Kapu 46

Nkento Mosi Kusimbaka Lele na Yandi

NSANGU ya kukatuka ya Yezu na Dekapoli mekuma na Kapernaumi, mpi kibuka ya nene mevukana na lweka ya masa sambu na kuzodila yandi kuvutuka ya mbote. Na ntembe ve, bau kuwaka nde yandi kulembikaka mupepe ya ngolo mpi yandi kubelulaka bantu yina kuvandaka ti bampeve ya mbi. Sesepi yai, ntangu yandi mabasika na bwatu, bau yonso mezyunga yandi, ti mpusa mpi kivuvu.

Mosi na kati ya bantu yina kele na mpusa ya ngolo ya kumona Yezu kele Yairusi, ntwadisi ya sinagoga. Yandi mebwa na makulu ya Yezu mpi medodokila Yezu mbala mingi nde: “Mwana na mono ya nkento kele pene-pene na kufwa. Pardo, kwisa kutula yandi maboko sambu yandi kubeluka, yandi kuvanda na moyo.” Sambu yandi kele mwana na yandi mosi kaka mpi yandi kele kaka na bamvula 12, yandi kele kibeni mfunu mingi na meso ya Yairusi.

Yezu mendima mpi, kumosi ti kibuka, yandi mekwenda na nzo ya Yairusi. Beto lenda kuyindula mpusa ya bantu ntangu bau keyindula kimangu ya nkaka. Kansi, dikebi ya nkento mosi na kati ya kibuka kele na bunene ya dikambu na yandi mosi.

Nkento yai kebelaka nkubu bamvula 12 melunga. Yandi mekwendaka na minganga ya mutindu na mutindu, memanisaka mbongo na yandi yonso sambu na bankisi. Kansi yandi mebakaka ve lusadisu; nkutu, maladi na yandi mekumaka kuluta ngolo.

Ngatu, mutindu nge lenda kubakisa yau, katula kulembisa yandi mingi, maladi na yandi kenataka mpi nsoni ti luvwezo. Na kutuba ya mbote, muntu ketubilaka ve maladi ya mutindu yina na meso ya bantu. Dyaka, na Nsiku ya Moize, nkento kevandaka ya kukonda kugedila kana menga kebasika yandi, mpi konso muntu yina kesimba yandi to bilele na yandi ya menga, fwete kuyobila mpi kuvanda ya kukonda kugedila tii na nkokila.

Nkento yango mewaka nsangu ya bimangu ya Yezu mpi ntangu yai yandi memona yandi. Sambu na kukonda kugedila na yandi, yandi mekota na kati ya bantu na kinsweki yonso kibeni, na kuditubilaka na nsi ya ntima nde: “Kana mono simba yandi ata na lele na yandi, mono ta beluka.” Ntangu yandi mesala mpila yina, na mbala mosi yandi mekudiwa nde nkubu na yandi mekangama!

“Nani me simba mono?” Mpasi ya inki mutindu yandi fwete kuwa sambu na bangogo yina ya Yezu! Inki mutindu yandi lendaka kuzaba? Piere kebuya nde: ‘Mfumu, bantu mingi ke ziunga-ziunga nge, bo ke pusa-pusa nge ndambu yonso. Ebuna nge ke tuba diaka nde: “Nani me simba mono?” ’

Na kusosaka nkento yango na nzyunga, Yezu ketendula nde: “Muntu me simba mono; sambu mono me wa ndambu ya ngolo me basika na nitu na mono.” Ya kyeleka, yau kele ve kusimba ya mpamba, sambu kubeluka ya yau menata kukatukaka na ngolo ya Yezu.

Na kumonaka nde yandi mezabana, nkento yango mekwisa mpi mebwa na makulu ya Yezu, na kuwaka boma mpi na kutekitaka. Na meso ya bantu yonso, yandi meta masonga yonso ya maladi na yandi mpi mutindu yandi mekatuka kubeluka.

Ya kupusama na mfunguna na yandi, Yezu mesyamisa yandi na mawa yonso nde: “Mama yai, lukwikilu na nge me belula nge. Kwenda mbote. Maladi yai nge ta bela yo diaka ve.” Kyese ya inki mutindu na kuzaba nde Muntu yina ya Nzambi meponaka sambu na kuyala ntoto kele muntu mosi ya tiyatiya, ya kufuluka na nkenda, ya kesungiminaka bantu mpi ya kele na ngolo ya kusadisa bau! Matayo 9:​18-22; Marko 5:​21-34; Luka 8:​40-48; Levi 15:​25-27.

▪ Yairusi kele nani, mpi sambu na inki yandi mekwisa na Yezu?

▪ Inki dikambu nkento mosi kele na yau, mpi sambu na inki kukwisa na yandi na Yezu sambu na kusosa lusadisu kele mpasi kibeni?

▪ Inki mutindu nkento yango mebeluka, mpi inki mutindu Yezu mesyamisa yandi?