Kapu 21
Yezu na Kati ya Sinagoga ya Bwala na Bau
NAZARETI menikana kibeni ntangu Yezu mevutuka na bwala na bau. Na ntwala yandi kubaka mbotika na Yoane kiteso ya mvula mosi ti ndambu na ntwala, Yezu kuzabanaka bonso nketi ya nti. Kansi ntangu yai yandi mezabana mingi bisika yonso bonso musadi ya bimangu. Bantu ya bwala na yandi kele na mpusa ya kumona yandi kesala bisalu ya kuyitukisa na kati na bau.
Bau kevingila kibeni na mpusa yonso ntangu bau memona Yezu mekota na sinagoga ya bwala na bau, mutindu yau vandaka kikalulu na yandi. Na ntangu ya kisalu, yandi metelema sambu na kutanga, mpi bau mepesa yandi mukanda ya mbikudi Yezaya. Yandi mekangula mukanda na kisika yina ketubila Muntu ya kupakulama na mpeve ya Yehowa, yina kele bubu yai na Biblia na beto na kapu 61.
Na nima ya kutanga inki mutindu Muntu yango tasamuna kimpwanza na bampika, tabelula bifwa-meso, mpi mambu yina metala mvula ya lemvo ya Yehowa, Yezu mevutula kimbundi na nkengi mpi yandi me vanda. Bantu yonso ketala yandi mpenza. Ebuna yandi metuba, ziku na ntangu ya mbote, na kutendulaka nde: “Mambu yai ya bo sonikaka na mukanda ya Nzambi, yo me lunga bubu, awa ya beno me wa yo.” (Beto bantu metengimisa bisono.)
Bantu keyituka sambu na “mambu” na yandi “ya kitoko” mpi ketuba bau na bau nde: “Keti yandi kele mwana ya Yozefi ve?” Kansi sambu yandi kezaba nde bau kezola yandi kusala bimangu, Yezu melanda nde: “Ya kieleka, mono zaba nde beno ke zola kutela mono kingana yai: ‘Munganga, nge mosi kudibelula.’ . . . ‘Mambu yina yonso ya beto waka nde nge salaka yo na bwala Kapernaumi, sala yo mutindu mosi mpi awa na bwala na nge.’ ” Ya kyeleka, bamfinangani ya ntama ya Yezu kezola nde mbelula fwete kuyantika na bwala na yandi, sambu na mambote ya bantu na yandi mosi ntete. Ebuna bau kemona nde Yezu kemona bau mpamba.
Mutindu yandi mezaba mabanza na bau, Yezu meta mwa masolo ya nkenda ya kufwanana. Yandi memonisa nde bafwola kuvandaka mingi na Izraele na ntangu ya Elia, kansi Elia kutindamaka ve ata na mosi na kati na bau. Kansi, yandi kwendaka na fwola mosi ya Sidoni yina kuvandaka ve mwana ya Izraele, kuna yandi salaka kimangu ya kugulusa luzingu. Mpi na bilumbu ya Elisa, bantu ya lepre kuvandaka mingi, kansi Elisa kubelulaka kaka Namani muntu ya Siria.
Na makasi sambu na masolo ya nkenda ya kufwanisa yina kemonisa pwelele bwimi na bau ti kukonda ya lukwikilu, bayina kuvandaka na sinagoga metelama mpi mebasisa Yezu na nganda ya mbanza. Kuna, na lweka ya ngumba yina ya Nazareti metungamaka, bau kemeka kutindika yandi na nsi. Kansi Yezu mesutumuka na maboko na bau mpi yandi metina. Luka 4:16-30; 1 Bantotila 17:8-16; 2 Bantotila 5:8-14.
▪ Sambu na inki Nazareti menikana?
▪ Inki bantu meyindula sambu na disolo ya Yezu, kansi inki mepesa bau makasi?
▪ Inki bantu memeka na kusala Yezu?