Kapu 49

Nzyetolo ya Nkaka ya Kusamuna na Galilea

NA NIMA ya kiteso ya bamvula zole ya kisalu ya kusamuna mingi nkatu kulemba, keti sesepi Yezu tayantika na kuyambula mpi kupema? Ve, kansi, yandi meyedisa kisalu na yandi na kusalaka nzyetolo ya nkaka, ya tatu na Galilea. Yandi ketala bambanza yonso ti babwala na kati ya teritware yina, na kulongaka na basinagoga mpi na kusamunaka nsangu ya mbote ya Kimfumu. Mambu ya yandi memona na nzyetolo yai kendimisa yandi kuluta na ntwala mfunu ya kuyedisa kisalu ya kusamuna.

Konso kisika yina ya Yesu kekwenda, yandi kemona bantu na mpusa ya mbelula mpi nsyamisa ya kimpeve. Bau kele bonso mameme ya kukonda ngungudi, ya kulemba mpi ya kukonda kikesa, mpi yandi kewila bau mawa. Yandi ketubila balongoki na yandi nde: “Bambuma mingi kele na bilanga, kansi bantu ya kisalu kele mingi ve sambu na kukatula yo. Beno bondila munkwa-bilanga na kutinda bantu ya nkaka ya kisalu sambu na kukatula bambuma na yandi.”

Yezu kele ti pula ya kisalu. Yandi mevukisa bantumwa 12, bayina ya yandi ponaka kiteso ya mvula mosi na ntwala. Yandi mekabula bau zole-zole, na kusalaka bibuka sambanu ya bansamuni, mpi mepesa bau bantuma. Yandi ketendula nde: “Beno kwenda ve na ntoto ya bantu yina kele Bayuda ve; beno kota ve ata na bwala mosi ya bantu ya ntoto ya Samaria. Kansi beno kwenda na bantu ya Israele yina kele bonso mameme yina me vilaka. Beno kwenda kulonga bantu nde: ‘Kimfumu ya Nzambi me kuma penepene!’ ”

Kimfumu yai ya kulombamaka nde bau fwete kulonga, kele yina ya Yezu kulongaka bau na kulomba na kisambu ya mbandu. Kimfumu mekuma penepene na sansa nde Ntotila ya kusolamaka na Nzambi, Yezu Kristu, kele pana. Sambu na kupesa balongoki na yandi kipiku nde bau kele bangenzi ya luyalu yango yina ya kuluta yina ya bantu, Yezu mepesa bau ngolo ya kubelula bambefo ti ya kutedimisa bafwa. Yandi mepesa bau ntuma ya kusala kisalu yai ya ofele.

Na nima, yandi metubila balongoki na yandi na kukonda kusala bangidika ya kubaka bima sambu na nzyetolo na bau ya kusamuna. “[Beno baka ve wolo to palata to mbongo ya kwivre, NW] sambu na nzila, ata basimisi zole-zole ve, ata basandale ve, ata nti ya maboko ve. Sambu muntu ya kisalu fweti baka [madya na yandi, NW].” Bayina kesepela na nsangu na yandi tandima mpi tapesa madya ti kisika ya kulala. Mutindu Yezu ketuba nde: “Kana beno kuma na bwala ya nene to ya fyoti, beno sosa muntu yina lenda yamba beno, ebuna beno lala kaka na nzo na yandi tii kuna ya beno ta katuka na bwala yina.”

Na nima, Yezu mepesa malongi na mutindu ya kuzabisa nsangu ya Kimfumu na bantu ya nzo. Yandi ketuma nde: “Kana beno kota na nzo ya bantu, beno pesa bantu ya nzo yina mbote. Kana bantu ya nzo yango me yamba beno, mbote na beno kuvanda kaka mpidina; kansi kana bo me yamba beno ve, mbote na beno kuvutuka na beno mosi. Ebuna kana nzo mosi to bwala mosi me buya na kuyamba beno to na kuwa mambu na beno, beno katuka pana. Ntangu beno ke katuka, beno kusula makulu na beno sambu na kukatula pusiere yina kele na nsi ya makulu na beno.”

Sambu na konso bwala yina ya kebuya nsangu na bau, Yezu kemonisa nde mfundusu na yau tavanda mpenza ya ngolo. Yandi ketendula nde: “Mono ke tubila beno mambu ya kieleka nde: Na kilumbu yina ya Nzambi ta sambisa bantu, [yau tavanda mwa mbote sambu na bantu ya bwala Sodome ti Gomore kuluta mbanza yina, NW].” Matayo 9:35–10:15; Marko 6:​6-12; Luka 9:​1-5.

▪ Inki ntangu Yezu mebanda nzyetolo ya tatu ya kisalu ya kusamuna na Galilea, mpi yau kendimisa yandi inki?

▪ Na ntangu ya yandi metinda bantumwa na yandi 12 na kwenda kusamuna, inki bantuma yandi mepesa bau?

▪ Sambu na inki yau mefwana nde balongoki kulonga nde Kimfumu mekuma penepene?