Kapu 11

Yoane Keyidika Nzila

BAMVULA kumi na nsambwadi meluta kubanda Yezu vandaka mwana ya bamvula 12 yina vandaka kuyufula bangyufula na balongi na tempelo. Yai kele nsungi ya printemps ya mvu 29 T.B., mpi yau kemonana nde, bantu yonso ketubila mambu yina metala kisoni ya Yezu, Yoane, yina kele na kusamuna na insi yonso na nzyunga ya Nzadi ya Yordani.

Ya kyeleka, Yoane kele muntu ya kuyitukisa, na kimuntu na yandi ti na ntubilu na yandi. Mvwatu na yandi kele mpusu ya shamo, mpi yandi melwata mukaba ya kwire na luketu na yandi. Madya na yandi kele bampasu ti bwiki ya mfinda. Ebuna nsangu na yandi? “Beno balula ntima sambu Kimfumu ya Nzambi me kuma penepene!”

Nsangu yai kebenda dikebi ya bawi na yandi. Bamingi kemona mfunu ya kubalula ntima, disongidila, kusoba nkadilu na bau mpi kulosa bikalulu na bau ya mbi ya luzingu ya ntama na kukondaka kuzola yau dyaka. Ebuna na teritware ya nzyunga ya Yordani yonso, nkutu kubanda na Yeruzalemi, bantu mingi kekwisa kulanda Yoane, mpi yandi kebotika bau, na kudindisaka bau na masa ya Yordani. Sambu na inki?

Yoane kebotika bantu na kifwani, to kemonisa kubalula na bau ya ntima sambu na masumu na bau ya bau salaka na ngwakana ya Nsiku ya Nzambi. Yau yina, ntangu Bafarize ti Basadise mekwisa na Yordani, Yoane mebedisa bau. Yandi ketuba nde: “[Beno bana ya biwuta, NW]. . . . Beno sala mambu yina ke songa nde beno me balula ntima. Beno yindula ve nde: ‘Abrahami muntu kele nkaka na beto.’ Sambu mono ke tubila beno nde na matadi yai Nzambi lenda sala bana sambu na Abrahami! Sesepi yai Nzambi me baka soka sambu na kuzenga banti na misisa na yo; konso nti yina ke butaka bambuma ya mbote ve, Nzambi ta zenga yo, yandi ta losa yo na tiya.”

Bantu ketula dikebi ya nene na Yoane na mpila nde, Bayuda metindila yandi banganga-Nzambi ti Balevi. Bau meyufula nde: “Nge kele nani?”

Yoane mevutula na masonga yonso nde: “Mono kele Mesia ve.”

Bau meyufula yandi dyaka nde: “Nge kele nani ko? Nge kele Elia?”

Yandi mevutula nde: “Ve, mono kele Elia ve.”

“Nge kele Profete?”

“Ve.”

Ebuna bau melatama nde: “Kansi nge kele nani? Beto fweti kwenda kupesa mvutu na bayina tindaka beto. Nki nge ke tuba sambu na nge mosi?”

Yoane metendula nde: “Mono kele ‘Ndinga ya muntu mosi ke tuba ngolo na ntoto ya zelo na zelo: Beno sungika nzila ya [Yehowa, NW]!’ (Yina kele mambu ya profete Yezaya tubaka.)”

Bau meyufula nde: “Kana nge kele Mesia ve, to Elia, to Profete yina ya beto ke waka nde yandi ta kwisa, sambu na nki nge ke botika bantu?”

Yandi mevutula nde: “Mono, mono ke botika bantu na masa, kansi ke na muntu mosi awa na kati na beno ya beno ke bakisa ve. Yandi ke kwisa na nima na mono.”

Yoane kebongisa nzila na kunataka bantu ya nkadilu ya mbote ya ntima sambu na kundima Mesia, yina takuma Ntotila. Sambu na yandi, Yoane ketuba nde: “Muntu yina ke kwisa, yandi me luta mono na ngolo. Mono me fwana ata ve na kukatula basandale na yandi.” Ya kyeleka, Yoane ketuba nkutu nde: “Muntu mosi ke kwisa na nima na mono, yandi meluta mono, sambu ntangu yandi vandaka ke zinga, mono vandaka me butuka ntete ve.”

Kansi, nsangu ya Yoane yina ketuba nde: “Kimfumu ya zulu me kuma penepene!” kele kidimbu yina kemonisa na bantu yonso nde kisalu ya muntu yina Yehowa mepona sambu na kuvanda Ntotila, Yezu Kristu, mefinama na kuyantika. Yoane 1:​6-8, 15-28; Matayo 3:​1-12; Luka 3:​1-18; Bisalu 19:⁠4.

▪ Yoane kele muntu ya inki mutindu?

▪ Sambu na inki Yoane kebotika bantu?

▪ Sambu na inki Yoane lenda kutuba nde Kimfumu ya Nzambi mekuma penepene?