Kapu 47

Mansanga Mebaluka Kyese ya Mingi

NTANGU Yairusi memona nkento ya kuvandaka ti maladi ya nkubu mebeluka, na ntembe ve, yandi meyedisa kutula ntima na ngolo ya bimangu ya Yezu. Na luyantiku ya kilumbu yango, Yairusi kulombaka Yezu na kwenda kusadisa mwana na yandi ya nkento ya zolwa ya bamvula 12, yina kelakana. Kansi, ntangu yai, kima ya Yairusi kebanga kuluta mingi mesalama. Ntangu Yezu kele kaka na kutuba ti nkento yango, bantu ya nkaka mekuma mpi metubila Yairusi na kinsweki nde: “Mwana na nge me fwa. Nki mfunu ya kuyangisa diaka Longi?”

Mpasi ya inki mutindu nsangu yango kepesa! Yindula fyoti: Muntu yai ya bau kezitisaka mingi na kati ya kimvuka ya bantu, mesuka kibeni mayele ntangu yandi mezaba nde mwana na yandi ya nkento mefwa. Kansi, Yezu mewa disolo yango. Na yau, na kubalukaka na Yairusi, yandi metuba na nsyamisa yonso nde: “Kuwa boma ve; tula kaka ntima na mono.”

Na nima, Yezu mekwenda ti muntu yai ya kele ti ntantu mingi na nzo na yandi. Ntangu bau mekuma, bau mekuta bantu na bidilu ya mingi mpi na ntantu. Kibuka ya bantu mevukana, mpi bau kemona mpasi mingi na ntima. Ntangu Yezu mekota na kati ya nzo, yandi meyufula nde: “Sambu na nki beno ke tula makelele? Sambu na nki beno ke dila? Mwana me fwa ve, kansi yandi me lala mpongi.”

Na ntangu bau mewa mpila yai, bantu meyantika na kuseka Yezu ti luvwezo kibeni sambu bau kezaba nde mwana-nkento kele mpenza ya kufwa. Kansi, Yezu ketuba nde yandi kele kaka ya kulala. Na kusadilaka ngolo ya Nzambi pesaka yandi, yandi tamonisa nde bantu lenda kuvutulama na luzingu kukonda mpasi mutindu bau lenda kutedimisama na mpongi ya ngolo.

Ntangu yai, Yezu mebasisa bantu yonso na nganda katula Piere, Yakobo, Yoane, ti mama mpi tata ya mwana-nkento ya kufwa. Na nima, yandi mekwenda ti bantu yai tanu kisika ya mwana-nkento ya kufwa kele. Na kusimbaka yandi na diboko, Yezu ketuba nde: “Talita kum,” disongidila nde: “Mwana-nkento, telama!” Mpi na mbala mosi mwana-nkento metelama mpi meyantika na kutambula! Dyambu ya bibuti na yandi memona meyitukisa bau mpi mepesa bau kyese ya mingi kibeni.

Na nima ya kutuba nde bau kupesa mwana kima ya kudya, Yezu metuma Yairusi ti nkento na yandi na kutubila ve bantu mambu ya mesalama. Kansi, ata nkutu Yezu metuba dyambu yina, nsangu yango mepanzana na ndambu yina yonso. Yai kele lufutumuku ya zole ya Yezu mesala. Matayo 9:​18-26; Marko 5:​35-43; Luka 8:​41-56.

▪ Inki nsangu Yairusi mezwa mpi inki mutindu Yezu mesyamisa yandi?

▪ Inki mambu bau mekuta ntangu bau mekuma na nzo ya Yairusi?

▪ Sambu na inki Yezu metuba nde mwana kele kaka ya kulala?

▪ Tanga bantu tanu ya kele ti Yezu yina memona lufutumuku yango na meso na bau?