Kapu 22

Balongoki Iya Mebingama

NA NIMA ya kusosa kugonda Yezu na mbanza na yandi Nazareti, yandi mekwenda na Kapernaumi penepene na Nzadi ya Galilea. Dyambu yai kelungisa mbikudulu ya nkaka ya Yezaya. Yau kele yina ya kubikulaka nde bantu ya Galilea yina kezingaka penepene na Nzadi tamona nsemo ya ngolo.

Ntangu Yezu kefula kisalu na yandi ya kumwanga nsemo ya Kimfumu awa, yandi memona balongoki na yandi iya. Bayina kwendaka ti yandi ntete kansi bau vutukilaka bisalu na bau ya kuloba ntangu bau katukaka ti Yezu na Yudea. Ziku, Yezu kesosa bau ntangu yai sambu ntangu melunga sambu na yandi na kuvanda na mfunu ya bansadisi ya ntangu yonso, yina yandi lenda kulonga na kufula kisalu na nima ya kukwenda na yandi.

Ebuna ntangu Yezu ke na kutambula na lweka ya nzadi mpi memona Simoni Piere ti banduku na yandi keyobisa babukondi na bau, yandi mekwenda kukuta bau. Yandi mekota na kati ya bwatu ya Piere mpi yandi melomba yandi na kupusa yau na kati ya masa. Ntangu bau mepusana ndambu, Yezu mevanda na kati ya bwatu mpi yandi meyantika kulonga bibuka ya kele na lweka ya nzadi.

Na nima, Yezu metubila Piere nde: “Nata bwatu na kisika yina masa kele mudindu, ebuna beno tula babukondi na beno na masa sambu na kusimba bambisi.”

Piere mevutula nde: “Mfumu beto me sala ngolo mpimpa ya mvimba, beto me simba ata mbisi mosi ve; kansi sambu nge me songa mono, mono ke tula babukondi na masa.”

Ntangu bau medindisa babukondi, bambisi mingi mekangama na mpila nde babukondi meyantika na kupasuka. Nswalu, bantu meyantika kubinga bampangi na bau yina vandaka na bwatu ya mfinama sambu na kwisa kusadisa bau. Na mbala mosi, babwatu yonso zole mefuluka na bambisi mingi mpenza na mpila nde yau meyantika na kudinda. Ntangu yandi memona mpila yina, Simoni mefukama na ntwala ya Yezu mpi metuba nde: “Mfumu kuvanda penepene ti mono ve, sambu mono kele muntu ya masumu.”

Yezu mevutula nde: “Kumona boma ve. Yantika bubu yai, nge ta simbaka bantu [ya moyo, NW].”

Yezu mebingisa mpi Andre mpangi ya Piere nde: “Beno kwisa landa mono.” Yandi mesyamisa bau nde: “Mono ta longa beno na kuloba bantu.” Bankundi na bau balobi Yakobo ti Yoane, bana ya Zebedeo, mebingama mutindu mosi, mpi bau mendima nkatu kudyengisa mbundu. Ebuna bau yonso iya mebikisa kisalu na bau ya kuloba mpi mekuma balongoki ya ntete iya ya Yezu ya vandaka kulanda yandi ntangu yonso. Luka 5:​1-11; Matayo 4:​13-22; Marko 1:​16-20; Yezaya 9:​1, 2.

▪ Sambu na inki Yezu kebinga balongoki na yandi na kulanda yandi, mpi tanga bazina na bau?

▪ Inki Kimangu mepesa Piere boma?

▪ Inki mutindu ya kuloba Yezu mebinga balongoki na yandi na kusala?