Kapu 52
Yezu Medisa Mafunda ya Bantu na Mutindu Mosi ya Kimangu
BANTUMWA yonso 12 meyangalala na nzyetolo ya kitoko ya kusamuna ya bau mesala na nzyunga ya Galilea. Ntangu yai, mwa ntangu fyoti na nima ya lufwa ya Yoane, bau mevutuka na Yezu mpi bau ketela yandi mambu ya kitoko ya bau kumonaka. Na kumonaka nde bau melemba mpi nde bantu mingi kibeni kekwisa mpi kevutuka na mpila nde bau kele ve ata nkutu ti ntangu ya kudya, Yezu metuba nde: ‘Beto kwendeno kuvanda kisika mosi beto na beto, sambu beno kwenda kupema fioti.’
Bau mekota na kati ya bwatu na bau, ngatu penepene na Kapernaumi, bau mekwenda na kisika mosi ya kingenga, yau fwete kuvanda na ndambu ya esti ya Yordani, luta Betsaida. Kansi, bantu mingi memona bau kekwenda, mpi bankaka mewa nsangu yina. Bau yonso kebaka ntinu na lweka ya masa, mpi ntangu bwatu metelama, bantu kele pana na kuvingilaka bau.
Ntangu bau mebasika na bwatu mpi memona kibuka ya nene, Yezu mewila bau mawa sambu bantu kele bonso mameme ya kukonda ngungudi. Ebuna, yandi mebelula bambefo na bau mpi meyantika na kulonga bau mambu mingi.
Ntangu keluta nswalu, mpi balongoki ya Yezu mekwisa na yandi mpi bau ketuba nde: “Lere me luta mingi, awa mpi babwala kele ntama. Tubila bantu yai bo kwenda na babwala ya fioti ti ya nene yina kele penepene sambu bo kwenda kusumba bima na bo ya kudia.”
Kansi, na kupesaka mvutu Yezu ketuba nde: “Beno mosi, beno pesa bo bima ya kudia.” Ebuna, sambu Yezu keyita kuzaba kima ya yandi tasala, yandi memeka Filipo nde: “Wapi beto lenda sumba mampa sambu na kupesa bantu yai yonso, bo dia?”
Na mboninu ya Filipo yau kele mpasi. Sambu babakala kele kiteso ya 5000, mpi ngatu kiteso ya bantu kuluta 10000 kana kutanga bankento ti bana! Filipo mevutula nde: “Mampa ya [badenali, NW] nkama zole [denali mosi kuvandaka mbongo ya lufutu ya kilumbu mosi ya kisalu na ntangu yina], yo ta fwana ve na konso muntu na kubaka mwa-kitini mosi-mosi ya mampa.”
Mbala ya nkaka, sambu na kusonga nde mpila kele ve ya kudisa bantu kuluta mingi, Andre ketuba nde: “Mwana-bakala mosi kele awa ti mampa tanu ya bo salaka na fufu ya orze ti bambisi zole ya masa.” Na kuyikaka nde: “Kansi keti yo ta lunga na bantu yai mingi-mingi?”
Sambu yau kele nsungi ya printemps, kaka na ntwala ya Paki ya mvu 32 T.B., nyanga ya mubisu kele mingi. Ebuna Yezu metuma balongoki na yandi na kutubila bantu na kutandama na zulu ya nyanga na bibuka ya bantu 50 mpi 100. Yandi mebaka mampa yango yina tanu ti bambisi zole, yandi metala na zulu mpi mesala kisambu ya lusakumunu. Na nima, yandi meyantika na kuzenga mampa mpi na kukabula bambisi. Yandi mepesa yau na balongoki na yandi, bau mekabula yau na bantu. Na ngituka yonso, bantu yonso kedya tii bau mefuluka!
Na nima, Yezu metubila balongoki na yandi nde: “Beno lokuta bitini ya mampa me bika, mpidina ata ndambu mosi ve ta vila.” Ntangu bau mesala mpila yina, bau mefulusa yina ya kubikalaka na bitunga 12! Matayo 14:13-21; Marko 6:30-44; Luka 9:10-17; Yoane 6:1-13.
▪ Sambu na inki Yezu kesosa kisika ya kinsweki sambu na bantumwa na yandi?
▪ Na wapi Yezu menata balongoki na yandi, mpi sambu na inki mpusa na bau ya mvunda melungana ve?
▪ Ntangu lere meluta, inki balongoki mesyamisa Yezu na kusala, kansi inki mutindu yandi mesungimina bantu?