Kapu 54

“Mampa ya Kieleka ya Ke Katukaka na Zulu”

KILUMBU ya kuyitaka kuvandaka mpenza ti kisalu mingi. Yezu kudisaka mafunda ya bantu na mutindu mosi ya kimangu mpi na nima, yandi kutinaka bantu ya kusosaka kukumisa yandi ntotila. Na mpimpa yango yina, yandi kutambulaka na zulu ya kitembo ya Nzadi ya Galilea; yandi kugulusaka Piere, yina kuyantikaka na kudinda ntangu yandi kutambulaka na zulu ya masa ya kitembo; mpi yandi kulembikaka kitembo sambu na kugulusa balongoki na yandi na kudinda.

Ntangu yai, bantu yina ya Yezu kudisaka na mutindu mosi ya kimangu na ndambu ya nordi-esti ya Nzadi ya Galilea, memona yandi dyaka penepene na Kapernaumi mpi meyufula nde: “Nki ntangu nge kwisaka kukuma awa?” Na kunganinaka bau, Yezu ketuba nde bau mekwisa kusosa yandi kaka sambu bau ketula kivuvu ya kudya madya ya nkaka ya ofele. Yandi mesyamisa bau na kusala, ve sambu na madya yina kebebaka, kansi sambu na madya yina kebikalaka sambu na luzingu ya mvula na mvula. Na yau, bantu yango keyufula nde: “Nki mambu beto fweti sala sambu na kulungisa luzolo ya Nzambi?”

Yezu metubila kisalu mosi kansi ya kuluta mfunu. Yandi ketendula nde: “Mambu ya Nzambi ke zolaka, yo yai: Beno tula ntima na [M]untu yina ya yandi me tindaka.”

Kansi, bantu kemonisa ve lukwikilu na Yezu, ata yandi mesala bimangu yina yonso. Na ngituka yonso, ata nkutu na nima ya mambu yonso ya mbote ya yandi kusalaka, bau keyufula nde: “Nki kidimbu nge lenda songa beto sambu beto kwikila nge? Nki mambu ya kuyituka nge ta sala? Bankaka na beto vandaka kudia madia yai mana bonso mampa na ntoto ya zelo na zelo, mutindu bo sonikaka na Mukanda ya Nzambi, nde: ‘Yandi vandaka kupesa bo mampa yina vandaka kukatuka na zulu, sambu bo dia.’ ”

Na kupesaka mvutu na ngyufula na bau sambu na kidimbu, Yezu memonisa pwelele Nto ya madya ya kimangu, na kutubaka nde: “Moize ve muntu pesaka beno mampa yina vandaka kukatuka na zulu, kansi Tata na mono ke pesaka beno mampa ya kieleka ke katukaka na zulu. Sambu mampa yina ya Nzambi ke pesaka kele muntu yina ke katuka na zulu, yina ke pesa moyo na bantu yonso.”

Bantu metuba nde: “Mfumu, pesaka beto bilumbu yonso mampa yango.”

Yezu ketendula nde: “Mono kele mampa yina ke pesaka moyo. Konso muntu yina ke kwisa na mono, yandi ta wa diaka nzala ya madia ve; konso muntu yina ke ndimaka mono na ntima na yandi, yandi ta wa diaka nzala ya masa ata fioti ve. Kansi mono me tubila beno nde: Beno me mona mono, kansi beno ke ndimaka mono ve. Konso muntu yina ya Tata ke pesa mono, yandi ta kwisa na mono; konso muntu yina ta kwisa na mono, mono ta buya yandi ve. Mono katukaka na zulu sambu na kwisa kusala luzolo na mono mosi ve, kansi sambu na kwisa kusala luzolo ya muntu yina tindaka mono. Luzolo ya muntu yina tindaka mono kele nde mono kuvidisa ata muntu mosi ve na bayina ya yandi me pesaka mono, kansi mono kupesa bo yonso moyo na kilumbu ya nsuka. Sambu luzolo na yandi kele nde bantu yonso yina me monaka Mwana ti kutula ntima na yandi, bo baka moyo ya mvula na mvula.”

Ntangu bau mewa mpila yina, Bayuda meyantika na kubokutila Yezu sambu yandi metuba nde: “Mono kele mampa yina me katukaka na zulu.” Bau kemona yandi kaka nde yandi kele mwana ya mebutuka na bantu mpi kaka mutindu bantu ya Nazareti kusalaka, bau kebuya, na kutubaka nde: “Yandi Yesu ve, mwana ya Yozefi? Beto zaba tata na yandi ti mama na yandi si. Nki mutindu yandi ke tuba nde yandi me katukaka na zulu?”

Yezu mevutula nde: “Beno kubokuta diaka ve na kati na beno. Ata muntu mosi ve lenda kwisa na mono kana Tata yina tindaka mono me benda yandi ve; ebuna mono, mono tapesa yandi diaka moyo na kilumbu ya nsuka. Baprofete sonikaka mambu yai nde: ‘Nzambi ta longa bantu yonso.’ Konso muntu yina ke wa Tata ti kundima malongi na yandi, yandi ta kwisa na mono. Mpidina ke songa ve nde muntu me monaka ntete Tata, kaka muntu mosi mpamba yina me katukaka na Nzambi, yandi yina muntu me monaka Tata. Mono ke tubila beno mambu ya kieleka: Muntu yina ke tulaka ntima na mono, yandi ke na moyo ya mvula na mvula.”

Na kulandaka, Yezu mevutukila nde: “Mono kele mampa yina ke pesaka moyo. Bankaka na beno diaka madia yai mana bonso mampa ntangu bo vandaka na ntoto ya zelo na zelo, kansi bo fwaka. Kansi mampa yina ke katukaka na zulu, kana muntu kudia yo, yandi ta fwa ve. Mono kele mampa yina ke pesaka moyo; mono me katukaka na zulu. Kana muntu kudia mampa yai, yandi ta zinga mvula na mvula.” Ee, na kumonisaka lukwikilu na Yezu, muntu yina Nzambi kutindaka, bantu lenda kubaka luzingu ya mvula na mvula. Mana ve to mampa ya nkaka, lenda kupesa yau!

Disolo yina metala mampa yina kukatukaka na zulu kemonana nde yau kuyantikaka ntangu fyoti na nima ya bantu kumonaka Yezu penepene na Kapernaumi. Kansi yau kelanda, na kukumaka ngolo na nima, ntangu Yezu kelonga na kati ya sinagoga na Kapernaumi. Yoane 6:​25-51, 59; Nkunga 78:24; Yezaya 54:13; Matayo 13:​55-57.

▪ Inki dyambu kuyitaka na ntwala ya disolo ya Yezu yina metala mampa yina mekatukaka na zulu?

▪ Na kutadila inki mambu ya Yezu mekatuka kusala, yau yina yau mefwana ve nde bantu kulomba kidimbu?

▪ Sambu na inki Bayuda kebokutila Yezu ntangu yandi metuba nde yandi kele mampa yina mekatukaka na zulu?

▪ Ntembe ya metala mampa yina mekatukaka na zulu kesalama na wapi?