Kapu 59

Yezu Kele Nani Mpenza?

NTANGU bwatu yina kele na kunata Yezu ti balongoki na yandi metelama na Betsaida, bantu menatila yandi kifwa-meso mpi mebondila yandi nde yandi kusimba muntu yango mpi kubelula yandi. Yezu menata muntu yango na nganda ya bwala na kusimbaka yandi na diboko mpi, na nima ya kulosila yandi mate na meso, yandi meyufula nde: “Keti nge lenda mona ntangu yai?”

Muntu yango mevutula nde: “Mono ke mona bantu bonso banti, kansi bo ke tambula.” Na kutulaka maboko na yandi na zulu ya meso ya muntu yango, Yezu mekangula meso na yandi na mpila nde yandi kemona mbotembote. Ebuna, Yezu mesonga muntu yango na kukwenda na nzo na yandi na kupesaka yandi ntuma ya kukonda kukota na kati ya mbanza.

Ntangu yai, Yezu mekatuka ti balongoki na yandi sambu na kwenda na babwala ya Sezarea-Filipo, na ndambu ya kuluta ntama ya nordi ya Palestine. Yau kele bwala mosi ya kitoko yina kele na kisika ya kitoko ya bametere 350 na zulu ya nivo ya nzadi, nzila ya kumata kuna kele kitamina ya kiteso ya bakilometere 50. Ngatu nzyetolo yango kebakaka bilumbu zole.

Na nzila, Yezu mekwenda na kingenga sambu na kusamba. Bangonda mebikala kaka kiteso ya uvwa to kumi na ntwala ya lufwa na yandi, mpi yandi kekudibanza sambu na balongoki na yandi. Bamingi meyitaka kuyambula na kulanda yandi. Bankaka kemonana nde bau kele na kiseku to bau mebaka nsoni sambu yandi kubuyaka bikesa ya bantu kusalaka sambu na kukumisa yandi ntotila, mpi ntangu bambeni na yandi kutulaka yandi ntembe nde yandi kupesa kidimbu ya zulu sambu na kumonisa kimfumu na yandi, yandi buyaka na kupesa. Balongoki na yandi kekwikilaka nde yandi kele nani? Ntangu bau mekwisa kisika ya yandi kesamba, Yezu meyufula nde: “Bantu ke tubaka nki sambu na mono?”

Bau mevutula nde: “Bantu ya nkaka ke tubaka nde nge kele Yoane-Batiste; bankaka nde Elia, bankaka nde Yeremia to profete ya nkaka.” Ee, bantu keyindulaka nde Yezu kele mosi na kati ya bantu yai yina mefutumukaka na kati ya bafwa!

Yezu keyufula nde: “Ebuna beno, beno ke tubaka nde mono kele nani?”

Piere mevutula nswalu nde: “Nge kele Mesia, Mwana ya Nzambi ya moyo.”

Na nima ya kundima mvutu ya Piere, Yezu ketuba nde: “Mono ke tubila nge nde: Piere, nge kele ditadi, ebuna na zulu ya ditadi yina mono ta tunga Dibundu na mono. Ata lufwa ta simba yo ve.” Awa Yezu kemonisa ntete nde yandi tatunga dibundu mpi nde ata nkutu lufwa tasimba ve bamambere na yau na kimpika na nima ya luzingu na bau ya kwikama na zulu ya ntoto. Na nima yandi ketubila Piere nde: “Mono ta pesa nge bana-fungula ya Kimfumu [ya mazulu, NW].”

Awa, Yezu kesonga nde Piere fwete kubaka mabaku ya kuswaswana. Ve, Piere kebaka ve kisika ya ntete na kati ya bantumwa, yandi kekuma mpi ve lufulu ya dibundu. Yezu yandi mosi kele Ditadi yina na zulu na yau dibundu na yandi tatungama. Kansi Piere fwete kubaka bana-fungula tatu yina yandi takangudila, na mutindu ya kifwani, dibaku sambu bibuka ya bantu kukota na Kimfumu ya mazulu.

Yau kulombamaka nde Piere kusadila mwana-fungula ya ntete na Pantekoti ya mvu 33 T.B. sambu na kumonisa na Bayuda ya kebalulaka ntima kima ya bau fwete kusala sambu na kuguluka. Yau kulombamaka nde yandi kusadila mwana-fungula ya zole sambu na kukangudila bantu ya Samaria ya kekwikila dibaku ya kukota na Kimfumu ya Nzambi. Na nima, na mvu 36 T.B. yau kulombamaka nde yandi kusadila mwana-fungula ya tatu sambu na kukangudila Bantu ya Makanda ya kukonda kuyotisama, Korneye ti banduku na yandi, dibaku ya mutindu mosi.

Yezu kelanda disolo na yandi ti balongoki na yandi. Yandi mepesa bau nsoni na kutubilaka bau mambu yina metala bampasi mpi lufwa yina mebika fyoti nde yandi kumona na Yeruzalemi. Nkatu kubakisa nde Yezu tafutumuka sambu na luzingu ya zulu, Piere mebenda Yezu na lweka. Yandi ketuba nde: “[Vanda na ntima ya mbote sambu na nge mosi, Mfumu, NW]. Yo ta bwila nge ve!” Na kubalukaka, Yezu kevutula nde: “Nge Satana, katuka awa na meso na mono! Nge ke zola kukanga mono nzila, sambu nge ke banza mabanza ya kinzambi ve kansi mabanza ya kimuntu.”

Ya kyeleka, katula bantumwa, bantu ya nkaka kele na kusala nzyetolo ti Yezu, ebuna ntangu yai, yandi kebinga bau na kwisa na yandi mpi ketendudila bau yonso nde yau tavanda ve petepete sambu na kuvanda balandi na yandi. Yandi ketuba nde: “Kana muntu zola kwisa kulanda mono, yandi lenda yindula diaka ve luzingu na yandi mosi; kansi yandi kubaka [nti] na yandi [ya mpasi], yandi kwisa kulanda mono. Sambu konso muntu yina zola kugulusa moyo na yandi, yandi ta vidisa yo; kansi konso muntu yina ta vidisa moyo na yandi sambu na mono ti sambu na Nsangu ya Mbote, yandi ta gulusa yo.”

Ee, kana bau kezola kumonisa nde bau mefwana na kubaka lemvo na yandi, balandi ya Yezu fwete kuvanda ti kikesa mpi na mpeve ya kuditambika. Yandi ketuba nde: “Kana muntu kumona mono nsoni to kumona malongi na mono nsoni na meso ya bantu yai ke landaka Nzambi ve, ke salaka mambu ya mbi, Mwana-muntu mpi ta mona yandi nsoni ntangu yandi ta kwisa ti bawanzio ya Nzambi na lukumu ya Tata na yandi.” Marko 8:​22-38; Matayo 16:​13-28; Luka 9:​18-27.

▪ Sambu na inki Yezu kekudibanza sambu na balongoki na yandi?

▪ Bantu ketuba nde Yezu kele nani?

▪ Inki bana-fungula mepesama na Piere, mpi inki mutindu yau fwete kusadilama?

▪ Inki nsongisa Piere mebaka, mpi sambu na inki?