Kapu 60
Nkembo ya Kimfumu ya Kristu Meyita Kumonana
YEZU mekuma na bandambu ya Sezarea-Filipo, mpi yandi kelonga kibuka, na kati na bau balongoki na yandi kele. Yandi mezabisa yau kima yai ya kuyitukisa: “Mono ke tubila beno mambu ya kieleka: Bantu ya nkaka kele awa, bo ta fwa ve tii kuna ya bo ta mona Mwana-muntu me kwisa na Kimfumu na yandi.”
Balongoki fwete kudiyufula nde: ‘Inki Yezu zolaka kutuba?’ Kiteso ya mposo mosi na nima, Yezu mebaka Piere, Yakobo, ti Yoane, mpi bau memata na ngumba mosi ya nda. Ngatu yau kele na mpimpa, sambu balongoki kele ya kulala. Na ntangu Yezu kesamba, yandi mekituka na ntwala na bau. Luse na yandi meyantika na kupela bonso ntangu, mpi bilele na yandi mekuma kungenga bonso nsemo.
Na nima, bantu zole, ya kumonisamaka bonso: “Moize ti Elia,” memonana mpi meyantika na kusolula ti Yezu na yina metala ‘kukwenda’ na yandi ‘ya fwete kusalama na Yeruzalemi.’ Na ntembe ve, kukwenda yina kezola kutubila lufwa ya Yezu mpi lufutumuku yina talanda. Na yau, disolo yai kemonisa nde lufwa na yandi ya nsoni kele ve kima mosi ya fwete kutinama, mutindu Piere kuzodilaka.
Ya kusikama mpenza ntangu yai, balongoki ketala mpi kewidikila ti kuyituka yonso. Ata nkutu yai kele mbona-meso, yau kemonana ya masonga kibeni na mpila nde Piere meyantika na kuvukana na disolo yango, na kutubaka nde: “Mfumu, ke mbote mutindu beto kele awa. Kana nge zola, mono lenda tunga awa bisasa tatu, mosi sambu na nge, mosi sambu na Moize, yankaka sambu na Elia.”
Ntangu Piere kele na kutuba, dituti mosi ya nsemo mefika bau, mpi ndinga ya mebasika na kati ya dituti ketuba nde: “Yai kele mwana na mono ya mono ke zolaka mingi; [ya mono mendimaka, NW]. Beno wila yandi.” Ntangu bau mewa ndinga yina, balongoki mebwa ilungi na ntoto. Kansi Yezu ketuba nde: “Beno telama beno vanda na boma ve!” Ntangu bau metelama, bau memona ve muntu ya nkaka katula Yezu.
Na ntangu bau kekita na ngumba na kilumbu ya kulanda, Yezu metuma nde: “Beno lenda tubila ata muntu mosi ve mambu yina ya beno me mona na mbona-meso, tii kuna ya Nzambi ta tedimisa Mwana-muntu na lufwa.” Kumonana ya Elia na mbona-meso mebasisa ngyufula na mabanza ya balongoki. Bau keyufula nde: “Sambu na nki balongi ya Bansiku ke tubaka nde Elia fweti kwisa ntete?”
Yezu ketuba nde: “Elia me kwisaka ntama, ebuna bantu bakisaka yandi ve.” Kansi, Yezu ketubila Yoane Mbotiki, yina kulungisaka kisalu ya kufwanana na yina ya Elia. Yoane kubongisaka nzila sambu na Kristu, mutindu Elia kusalaka sambu na Elisa.
Nsyamisa ya inki mutindu mbona-meso yai kele na yau, sambu na Yezu mpi sambu na balongoki! Mbona-meso yango kele, na mutindu ya kifwani, kuyita kumonana ya nkembo ya Kimfumu ya Kristu. Ya kyeleka, balongoki kumonaka, “Mwana-muntu me kwisa na Kimfumu na yandi,” kaka mutindu Yezu kusilaka mposo mosi na ntwala. Na nima ya lufwa ya Yezu, Piere kusonikaka mutindu bau ‘monaka kimfumu na yandi na meso na bo mosi. Bo vandaka ti yandi na zulu ya ngumba ya santu.’
Bafarize kulombaka Yezu kidimbu sambu na kumonisa nde yandi kuvandaka muntu yina kusilamaka na kati ya Masonuku sambu na kuvanda Ntotila ya kusolama na Nzambi. Kidimbu ya mutindu yina kupesamaka ve na bau. Na ndambu ya nkaka, balongoki ya Yezu ya zolwa mepesama nswa ya kumona lukituku ya Yezu bonso dyambu ya kendimisa bambikudulu ya Kimfumu. Na yau, Piere kusonikaka na nima nde: “Yau yina, beto kele ti ndinga ya mbikudulu yina mekumisamaka kuluta kyeleka.” (NW) Matayo 16:13, Mt 16:28–17:13; Marko 9:1-13; Luka 9:27-37; 2 Piere 1:16-19.
▪ Na ntwala ya kufwa, inki mutindu bantu ya nkaka memona Yezu kekwisa na Kimfumu na yandi?
▪ Na mbona-meso, inki mambu Moize mpi Elia kesolula ti Yezu?
▪ Sambu na inki mbona-meso yai kele lusadisu ya nsyamisa ya ngolo sambu na balongoki?