Kapu 40

Dilongi ya Kufwila Nkenda

MBALA ya nkaka Yezu kele kaka na Naini, kisika yandi mekatuka kufutumuna mwana ya bakala ya fwola mosi, to mbala ya nkaka yandi mekwenda kutala mbanza mosi ya penepene. Mufarize mosi na zina ya Simoni kezola kumona na penepene muntu yina kesala bisalu ya kuyituka ya mutindu yina. Ebuna yandi mebingisa Yezu na kudya ti yandi.

Na kumonaka okazyo yango bonso dibaku sambu na kulonga bantu yina tavanda pana, Yezu mendima imvitasio, mutindu yandi ndimaka ba imvitasio ya kudya ti bakalaki ya mpaku ti bantu ya masumu. Kansi, ntangu yandi mekota na nzo ya Simoni, bau meyamba ve Yezu ti luzitu ya bau keyambilaka banzenza konso mbala.

Kana muntu metambula mingi na banzila ya putulu sandale kekumaka tiya mpi mvindu, ye yau kele kidimbu ya bau keyambaka bantu na kuyobisaka makulu ya banzenza ti masa ya madidi. Kansi makulu ya Yezu meyobisama ve ntangu yandi mekuma. Ata muntu mosi mpi ve mepesa yandi beze ya kuzodila yandi kukwisa ya mbote yina kele kidimbu ya luzitu ya meyalumukaka. Mpi bau mepakula yandi ve mafuta na nsuki mutindu bau kesalaka sambu na kuyamba banzenza.

Na ntangu ya madya, ntangu banzenza kele ya kutandama na mesa, nkento mosi ya kubingamaka ve mekota na nzo na malembe yonso. Na mbanza, yandi mezabanaka nde yandi kevandaka ti luzingu ya mansoni. Ntembe kele ve nde yandi mewaka malongi ya Yezu, ti imvitasio na yandi yina ketuba nde: ‘bayina yonso kele na kilo bo kwisa na yandi sambu na kupema.’ Mpi mutindu mambu ya yandi waka mpi monaka kusimbaka mpenza ntima na yandi, yandi kesosa Yezu tii ntangu yai.

Nkento yango mekwenda na nima ya Yezu na mesa mpi mefukama na makulu na yandi. Ntangu mansanga na yandi kebwa na makulu ya Yezu, yandi kedipa yau ti nsuki na yandi. Yandi mebaka mpi mafuta ya mananasi na mulangi na yandi, ntangu yandi keyamba makulu ya Yezu na nkenda yonso yandi kelosila yau mananasi. Simoni memona yau mbi. Yandi kekuditubila na nsi ya ntima nde: “Kana ya kieleka muntu yai vandaka profete, yandi zolaka kuzaba kana nkento yai ke simba yandi kele nani, mpi nde nkento yai kele nki mutindu; yandi zolaka kuzaba nde yandi ke salaka kindumba.”

Na kubakisaka mabanza na yandi, Yezu metuba nde: “Simoni, mono ke na mambu ya kutubila nge.”

Yandi mevutula nde: “Longi, tuba!”

Yezu meyantika nde: “Kuvandaka na bantu zole, bo vandaka na mfuka ya muntu mosi yina ke defisaka bantu mbongo. Muntu ya ntete defaka [badenali, NW] nkama tanu. Ya zole defaka [badenali, NW] makumi tanu. Bo vandaka na mbongo ve ya kufuta mfuka yina. Yo yina, muntu yina defisaka bo mbongo yandi katulaka bo yonso zole mfuka yina. Na kati ya bantu yai zole, nani ta luta kuzola yandi?”

Simoni metuba mbala ya nkaka ti kiseku, na kuyindulaka nde ngyufula yango ketadila yandi ve nde: “Mono banza nde muntu ta zola yandi mingi kele muntu yina defaka mbongo mingi.”

Yezu metuba nde: “Nge me tuba mbote.” Ebuna ntangu yandi mebaluka na nkento yango yandi metubila Simoni nde: “Nge me mona nkento yai? Mono me kota na nzo na nge, ebuna nge me pesa mono masa ve sambu na kusukula makulu na mono. Kansi nkento yai me yobisa makulu na mono na mansanga na yandi, ebuna yandi me dipa yo na nsuki na yandi. Nge me pesa mono beze ve. Kansi yandi, katuka ntangu mono me kwisa kukota, yandi ke pesa kaka makulu na mono beze. Nge me tula mono ve mafuta na ntu. Kansi nkento yai me tula mono mananasi na makulu.”

Mpila yina, nkento yango memonisa nde yandi mebalula ntima na yandi sambu na mansoni na yandi ya ntama. Yau yina Yezu mesukisa, na kutubaka nde: “Mono ke tubila nge nde kuzola yina ya nene ya yandi me songa yo ke songa nde Nzambi me lolula yandi, ata yandi salaka masumu mingi. Kansi muntu yina salaka masumu mingi ve, kana Nzambi kulolula yandi, muntu yina ta songa kuzola mingi mpi ve.”

Yezu kendima ve to kepesa ve nzila na mansoni ata fyoti. Kansi, dyambu yai kemonisa mbakisa na yandi ya mawa sambu na bantu yina kesalaka masumu na luzingu, kansi kemonisaka na nima nde bau kebokuta sambu na mambu yina mpi mpila yina, bau kekwisa na Kristu sambu na ndembikilu. Na kupesaka ndembikilu ya kyeleka na nkento yango, Yezu ketuba nde: “Nzambi me lolula nge. . . . Lukwikilu na nge me gulusa nge; kwenda mbote.” Luka 7:​36-50; Matayo 11:​28-30.

▪ Inki mutindu Simoni meyamba nzenza na yandi Yezu?

▪ Nani kesosa Yezu, mpi sambu na inki?

▪ Inki kingana Yezu mepesa, mpi inki mutindu yandi mesadila yau?