Kapu 6

Mwana ya Lusilu

NA KISIKA ya kuvutuka na Nazareti, Yozefi ti Maria mebikala na Betelemi. Mpi ntangu Yezu melungisa bilumbu nana, bau meyotisa yandi, mutindu Nsiku ya Nzambi kupesaka na Moize ketuma. Dyaka, yau kemonana nde yau vandaka kikalulu na kupesa mwana-ndwelo ya bakala zina na kilumbu ya nana. Ebuna bau mepesa mwana na bau zina nde Yezu, mutindu wanzyo Gabriele kutubaka na ntwala.

Ngonda mosi ti ndambu meluta, Yezu melungisa bilumbu 40. Ntangu yai bibuti na yandi kenata yandi na wapi? Na tempelo na Yeruzalemi, yina kele kaka bakilometere fyoti katuka na kisika yina bau kele. Na kutadila Nsiku ya Nzambi kupesaka na Moize, bilumbu 40 na nima ya kubuta mwana-bakala, yau kelombamaka nde mama kunata makabu ya mvedolo na tempelo.

Yau yina Maria mesala. Sambu na makabu na yandi, yandi menata bandeke zole ya fyoti. Yai kesonga kima mosi na yina metala mvwandilu ya kimvwama ya Yozefi ti Maria. Nsiku ya Moize kemonisa nde mwana ya dimeme ya bakala, yina kele na mbalu mingi kuluta ndeke, fwete pesama. Kansi kana mama lenda kukuka ve na kupesa yau, mayembe zole to bapizyo zole lenda kulunga.

Na tempelo mununu mosi mebaka Yezu na maboko na yandi. Zina na yandi kele Simeoni. Nzambi tubilaka yandi nde yandi tafwa ve na ntwala yandi kumona Kristu to Mesia ya kusilamaka na Yehowa. Ntangu Simeoni mekwisa na tempelo kilumbu yai, mpeve santu metwadisa yandi na mwana yina Yozefi ti Maria kunataka.

Ntangu Simeoni mebaka Yezu yandi ketonda Nzambi, na kutubaka nde: “Ntangu yai, Mfumu, mambu yina ya nge silaka mono me lunga; yo yina nge lenda bikisa mono, muntu yina ke sadilaka nge, sambu mono kufwa na ngemba. Sambu mono me mona, na meso na mono mosi, [nzila na nge ya luguluku, NW] yina ya nge me sola na meso ya bantu yonso. Yandi kele mwini yina ta songa bamimpani nzila na nge. Yandi ta pesa lukumu na bantu na nge ya Israele.”

Yozefi ti Maria keyituka ntangu bau kewa mambu yai. Ebuna Simeoni mesakumuna bau mpi metubila Maria nde mwana na yandi “Nzambi me sola [yandi] sambu na kubwisa to kutedimisa bantu mingi ya Israele” mpi nde mpasi tatobula ntima na yandi bonso mbele ya makasi.

Mbikudi mosi ya nkento ya bamvula 84, zina na yandi Anna, kele na okazyo yai. Ya kyeleka, yandi kekondaka ve ata fyoti na tempelo. Kaka na ntangu yau yina, yandi mepusana mpi meyantika na kupesa matondo na Nzambi mpi na kutuba sambu na Yezu na bayina yonso tawidikila.

Kyese ya inki mutindu Yozefi ti Maria kewa sambu na mambu yai ya meluta na kati ya tempelo! Ya kyeleka, yonso yai kendimisa bau nde mwana kele Muntu ya Kusilamaka na Nzambi. Luka 2:​21-38; Levi 12:​1-8.

▪ Yau kemonana nde na Izraele, bau vandaka ti kikalulu ya kupesa mwana-ndwelo ya bakala zina inki ntangu?

▪ Inki vandaka kulombama na mama ya dikanda ya Izraele kana mwana na yandi ya bakala melungisa bilumbu 40, mpi inki mutindu kulungisama ya ntuma yai kemonisa mvwandilu ya kimvwama ya Maria?

▪ Banani mezaba Yezu kele nani na okazyo yai, mpi inki mutindu bau memonisa yau?