Kapu 38

Keti Yoane Kukondaka Lukwikilu?

YOANE Mbotiki, yina kele na boloko tuka mvula mosi ntangu yai, mewa nsangu yina metala lufutumuku ya mwana ya bakala ya fwola mosi na Naini. Kansi yandi kezola kuwa mbala mosi na Yezu ntendula ya kimangu yina; yau yina yandi metinda balongoki na yandi zole sambu na kuyufula nde: “Keti nge kele muntu yina fweti kwisa to beto fweti vingila muntu ya nkaka?”

Ngufula lenda kumonana bonso yau kele na sansa ve, mingimingi sambu Yoane kumonaka mpeve ya Nzambi mekulumuka na zulu ya Yezu mpi kuwaka ndinga ya Nzambi ya kundima ntangu yandi vandaka kubotika Yezu kiteso ya bamvula zole na ntwala. Ngyufula ya Yoane lenda kunata bantu ya nkaka na kusukisa nde lukwikilu na yandi melemba. Kansi yau kele mpila yina ve. Yezu lendaka ve kutubila mambu mingi ya mbote sambu na Yoane, bonso yandi tasala yau na okazyo yai, kana Yoane kuyantikaka na kubefula. Ebuna, sambu na inki Yoane meyula ngyufula yai?

Yoane lenda kusosa kuvanda kaka na mfunu ya nzikisa yina takatuka na Yezu nde Yandi kele Mesia. Dyambu yai lenda kuvanda nsyamisa ya ngolo sambu na yandi ntangu yandi kele na kumona mpasi na boloko. Kansi yau kemonana nde bikuma ya nkaka mingi ya kuyufudila ngyufula yai kele. Na ntembe ve, yandi kezola kuzaba kana muntu ya nkaka takwisa, bonso kilandi, yina tamanisa ndungisa ya mambu yonso yina kutubamaka na ntwala nde Mesia fwete kulungisa.

Na kutadila bambikudulu ya Biblia ya Yoane meyikanaka na yau, Mupakulami ya Nzambi fwete kuvanda mfumu, ngulusi. Kansi, Yoane kele kaka na boloko, ata nkutu bangonda mingi meluta na nima ya mbotika ya Yezu. Yau yina, na ntembe ve Yoane keyufula Yezu nde: ‘Keti nge kele mpenza muntu yina tatula Kimfumu ya Nzambi na ngolo ya kemonana, to beto fwete kuvingila muntu ya nkaka, kilandi, yina talungisa bambikudulu ya kitoko yonso yina ketadila nkembo ya Mesia?’

Na kisika ya kupesa balongoki ya Yoane mvutu nde: ‘Ya kyeleka mono kele yina ya fwete kukwisa!’ Yezu mesala na ntangu yango yina bansonga ya nene na kubelulaka bantu mingi ya maladi ti ya bifu ya mitindu yonso. Na nima yandi metuma balongoki nde: “Beno kwenda kuzabisa Yoane mambu yai ya beno me mona ti ya beno me wa: Bantu ya kufwa-meso ke mona diaka, bantu ke na makulu ya kifu ke tambula, bantu ke na maladi ya lepre ke beluka, bantu ya kufwa-makutu ke wa, bantu yina me fwa ke telama na lufwa, bansukami ke wa Nsangu ya mbote.”

Na bangogo ya nkaka, ngyufula ya Yoane lenda kuvanda ti kivuvu nde Yezu kusala mambu ya kuluta yina ya yandi kesala, mpi mbala ya nkaka kubasisa yandi mosi Yoane na boloko. Kansi, Yezu ketubila Yoane na kutula ve kivuvu na bimangu ya mingi kuluta yai ya Yezu kesala.

Ntangu balongoki ya Yoane mekwenda, Yezu mebaluka na bibuka mpi metubila bau nde Yoane kele “kinati-nsangu” ya Yehowa kutubilaka na ntwala na Malashi 3:1 (NW) mpi yandi kele dyaka yina ya mbikudi Elia kutubilaka na ntwala na Malashi 4:​5, 6. Yau yina, yandi mekumisa Yoane nde yandi kele kiteso mosi ti bambikudi ya nkaka yonso yina kuzingaka na ntwala na yandi, na kutendulaka nde: “Mono ke tubila beno mambu ya kieleka: Na kati ya bantu yonso me butukaka awa na nsi-ntoto, ata muntu mosi ve me luta Yoane-Batiste. Kansi muntu yina kele ya [kuluta fyoti, NW] na kati ya bantu yonso na Kimfumu ya Nzambi yandi me luta Yoane-Batiste na [nene, NW]. Katuka ntangu ya Yoane-Batiste vandaka kulonga tii ntangu yai, [kimfumu ya mazulu kele lukanu ya bantu kenwanina ti ngolo, NW].”

Awa Yezu kemonisa nde Yoane tavanda ve na Kimfumu ya zulu, sambu muntu yina kele ya kuluta fyoti kuna meluta Yoane na nene. Yoane kuyidikaka nzila sambu na Yezu kansi yandi kufwaka na ntwala Kristu kusala ngwakana ti balongoki na yandi, sambu bau kuyala ti yandi na Kimfumu na yandi. Yau yina Yezu ketuba nde Yoane tavanda ve na Kimfumu ya zulu. Kansi, Yoane tavanda muntu yina tayalama awa na zulu ya ntoto na Kimfumu ya Nzambi. Luka 7:​18-30; Matayo 11:​2-15.

▪ Sambu na inki Yoane meyufula kana Yezu kele Muntu yina fwete Kukwisa to bau fwete kutula kivuvu na muntu ya nkaka ya kuswaswana?

▪ Inki bambikudulu yina Yezu metuba nde Yoane kulungisaka?

▪ Sambu na inki Yoane Mbotiki tavanda ve na zulu ti Yezu?