Kapu 26

Yandi Mevutuka na Kapernaumi

NTANGU yai nsangu ya Yezu meyalumuka mingi mpi na insi yonso, mpi bantu mingi kekwenda na bisika ya ntama mpenza yina yandi kele. Kansi, na nima ya mwa bilumbu, yandi mevutuka na Kapernaumi na kulutilaka na Nzadi ya Galilea. Nswalu, nsangu meyalumuka na mbanza nde yandi mevutuka na bwala yina, mpi bantu mingi kekwisa na nzo ya yandi kele. Bafarize ti balongi ya Bansiku mekwisa, bau mekatuka na kisika ya ntama bonso na Yeruzalemi.

Kibuka kele ya nene mpenza na mpila nde bau mekanga kyelo, mpi kisika kele ve na inzo sambu nde muntu ya nkaka kukota na kati. Dyambu mosi ya kuyituka mpenza kesalama na nkadilu yai. Dyambu ya kesalama na okazyo yai kele na mfunu ya mingi, sambu yau kesadisa beto na kundima nde Yezu kele ti kiyeka ya kukatula kikuma ya bampasi mpi kuvutula mavimpi ya mbote na bantu yonso yina yandi kesola.

Ntangu Yezu kelonga kibuka, bantu iya menata na inzo yango muntu mosi ya kikata na zulu ya mbeto. Bau kezola nde Yezu kubelula nduku na bau, kansi sambu na kibuka, bau lenda ve kukota na kati. Mawa ya inki mutindu! Kansi bau melemba ve. Bau memata na zulu ya inzo, metobula dibulu na zulu na yau, mpi mekulumusa mbeto ti kikata na zulu na yau na ntwala ya Yezu.

Keti Yezu mewa makasi sambu na kuyangisa yina? Ata fyoti ve! Kansi, yandi meyituka mingi sambu na lukwikilu na bau. Yandi metubila kikata nde: “Masumu na nge melolulama.” (NW) Kansi, keti ya kyeleka Yezu lenda kulolula masumu? Balongi ya Bansiku ti Bafarize kendima ve. Ebuna bau keyindula na bantima na bau nde: “Nki mutindu muntu yai lenda tuba mpidina? Yandi ke vwenza Nzambi. Nani lenda lolula muntu ya masumu? Kaka Nzambi yandi mosi!”

Sambu yandi mezaba mabanza na bau, Yezu metubila bau nde: “Sambu na nki beno ke yindula mpidina na ntima na beno? Na mambu yai zole, nki kele mpasi na kutubila kikata: ‘[Masumu na nge melolulama, NW]’ to ‘Telama, baka mbeto na nge, kwenda ka nge’?”

Ntangu yai, Yezu mepesa nzila na kibuka, ti na batongi na yandi, na kumona nsonga yina tamonisa nde yandi kele na kiyeka ya kulolula masumu ya ntoto mpi nde yandi kele mpenza muntu ya kuluta nene ya ntangu yonso. Yandi mebaluka na kikata mpi metuma nde: “Telama ka nge, baka mbeto na nge, ebuna vutuka na nzo na nge!” Mpi yandi mesala yau na mbala mosi, yandi mebasika na nganda ti mbeto na yandi na ntwala na bau yonso! Na kuyituka yonso bantu mekumisa Nzambi mpi ketuba nde: “Beto me monaka ntete ve mambu ya mutindu yai”!

Keti nge mesimba nde Yezu mekwedisa masumu kumosi ti kimbefo mpi nde kulolulama ya masumu kele na kuwakana ti kubaka mavimpi ya kinsuni? Biblia ketendula nde kibuti na beto ya ntete, Adami, kusumukaka mpi nde beto yonso mebakaka malanda ya disumu yina, mingimingi, maladi ti lufwa. Kansi na luyalu ya Kimfumu ya Nzambi, Yezu talolula masumu ya bayina yonso kezolaka Nzambi mpi kesadilaka Yandi, mpi na nima maladi yonso takatulama. Yau tavanda mbote mpenza! Marko 2:​1-12; Luka 5:​17-26; Matayo 9:​1-8; Roma 5:​12, 17-19.

▪ Dyambu yai ya kuyitukisa mpenza kusalamaka na inki mvwandilu?

▪ Inki mutindu kikata kukumaka na Yezu?

▪ Sambu na inki beto yonso kele bantu ya masumu, kansi inki mutindu Yezu mepesa beto kivuvu nde kulolulama ya masumu na beto ti mavimpi ya mbote tavanda?