Kapu 12

Mbotika ya Yezu

KITESO ya bangonda sambanu na nima ya Yoane meyantika na kusamuna, Yezu, yina melungisa ntangu yai bamvula 30, mekwisa na yandi na Yordani. Sambu na inki kikuma? Na kutala yandi sambu na kinduku? Keti Yezu kesepela kaka na mutindu kisalu ya Yoane kekwendila? Ve, Yezu kelomba Yoane na kubotika yandi.

Na mbala mosi, Yoane mebuya nde: “Mono muntu zolaka kubaka mbotika na nge, kansi nge muntu me kwisa awa na mono!” Yoane kezaba nde kisoni na yandi Yezu kele Mwana ya sipesiali ya Nzambi. Kikuma yau yina, Yoane kupamukaka na kyese na kati ya divumu ya mama na yandi ntangu Maria, na divumu ya Yezu, kwendaka kutala bau! Na ntembe ve, mama ya Yoane, Elisabeti, kutubilaka yandi mambu yango na nima. Mpi ziku yandi telaka yandi nsangu ya wanzyo kupesaka na yina metala lubutuku ya Yezu mpi na yina metala kumonana ya bawanzyo na bangungudi na mpimpa yina Yezu butukaka.

Na yau, Yezu kele ve nzenza sambu na Yoane. Mpi Yoane kezaba nde mbotika na yandi kele ve sambu na Yezu. Yau kele sambu na bayina kebalula ntima sambu na masumu na bau, kansi Yezu kele na disumu ve. Kansi, ata Yoane mebuya, Yezu melatama nde: “Yo vanda mpidina na ntangu yai. Sambu mutindu yai beto ta lungisa luzolo ya Nzambi.”

Sambu na inki yau kele mbote nde Yezu kubaka mbotika? Sambu mbotika ya Yezu kele kifwani ya kubalula ntima ve sambu na masumu, kansi ya kudimonisa sambu na kusala luzolo ya Tata na yandi. Yezu kevandaka nketi ya nti, kansi sesepi yai, ntangu melunga sambu yandi kuyantika kisalu ya Yehowa Nzambi kutindilaka yandi na kulungisa na zulu ya ntoto. Keti nge keyindula nde Yoane ketula kivuvu nde kima mosi ya kuyituka tasalama ntangu yandi kebotika Yezu?

Ebuna, na nima Yoane ketuba nde: “Nzambi yina tindaka mono na kubotika bantu na masa yandi tubilaka mono nde: ‘Nge ta mona Mpeve Santu ke kwisa kukulumuka, [yau] ta kwisa kuvanda na zulu ya ntu ya muntu mosi; yandi yina muntu ta botika bantu na Mpeve.’ ” Ebuna, Yoane ketula kivuvu nde mpeve ya Nzambi takulumuka na zulu ya muntu mosi ya yandi tabotika. Yau yina, mbala ya nkaka, yandi keyituka mpenza ve na ntangu Yezu kebasika na masa, Yoane memona “mpeve ya Nzambi ke kwisa kukulumuka bonso pizio na zulu ya ntu na yandi.”

Kansi, ntangu Yezu kebotama, dyambu ya nkaka mesalama. ‘Ebuna zulu kangukaka’ sambu na yandi. Yau kezola kutendula inki? Ya kyeleka, yau ketendula nde na ntangu yandi kebaka mbotika, mbambuka ya luzingu na yandi na zulu na ntwala ya kukuma muntu mevutukila yandi. Na yau, ntangu yai, Yezu keyibuka mpenza luzingu na yandi bonso mwana ya kimpeve ya Yehowa Nzambi, yika mambu yonso ya Nzambi kutubilaka yandi na zulu na ntwala yandi kukuma muntu.

Dyaka, na ntangu ya mbotika na yandi, ndinga ya kukatukaka na zulu ketuba nde: “Yai kele Mwana na mono ya mono ke zolaka mingi. Mono kele na kiese mingi sambu na yandi.” Yina kele ndinga ya nani? Ndinga ya yandi mosi Yezu? Ata fyoti ve! Yau kele ndinga ya Nzambi. Na pwelele yonso, Yezu kele mwana ya Nzambi, yandi mosi Nzambi ve, bonso bantu yankaka keyindulaka yau.

Kansi, Yezu kele mwana ya kinsuni ya Nzambi, kaka mutindu kuvandaka muntu ya ntete, Adami. Longoki Luka, na nima ya kutendula mbotika ya Yezu, kesonika nde: “Yezu vandaka kiteso ya bamvula makumi tatu ntangu yandi yantikaka kisalu na yandi. Bo vandaka kubanza nde yandi kele mwana ya Yozefi, mwana ya Eli, . . . mwana ya Davidi, . . . mwana ya Abrahami, . . . mwana ya Noa, . . . mwana ya Adami, . . . mwana ya Nzambi.”

Mutindu Adami kuvandaka “mwana ya Nzambi” ya kinsuni, mutindu mosi Yezu mpi kele mwana ya Nzambi. Yezu kele muntu ya kuluta nene ya ntangu yonso, dyambu yai kebefulama ve ntangu beto ketadila luzingu ya Yezu. Kansi, na mbotika na yandi, Yezu mekota na ngwisana ya mpa ti Nzambi, na kukumaka mpi Mwana ya kimpeve ya Nzambi. Ntangu yai, Nzambi kebinga yandi dyaka na zulu, na mutindu ya kifwani, na kutulaka yandi na luyantiku ya luzingu yina tanata yandi na kutambika kimakulu luzingu na yandi ya kimuntu bonso dikabu sambu na bantu ya kulolama. Matayo 3:​13-17; Luka 3:​21-38; 1:​34-36, 44; 2:​10-14; Yoane 1:​32-34; Baebreo 10:​5-9.

▪ Sambu na inki Yezu kele ve munzenza sambu na Yoane?

▪ Mutindu yandi mesalaka ve ata disumu, sambu na inki Yezu mebotama?

▪ Na kutadila mambu ya Yoane mezaba sambu na Yezu, sambu na inki yandi lenda ve kuyituka ntangu mpeve ya Nzambi mekwisa kukulumuka na zulu ya Yezu?