Kapu 16

Kikesa Sambu na Lusambu ya Yehowa

BAMPANGI ya Yezu ya kimama​—⁠bana ya nkaka ya Maria​—⁠kele Yakobo, Yozefi, Simoni, ti Yuda. Na ntwala bayai yonso kusala nzyetolo ti Yezu mpi balongoki na yandi na Kapernaumi, bwala mosi ya kele penepene na Nzadi ya Galilea, mbala ya nkaka bau metelama na bwala na bau na Nazareti na mpila nde dibuta lenda kukangisa madya ya bau tavanda na yau mfunu.

Kansi sambu na inki Yezu kekwenda na Kapernaumi na kisika ya kulanda kisalu na yandi na Kana, na Nazareti, to na bisika ya nkaka na miwanda ya Galilea? Ntete, Kapernaumi kele na kisika ya mbote kibeni mpi ya kyeleka, yau kele mbanza ya kuluta nene. Dyaka, balongoki ya Yezu mingi ya mpa kezingaka pana to penepene ti Kapernaumi, ebuna yau talomba ve nde bau kukatuka na banzo na bau sambu na kulanda ndongolo na yandi.

Ntangu yandi mevanda na Kapernaumi, Yezu kesala bisalu ya kuyituka, bonso yandi mosi tamonisa yau na nima ya mwa bangonda. Kansi nswalu Yezu ti bankundi na yandi mebaka dyaka nzila. Yai kele printemps, mpi bau kekwenda na Yeruzalemi na kuvanda na Paki ya mvu 30 T.B. Ntangu bau kele kuna, balongoki na yandi memona dyambu mosi na yina metala Yezu, ziku yina bau memonaka ntete ve na ntwala.

Na kutadila Nsiku ya Nzambi, bantu ya Izraele fwete kupesa bimenga ya bambisi. Yau yina, sambu na kusadisa bau, bateki na Yeruzalemi ketekaka bambisi to bandeke sambu na kikuma yai. Kansi bau keteka kaka na kati ya tempelo, mpi bau keyiba bantu na kutekaka yau na ntalu ya kuluta mingi.

Yezu mewa makasi mingi kibeni, Yandi meyidika fimbu ya bansinga mpi yandi mekula bateki na nganda. Yandi melosa bibende ya mbongo ya bansobisi mpi mebalulabalula bamesa na bau. Yandi menganina bayina keteka bapizyo nde: “Beno katula bima yai awa! Nzo ya Tata na mono beno lenda kumisa yo zandu ve!”

Ntangu balongoki ya Yezu memona mambu yai, bau meyibuka mbikudulu yina ketubila Mwana ya Nzambi nde: “Kikesa sambu na nzo na nge tadya mono.” (NW) Kansi, Bayuda meyufula yandi nde: “Nki kidimbu nge lenda sala sambu na kusonga beto nde nge ke na nswa ya kusala mambu yai]?” Yezu mevutula nde: “Beno fwa [tempelo, NW] yai, ebuna mono ta tunga yo diaka na bilumbu tatu.”

Bayuda keyindula nde Yezu ketubila tempelo ya metungamaka na maboko, mpi yau yina bau keyufula nde: “Na kutunga [tempelo, NW] yai, bo salaka bamvula makumi iya na sambanu, ebuna nge, nge ta tunga yo na bilumbu tatu?” Kansi, Yezu ketubila tempelo ya nitu na yandi. Mpi na nima ya bamvula tatu, balongoki na yandi tayibuka ntubilu na yandi yai ntangu yandi tatelama na kati ya bafwa. Yoane 2:​12-22; Matayo 13:55; Luka 4:⁠23.

▪ Na nima ya nkinsi ya makwela na Kana, na inki bisika Yezu mekwenda?

▪ Sambu na inki Yezu mewa makasi, mpi inki mambu yandi mesala?

▪ Inki mambu balongoki ya Yezu meyibuka ntangu bau kemona mambu ya yandi kesala?

▪ Inki mambu Yezu metuba na yina metala “tempelo yai,” mpi inki yandi kezola kutuba?