Kapu 23

Bimangu ya Nkaka na Kapernaumi

NA KISABATU ya kulanda yina ya Yezu bingaka balongoki na yandi ya ntete​—⁠Piere, Andre, Yakobi, ti Yoane​—⁠bau yonso mekwenda na sinagoga ya Kapernaumi. Kuna Yezu meyantika na kulonga, mpi bantu keyituka sambu yandi kelonga bau bonso muntu yina kele ti kiyeka kansi bonso balongi ya bansiku ve.

Na Kisabatu yai muntu mosi ya mpeve ya mbi kele pana. Na nima ya mwa ntangu, yandi meboka na ndinga ya ngolo nde: “Nge Yezu, muntu ya bwala Nazareti, nki mambu beto ti nge? Nge me kwisa sambu na kufwa beto? Mono zaba nge kele nani: Nge kele muntu ya santu ya Nzambi.”

Mpeve ya mbi ya keyala muntu yai kele mpenza mosi na kati ya bawanzyo ya Satana. Na kunganinaka mpeve ya mbi, Yezu metuba nde: “Vanda pima! Basika na muntu yai!”

Ebuna, mpeve ya mbi mekonisa muntu yango mpi meboka na nsuka ya ngolo ya ndinga na yandi. Kansi yau mebasika na kati ya muntu yango nkatu kusala yandi mbi. Bantu yonso keyituka! Bau keyufula nde: “Nki mambu yai? . . . Yandi ke nganina mpi ata bampeve ya mbi, [na kiyeka yonso, NW], ebuna yo ke wila yandi!” Nsangu ya mambu yai meyalumuka na nzyunga yonso.

Ntangu yandi mekatuka na sinagoga, Yezu ti balongoki na yandi mekwenda na nzo ya Simoni, to Piere. Kuna bokilo ya Piere kebela mpi kele ti fievre ya ngolo. Bau mebondila yandi nde: ‘Pardo sadisa yandi.’ Ebuna Yezu mepusana, mesimba yandi na diboko, mpi metelemisa yandi. Na mbala mosi yandi mebeluka mpi meyantika kulambila bau madya!

Na nima, ya ntangu kudinda, bantu ya kekatuka na bandambu yonso kekwisa na nzo ya Piere ti bantu na bau ya maladi. Na mbala mosi, mbanza yonso mefuluka na kyelo ya nzo! Mpi Yezu kebelula bantu na bau ya maladi yonso, ata maladi ya inki mutindu. Yandi kebasisa nkutu bantu bampeve ya mbi. Ntangu bau kebasika, bampeve ya mbi yina ya yandi kebasisa keboka nde: “Nge kele Mwana-Nzambi!” Kansi Yezu kenganina bau mpi kepesa bau ve nzila ya kutuba sambu bau kezaba nde yandi kele Kristu. Marko 1:​21-34; Luka 4:​31-41; Matayo 8:​14-17.

▪ Inki mambu mesalama na sinagoga na Kisabatu ya kulandaka yina ya Yezu kubingaka balongoki na yandi iya?

▪ Na wapi Yezu mekwenda ntangu yandi mekatuka na sinagoga, mpi inki kimangu yandi mesala kuna?

▪ Inki mesalama na nima, kaka na nkokila yau yina mosi?