve ya Nzambi. Kansi, bonso nge lenda kuyindula yau, yai kele dyambu mosi ya mpasi sambu Yozefi kundima.
Yozefi mezaba lukumu ya mbote ya Maria kele na yau. Mpi na ntembe ve, yandi kezolaka yandi mingi. Kansi, ata yandi kutuba inki mutindu, yau kemonana mpenza nde yandi kele na divumu ya muntu mosi. Ata mpila yina, Yozefi kezola ve nde bau kufwa yandi na matadi to kumonisa yandi nsoni na meso ya bantu. Ebuna, yandi mebaka lukanu ya kubikisa yandi na kinsweki. Na bilumbu yina, bantu ya mesilanaka na makwela, bau vandaka kubaka bau bonso bantu ya mekwelanaka, mpi yau vandaka kulomba kufwa makwela sambu na kusukisa luzitikilu.
Na nima, ntangu Yozefi kele kaka na kuyindula mambu yai, yandi mekwenda kulala. Wanzyo ya Yehowa mekwisa kumonana na yandi na ndosi mpi metuba nde: “Kuwa boma ve na kukotisa Maria na nzo na nge. Sambu mwana na yandi me katuka na Mpeve ya Nzambi. Yandi ta buta mwana-bakala. Nge ta pesa yandi zina: Yezu, sambu yandi muntu ta katula bantu na masumu na bo.”
Ntangu Yozefi metelama, yandi mevutula matondo mingi mpenza. Nkatu kusukinina, yandi mesala kaka mutindu wanzyo kutumaka. Yandi mekotisa Maria na nzo na yandi. Ya kyeleka, dyambu yai ya yandi mesala na meso ya bantu yonso, bonso nkinsi ya makwela, kemonisa nde Yozefi ti Maria mekwelana kibeni ntangu yai. Kansi Yozefi kuvukisaka ve nitu ti Maria ntangu yonso ya yandi kele na divumu ya Yezu.
Tala! Maria melemba ti divumu, yau yina Yozefi metula yandi na zulu ya mpunda. Na wapi bau kekwenda, mpi sambu na inki bau kesala nzyetolo ntangu Maria mekuma penepene na kubuta? Luka 1:39-41, 56; Matayo 1:18-25; Kulonga 22:23, 24.
▪ Inki Yozefi meyindula ntangu yandi mezaba nde Maria kele na divumu, mpi sambu na inki?
▪ Inki mutindu Yozefi lenda kufwa makwela ti Maria ata nkutu bau mekwelana ntete ve?
▪ Inki dyambu Yozefi mesala na meso ya bantu yina kemonisa nkinsi ya makwela ya Yozefi ti Maria?