Kapu 25

Mawa Sambu na Muntu ya Lepre

NTANGU Yezu ti balongoki na yandi ketambula na bambanza ya Galilea, nsangu yina metala mambu ya kuyituka ya yandi kesala meyalumuka na distrike ya mvimba. Nsangu ya bisalu na yandi mekuma na mbanza mosi kisika kele ti muntu mosi ya kebela maladi ya lepre. Munganga Luka ketubila muntu ya maladi yina nde yandi vandaka “lepre me fuluka na nitu yonso.” Kana yau mekuma mingi, maladi yai kezengaka malembemalembe bitini ya nitu. Ebuna muntu ya lepre yai kele na nkadilu ya mawa mpenza.

Ntangu Yezu mekuma na mbanza, muntu ya lepre mepusana na yandi. Na kutadila Nsiku ya Nzambi, muntu ya lepre fwete kubokaka nde: “Mvindu, Mvindu!” sambu na kutanina bankaka na kupusana ve na yandi mpi sambu na kigonsa ya nsambukila. Ntangu yai, muntu ya lepre mefukama na ntwala na yandi mpi mebondila Yezu nde: “Mfumu, kana nge zola, nge lenda [kugedisa mono, NW].”

Lukwikilu ya inki mutindu muntu yai kele na yau na Yezu! Kansi, na kutala yandi, mawa ya inki mutindu bantu fwete kuwila yandi! Inki Yezu tasala? Inki nge lendaka kusala? Na mawa yonso, Yezu metandula diboko na yandi mpi mesimba muntu yango, na kutubaka nde: “Mono me zola, [gedisama, NW].” Mpi na mbala mosi lepre memana yandi.

Keti nge tazola muntu ya mawa ya mutindu yai kuvanda ntotila na nge? Mutindu Yezu mesadisa muntu ya lepre yai kendimisa beto nde na Kimfumu na yandi, mbikudulu yai ya Biblia talungana: “Yandi tawila bantu ya kudikulumusa ti bansukami mawa, mpi yandi tagulusa myoyo ya bansukami.” Ee, na ntangu yina Yezu talungisa nsatu ya ntima na yandi sambu na kusadisa bantu yonso ya kele na mpasi.

Nkutu ata na ntwala ya kubelula muntu ya lepre, kisalu ya Yezu vandaka kuyangidika bantu mingi. Na ndungisa ya mbikudulu ya Yezaya, Yezu ketubila ntangu yai muntu ya mebeluka nde: “Kutuba mambu yai ata na muntu mosi ve.” Na nima yandi metuma yandi nde: “Kwenda kudisonga na nganga-Nzambi, ebuna pesa makabu mutindu Moize songaka, sambu na kusonga na bantu yonso nde nge [megedisama, NW].”

Kansi muntu yango kele na kyese mingi kibeni na mpila nde yandi kekuka ve na kubumba kimangu yina sambu na yandi mosi. Yandi mekwenda mpi meyantika kuyalumuna nsangu bisika yonso, ngatu na kubendaka dikebi ti mpusa ya bantu na mpila nde Yezu lenda kukwenda ve na mpenza na kati ya mbanza. Yau yina, Yezu mebikala na kisika ya kugambuka kuna ata muntu mosi ve kezingaka, mpi bantu kekatuka na bandambu yonso sambu na kuwidikila yandi mpi na kubeluka na maladi na bau. Luka 5:​12-16; Marko 1:​40-45; Matayo 8:​2-4; Levi 13:​45, NW; Levi 14:​10-13; Nkunga 72:​13, NW; Yezaya 42:​1, 2.

▪ Maladi ya lepre lenda kusala inki, mpi inki lukebisu vandaka kulombama nde muntu ya lepre kupesa?

▪ Inki mutindu muntu ya lepre melomba lusadisu na Yezu, mpi inki dilongi beto lenda kubaka na mvutu ya Yezu?

▪ Inki mutindu muntu yina mebeluka melemfukila ve Yezu, mpi inki malanda yau menata?