Kapu 19

Yandi Kelonga Nkento Mosi ya Musamaria

NA NZILA ntangu ya bau mekatuka na Yudea sambu na kukwenda na Galilea, Yezu ti balongoki na yandi mesabuka na distrike ya Samaria. Ya kulemba sambu na nzyetolo, penepene na ntangu ya midi, bau metelama sambu na kupema na dibulu ya masa penepene na mbanza ya Sikare. Dibulu yai Yakobi kutimunaka yau bamvunkama mingi na ntwala, mpi yau kele kaka tii bubu yai, penepene na mbanza Naplouze ya bubu yai.

Ntangu Yezu kele na kupema awa, balongoki na yandi mekwenda na kati ya mbanza sambu na kusumba madya. Ntangu nkento mosi ya Musamaria mekwisa kubaka masa, yandi melomba nde: “Pesa mono masa ya kunwa.”

Na kutuba ya mbote Bayuda ti bantu ya Samaria kewakanaka ve sambu na bangindu na bau ya ntama ya mekotilaka bau. Ebuna, na ngituka yonso, Nkento yango meyufula yandi nde: “Kansi nge kele Muyuda! Nki mutindu nge ke lomba masa ya kunwa na mono, nkento ya Samaria?”

Yezu mevutula nde: “Kana nge zabaka nani yai ke lomba nge masa ya kunwa, nge muntu zolaka kulomba yandi masa yina, ebuna yandi zolaka kupesa nge masa ya moyo.”

Nkento mevutula nde: “Tata, nge ke na kantini ve; dibulu ya masa mpi kele ya nda. Ebuna nki mutindu nge zolaka kubaka masa yina ya moyo? Nkaka na beto Yakobi bikilaka beto dibulu yai. Yandi mosi vandaka kunwa masa ya dibulu yai; bana na yandi ti bambisi na yandi mpi, bo vandaka kunwa yo. Nge ke banza nde nge me luta Yakobi?”

Yesu metuba nde: “Konso muntu yina ke nwa masa yai, yandi ta vanda diaka na nzala ya masa; kansi muntu yina ta nwa masa ya mono ta pesa yandi, yandi ta vanda na nzala ya masa diaka ve. Sambu masa yina ya mono ta pesa yandi yo ta kituka nto ya masa na kati ya ntima na yandi, yo ta pesaka yandi moyo ya mvula na mvula.”

Nkento mevutula nde: “Tata, pesa mono m[a]sa yina, mpidina mono ta waka diaka nzala ya masa ve, ebuna mono ta vandaka diaka ve na mfunu ya kwisa kubaka diaka masa awa.”

Ntangu yai Yezu metubila yandi nde: “Kwenda kubinga bakala na nge, ebuna beno kwisa vutuka awa.”

Yandi mevutula nde: “Mono ke na bakala ve.”

Yezu mendima ntubilu na yandi. “Nge me tuba mbote nde: ‘Mono ke na bakala ve.’ Sambu nge me vandaka ntete na babakala tanu, ebuna bakala yina ke zinga ti nge ntangu yai, yandi kele bakala na nge ya makwela ve. Mambu ya nge me tubila mono kele ya kieleka.”

Nkento metuba na kuyituka yonso nde: “Tata mono ke mona nde nge kele profete.” Na kumonisaka mpusa na yandi ya kimpeve, yandi ketuba nde: “Bankaka na beto ya Samaria, bo vandaka kusamba Nzambi na zulu ya ngumba yai [Garizimi, yina kele penepene], kansi beno Bayuda, beno ke tubaka nde kisika ya bantu fweti kwenda kusamba Nzambi kele kaka na Yeruzalemi.”

Kansi, Yezu memonisa nde kisika ya kusambila kele ve kima ya mfunu. Yandi ketuba nde: “Ntangu ke kwisa, yo mpi me lungaka; na ntangu yina bantu ya kieleka ta sambaka Tata na [mpeve mpi na kyeleka, sambu, ya kyeleka, Tata kesosaka, NW] bayina ke sambaka yandi na mutindu yina. Nzambi kele Mpeve; bantu yina ke sambaka yandi, bo fweti samba yandi na [mpeve mpi na kyeleka, NW].”

Nkento keyituka mingi mpenza. Yandi ketuba nde: “Mono zaba nde Mesia (zina na yandi mpi Kristo), yandi ta kwisa; kana yandi me kwisa, yandi ta zabisa beto mambu yonso.”

Yezu ketuba nde: “Mono yai ke solula ti nge, mono kele Mesia yango.” Yindula dyambu yai! Nkento yai mekwisa na kati ya midi sambu na kubaka masa, mbala ya nkaka sambu na kubuya kukutana ti bankento ya mbanza yina keyinaka yandi sambu na nkadilu na yandi, mebaka lemvo na mutindu mosi ya kuyituka na Yezu. Yandi metubila yandi pwelele kibeni dyambu ya yandi metubilaka ntete ve ata muntu ya nkaka. Inki yau mebuta?

Bantu ya Samaria Mingi Mekwikila

Ntangu bau mekatuka na Sikare ti madya, balongoki mekuta Yezu na dibulu ya masa ya Yakobi kisika bau bikaka yandi, mpi kisika ya yandi kesolula ntangu yai ti nkento mosi ya Musamaria. Ntangu balongoki mekuma, nkento yango mekwenda, yandi mebikisa dibungu na yandi ya masa, mpi mekwenda na mbanza.

Na mpusa ya mingi sambu na mambu ya Yezu kutubilaka yandi, yandi metubila bantu na mbanza nde: “Beno kwisa kutala muntu mosi me tubila mono mambu yonso ya mono me salaka.” Ebuna, sambu na kuvumbula mpusa, yandi meyufula nde: “Yandi lenda vanda Mesia ve?” Ngyufula melungisa lukanu na yau​—⁠bantu mekwenda kutala bau mosi.

Na ntangu yina, balongoki kebondila Yezu na kudya madya yina ya bau kwisaka ti yau na mbanza. Kansi Yezu mevutula nde: “Mono ke na madia na mono ya beno zaba ve.”

Balongoki keyulana bau na bau nde: “Keti muntu ya nkaka me kwisa kunatila yandi madia?” Yezu metendula nde: “Madia na mono kele yo yai: na kulanda luzolo ya muntu yina tindaka mono ti na kumanisa kisalu yina ya yandi me pesaka mono na kusala. [Keti beno ketubaka ve nde, NW]: ‘Bangonda iya mebika, ntangu ya kukatula bambuma melunga?’ ” Kansi, na kumonisaka kukatula bambuma ya kimpeve, Yezu ketuba nde: “Beno tala mbote bilanga: Bambuma me yela, ntangu me kuma penepene na kukatula yo. Muntu yina ke kwendaka kukatula bambuma, na ntangu yo yina yandi ke bakaka mpi salere na yandi; yandi ke katulaka bambuma sambu na moyo ya mvula na mvula. Mpidina muntu yina ke kunaka ti muntu yina ke katulaka bambuma, bo yonso zole lenda vanda kiese na kimvuka.”

Mbala ya nkaka Yezu lenda kumona na ntwala malanda ya nene ya kukutana na yandi ti nkento ya Musamaria​—⁠nde bantu mingi kekwikila na yandi sambu na disolo ya kimbangi ya nkento yango. Yandi keta kimbangi na bantu ya mbanza, na kutubaka nde: “Yandi me tubila mono mambu yonso ya mono me salaka.” Ebuna, ntangu bantu ya Sikare mekwisa na yandi na dibulu ya masa, bau melomba yandi na kubikala mpi na kutubila bau mambu ya kuluta mingi. Yezu mendima imvitasio mpi mebikala bilumbu zole.

Ntangu bantu ya Samaria kewidikila Yezu, bantu ya nkaka mingi kibeni mekwikila. Ebuna bau metubila nkento yina nde: “Ntangu yai, beto me ndima yandi sambu beto mosi me wa yandi, kansi yo kele ve nde sambu na mambu yina ya nge tubilaka beto. Beto me zaba mpi nde ya kieleka, yandi kele Ngulusi ya bantu yonso.” Ya kyeleka, nkento ya Musamaria mebikisa mbandu mosi ya mbote na mutindu ya beto lenda kuta kimbangi na yina metala Kristu na kuvumbulaka mpusa na mpila nde bawi kusosa kuzaba mambu ya kuluta mingi!

Yibuka nde bangonda iya mebikala na ntwala ya kubuka bambuma​—⁠na ntembe ve, kubukama ya bambuma ya orge, yina kesalamaka na Palestine na nsungi ya printemps. Ebuna, ziku yai kele Novembri to Desembri. Yau ketendula nde na nima ya Paki ya mvu 30 T.B., Yezu ti balongoki na yandi kusalaka kiteso ya bangonda nana na Yudea na kulongaka mpi na kubotikaka. Bau mekatuka ntangu yai sambu na kwenda na bwala na bau na Galilea. Inki kekinga bau kuna? Yoane 4:​3-43.

▪ Sambu na inki nkento ya Musamaria keyituka na mpila Yezu ketubila yandi?

▪ Inki Yezu melonga yandi na yina metala masa ya moyo mpi kisika ya kusambila?

▪ Inki mutindu Yezu mesonga yandi nani yandi kele, sambu na inki nzayikusu yai kele ya kuyitukisa?

▪ Inki kimbangi nkento ya Musamaria meta mpi inki yau mebuta?

▪ Inki mutindu madya ya Yezu kele na kuwakana ti kubukama ya bambuma?

▪ Inki mutindu beto lenda zaba bunda ya kisalu ya Yezu na Yudea na nima ya Paki ya mvu 30 T.B.?