Kapu 45

Muntu ya Bau Kutudilaka Ngindu Ve Mekuma Longoki

KIMA ya kupesa boma ya inki mutindu kevingila Yezu na ntangu yandi kebasika na bwatu! Bantu zole ya kilau ya ngolo mebasika na mazyamu ya mfinama mpi mebaka ntinu kuna ya yandi kele. Bau kele ti bampeve ya mbi. Ngatu, sambu mosi na kati na bau kemonana nde yandi meluta ya nkaka na ngolo mpi menyokwamaka ntangu mingi na lutwadisu ya mpeve ya mbi, yandi mebenda dikebi ya bantu mingi.

Ntangu mingi kibeni muntu yai ya mawa vandaka kuzinga kinkonga na kati ya bamazyamu. Konso ntangu, mwini ti mpimpa, yandi kebokaka mpi kekudilwadisaka ti matadi. Yandi ke ngolo kibeni na mpila nde ata muntu mosi ve kele ti kikesa ya kuluta na nzila yina. Bau memekaka mbala mingi na kukangisa yandi, yandi kezengaka bansinga mpi kekatulaka bibende na makulu na yandi. Ata muntu mosi ve kele ti ngolo ya kulemfusa yandi.

Ntangu muntu yango mepusana na Yezu mpi mebwa na makulu na yandi, bampeve ya mbi ya keyala yandi mebokisa yandi nde: “Nge Yezu, Mwana ya Nzambi [Nkwa-ngolo yonso, NW], nki mambu nge ti mono? Pardo, mono ke bondila nge na zina ya Nzambi, kumonisa mono mpasi ve.”

Yezu metuba nde: “Mpeve ya mbi, basika na muntu yai!” Kansi na nima, Yezu meyufula nde: “Zina na nge nani?”

Mvutu kele nde “Zina na mono ‘Ndonga ya nene’ sambu beto kele mingi.” Bampeve ya mbi kele na kyese na kumona mpasi ya bantu yina bau kekuka na kukanga, yau kemonana nde bau kewaka kyese na kukota mingi na kati ya muntu mosi. Kansi, na ntwala ya Yezu, bau mebondila nde bau kulosama ve na dibulu ya nda. Beto kemona dyaka nde Yezu kuvandaka ti ngolo ya nene; yandi vandaka kukuka na kununga ata nkutu bampeve ya mbi ya nku. Dyambu yai kemonisa mpi nde bampeve ya mbi kezabaka nde nkanu ya nsuka ya Nzambi mebumbilaka bau kele ya kulosama na kati ya dibulu ya nda, kumosi ti mfumu na bau, Satana Dyabulu.

Kibuka ya bangulu kiteso ya 2000 kele na kudya mfinama na ngumba. Ebuna, bademo ketuba nde: “Tinda beto, beto kwenda kukota na bangulu yina.” Yau kemonanaka nde bampeve ya mbi kewaka kyese ya mbi na kukota na kati ya nitu ya bigangwa ya kinsuni. Ntangu Yezu mepesa bau nswa ya kukota na kati ya bangulu, bambisi yonso 2000 metekita na boma mpi mekulumuka na ngumba ye mekudidindisa na kati ya Nzadi.

Ntangu bantu yina kesungiminaka bangulu memona mambu yai, bau mebaka ntinu sambu na kwenda kuta nsangu yango na kati ya mbanza mpi na babwala. Ntangu bau mewa mpila yina, bantu kebasika sambu na kwenda kumona mambu yina meluta. Ntangu bau mekuma, bau memona muntu yina bampeve ya mbi kubasikaka. Na ngituka ya bau yonso, yandi kele ti bilele mpi na mabanza ya mbote, ya kuvanda na makulu ya Yezu!

Bantu ya kumonaka mambu yai na meso na bau keta inki mutindu muntu yango kubelukaka. Bau ketubila mpi bantu mambu yina metala lufwa ya kuyituka ya bangulu. Ntangu bantu kewa mambu yai, boma ya mingi mesimba bau, mpi bau melomba na Yezu na kukatuka na mbala mosi na teritware na bau. Na yau, yandi mendima mpi yandi mekota na bwatu. Muntu yina kuvandaka ntete ti bampeve ya mbi kedodokila Yezu nde yandi kupesa yandi nswa ya kukwenda ti yandi. Kansi Yezu metubila yandi nde: “Vutuka na nzo na nge ti na bampangi na nge. Zabisa bo mambu yonso ya Mfumu Nzambi me sala nge, ti nki mutindu yandi me wila nge mawa.”

Yezu ketumaka ntangu yonso bayina ya yandi kebelulaka na kukonda kuta na konso muntu yina, sambu yandi kezola ve nde bantu kusala bansukilu na lufulu ya mambu ya bau meta na mawi ya mingi. Kansi, luswaswanu sambu na muntu yai mefwana sambu muntu yai ya kuvandaka ntete ti bampeve ya mbi tataka kimbangi na kati ya bantu yina ya Yezu, mbala ya nkaka, tavanda dyaka ve ti dibaku ya kukutana ti bau. Kuluta dyaka, kumonana ya muntu yango tapesa kimbangi na yina metala ngolo ya Yezu ya bisalu ya mbote, na kubwisaka konso disolo yina ya mbi ya lenda kuyalumuka na yina metala dyambu ya kuvila ya bangulu.

Na kulandaka ntuma ya Yezu, muntu ya kuvandaka ntete ti bampeve ya mbi mevutuka. Yandi meyantika na kusamuna mambu yonso ya Yezu kusadilaka yandi na Dekapoli ya mvimba, mpi bantu keyituka kaka. Matayo 8:​28-34; Marko 5:​1-20; Luka 8:​26-39; Kusonga 20:​1-3.

▪ Ata bantu ya bampeve ya mbi kele zole, sambu na inki dikebi ya ngolo metulama kaka na muntu mosi?

▪ Inki kesonga nde bampeve ya mbi kezabaka nde bau talosama na dibulu ya nda?

▪ Yau kemonana nde sambu na inki kikuma, bampeve ya mbi kezolaka kukota na kati ya bantu ti bambisi?

▪ Sambu na inki Yezu mesala luswaswanu sambu na muntu yina kuvandaka ntete ti bampeve ya mbi, na kutumaka yandi na kwenda kutubila bantu ya nkaka mambu ya Yandi kusadilaka yandi?