Kapu 28

Ngyufula Yina Metala Kubuya Madya

KITESO ya mvula mosi meluta kubanda Yezu kuvandaka na Paki ya mvu 30 T.B. Ntangu yai, Yoane Mbotiki kele na boloko bangonda mingi meluta. Ata yandi zolaka nde balongoki na yandi kukuma balongoki ya Yezu, bau yonso ve mekuma yau.

Ntangu yai, ndambu na kati ya balongoki yai ya Yoane yina kele na boloko mekwisa na Yezu mpi Meyufula nde: “Beto ti Bafarize beto ke buyaka kudia . . . Kansi balongoki na nge, sambu na nki bo ke buyaka kudia . . . ve?” Bafarize kebuyaka madya mbala zole na mposo sambu yau kele kikalulu ya lusambu na bau. Mpi mbala ya nkaka balongoki ya Yoane kelandaka kikalulu ya mutindu mosi. Yau lenda kuvanda mpi nde bau kebuya madya sambu na mawa ya kukangama ya Yoane na boloko mpi bau kekudiyufula sambu na inki balongoki ya Yezu kevukana ti bau ve na kumonisa mawa yina.

Na kuvutula mvutu Yezu metendula nde: “Beno ke banza nde banduku ya muntu yina ke kwela, bo lenda vanda na mawa ntangu muntu yina kele ti bo? Ve, kansi kilumbu kele ya bo ta katula muntu yina na kati na bo, ebuna na kilumbu yina bo ta buya kudia.”

Balongoki ya Yoane fwete kuyibuka nde Yoane yandi mosi kutubilaka Yezu bonso Bakala yina kekwela. Ebuna ntangu Yezu kele, Yoane lenda ve kumona nde yau kele mbote na kubuya kudya, mpi ata balongoki ya Yezu lenda ve kusala yau. Na nima, Ntangu Yezu tafwa, balongoki na yandi tadila mpi tabuya madya. Kansi ntangu yandi tafutumuka mpi tamata na zulu, bau tavanda ve ata ti kikuma ya nkaka ya kuwila mawa sambu na kubuyaka madya.

Na nima, Yezu mepesa bingana yai: “Muntu lenda bamba lele ya ntama na kitende ya lele ya mpa ve. Sambu kitende yina ta pasula lele yina ya ntama, ebuna munoko taluta mutindu yo vandaka ntete na nene. Muntu mpi ve lenda tula vinu ya mpa na mabungu ya ntama ya mukanda ya mbisi. Kana yandi sala mpidina, mabungu ta pasuka, vinu ta losana, mabungu ta fwa. Kansi bo ke tulaka vinu ya mpa na mabungu ya mpa.” Inki kuwakana kele na kati ya bingana yai ti kubuya kudya?

Yezu vandaka kusadisa balongoki ya Yoane Mbotiki na kubakisa nde ata muntu mosi ve lenda kutula kivuvu nde balandi na yandi kulanda bikalulu ya ntama ya dibundu ya Bayuda, mu mbandu, kikalulu ya kubuya kudya. Yandi kwisaka ve na kubamba to kulanda bangidika ya nkulu ya lusambu yina vandaka penepene na kuyambulama. Bukristu lendaka kusalama ve na kulandaka lusambu ya Bayuda ya ntangu yina ti bansiku na yau ya bambuta ya bantu. Ve, yau lendaka ve kuvanda bonso kitende ya lele ya mpa na zulu ya lele ya ntama to bonso vinu ya mpa na kati ya dibungu ya mukanda ya mbisi ya nkulu. Matayo 9:​14-17; Marko 2:​18-22; Luka 5:​33-39; Yoane 3:​27-29.

▪ Banani kebuyaka madya, mpi sambu na inki lukanu?

▪ Sambu na inki balongoki ya Yezu kebuya madya ve na ntangu yandi kele ti bau, mpi na nima inki mutindu kikuma ya kubuyila madya tavila nswala?

▪ Inki bingana Yezu meta, mpi yau ketendula inki?