Kapu 7

Yezu ti Bandwenga

BANTU mingi mekatuka na ndambu ya Esti. Bau kele bandwenga​—⁠bantu yina ketubaka nde bau ketendulaka pozisyo ya bambwetete. Ntangu bau kuvandaka na bwala na bau na ndambu ya Esti, bau monaka mbwetete yampa, mpi bau landaka yau na bankama ya bakilometere tii na Yeruzalemi.

Ntangu bandwenga mekuma na Yeruzalemi, bau meyufula nde: “Wapi mwana yina me butuka sambu na kuvanda ntotila ya Bayuda? Beto monaka mbwetete na yandi ntangu yo monikaka na ndambu ya Este, ebuna beto me kwisa sambu na kusamba yandi.”

Ntangu Mfumu Erode ya kele na Yeruzalemi mewa mambu yai, yandi metungisama mingi. Ebuna yandi mebinga bambuta ya banganga-Nzambi mpi meyufula bau kisika Kristu fwete kubutuka. Na kupesaka mvutu na bau na lufulu ya Masonuku, bau mevutula nde: “Na Betelemi.” Ntangu yandi mewa mpila yina, Erode mebinga bandwenga mpi metubila bau nde: “Beno kwenda kusosa mwana yina mbote-mbote. Kana beno me mona yandi, beno kwisa zabisa mono. Mpidina mono mpi, mono ta zaba kwenda kusamba yandi.” Kansi, na masonga yonso, Erode kezola kumona mwana sambu na kufwa yandi!

Na nima ya kukatuka na bau, dyambu ya ngituka mesalama. Mbwetete yina bau monaka ntangu bau vandaka na ndambu ya Esti kekwenda na ntwala na bau. Yau kemonana pwelele nde yai kele ve mbwetete mosi ya mpamba, kansi yau kupesamaka kibeni sambu na kutwadisa bau. Bandwenga mefula na kulanda yau tii kuna yau mekwenda kutelama kibeni na zulu ya nzo kisika Yozefi ti Maria kele.

Ntangu bandwenga mekota na nzo, bau mekuta Maria ti mwana na yandi ya fyoti, Yezu. Na mbala mosi, bau yonso mefukimina yandi. Mpi bau mebasisa makabu ya wolo, bima ya mananasi, ti mire na basaki na bau. Na nima, ntangu bau mefinama sambu na kuvutuka, mpi na kutubila Erode kisika mwana kele, Nzambi mekebisa bau na ndosi na kukonda kusala yau. Ebuna, bau mekwenda na insi na bau na nzila ya nkaka.

Nge keyindula nde nani kubasisaka mbwetete yina na zulu sambu na kutwadisa bandwenga? Yibuka nde, mbwetete kutwadisaka bau ve mbala mosi na Yezu na Betelemi. Kansi, bau twadisamaka na Yeruzalemi kuna bau kutanaka ti mfumu Erode, yina zolaka kufwa Yezu. Mpi yandi zolaka kusala mutindu yina kana Nzambi kukotaka ve na kati sambu na kukebisa bandwenga nde bau kutubila ve Erode kisika Yezu kuvandaka. Yau kuvandaka mbeni ya Nzambi, Satana Dyabulu, muntu zolaka kufwa Yezu, mpi yandi kusadilaka mbwetete yina sambu na kumeka kulungisa lukanu na yandi. Matayo 2:​1-12; Mishe 5:⁠2.

▪ Inki kemonisa nde mbwetete ya bandwenga monaka kuvandaka mbwetete ya mpamba ve?

▪ Yezu kele na wapi ntangu bandwenga memona yandi?

▪ Sambu na inki beto kezaba nde Satana muntu kubasisaka mbwetete sambu na kutwadisa bandwenga?