Kapu 13
Beto Baka Dilongi na Bampukumuna ya Yezu
MBALA mosi na nima ya mbotika na yandi, mpeve ya Nzambi metwadisa Yezu na ntoto makanga ya Yudea. Yandi kele na mambu mingi ya kuyindula, sambu na mbotika na yandi “zulu kangukaka,” na mpila nde yandi lendaka kuyindula mambu ya zulu. Ya kyeleka, yandi kele na mambu mingi ya kuyindulula!
Yezu mesala bilumbu 40 mpi bampimpa 40 na ntoto makanga mpi yandi kedya ata kima mosi ve na nsungi yai. Ebuna, ntangu Yezu kele na nzala ya mingi, Dyabulu mepusana na kumeka yandi, na kutubaka nde: “Kana nge kele Mwana-Nzambi, tuba na matadi yai, yo kuma mampa.” Kansi Yezu kezaba nde yau kele mbi na kusadila kiyeka na yandi ya kusala bimangu sambu na kuyangidika bansatu na yandi mosi. Na yau, yandi mebuya na kupukumuka.
Kansi Dyabulu kebikisa ve. Yandi memeka mutindu ya nkaka. Yandi kesosila Yezu nde yandi kudilosa na ntoto katuka na Kibaka ya tempelo na mpila nde bawanzyo ya Nzambi kugulusa yandi. Kansi Yezu mepukumuka ve na kusala mambu ya kukonda mfunu. Na kutubilaka Masonuku, Yezu kemonisa nde yau kele mbi na kumeka Nzambi na mutindu yai.
Na mpukumuna ya tatu, Dyabulu kemonisa Yezu bimfumu yonso ya inza na mutindu mosi ya kuyituka mpi ketuba nde: “Yai yonso ya nge ke mona, mono ta pesa nge yo kana nge fukama [mpi kusala kidimbu ya lusambu na ntwala na mono, NW].” Kansi Yezu mebuya dyaka na kundima mpukumuna sambu na kusala mbi, na kuponaka kusikila ya kukangama na Nzambi.
Beto lenda kubaka dilongi na bampukumuna yai ya Yezu. Yau kemonisa, mu mbandu, nde Dyabulu kele ve kaka kikalulu ya mbi, bonso bantu ya nkaka ketubaka, kansi yandi kele muntu ya kyeleka, ya kukonda kumonana. Mpukumuna ya Yezu kemonisa mpi nde bimfumu yonso ya ntoto kele ya Dyabulu. Sambu, kana yau vandaka kibeni ya yandi ve, inki mutindu kupesa ya Dyabulu kupesaka yau na Kristu zolaka kuvanda mpukumuna ya kyeleka?
Mpi yindula dyambu yai: Dyabulu zolaka kupesa Yezu matabisi sambu na kidimbu mosi ya lusambu, yandi vandaka ya kuyilama na kupesa yandi bimfumu yonso ya inza. Dyabulu lenda kumeka mbote-mbote na kupukumuna beto na mutindu mosi, mbala ya nkaka na kutulaka na ntwala na beto baokazyo ya kepukumuna sambu na kubaka kimvwama ya mingi, kiyeka, to pozisyo ya nene. Kansi, beto tavanda mpenza bantu ya mayele na kulandaka mbandu ya Yezu, na kubikalaka ya kwikama na Nzambi ata mpukumuna yango kuvanda ya inki mutindu! Matayo 3:16; 4:1-11; Marko 1:12, 13; Luka 4:1-13.
▪ Yau kemonana nde Yezu keyindulula inki mambu na bilumbu 40 yina yandi mesala na ntoto makanga?
▪ Inki mutindu Dyabulu memeka na kupukumuna Yezu?
▪ Inki dilongi beto kebaka na bampukumuna ya Yezu?