Kapu 61

Mwana-bakala ya Bampeve ya Mbi Mebeluka

NTANGU Yezu, Piere, Yakobo ti Yoane kele ve, ngatu bau kele na nsongi ya Ngumba ya Hermo, dikambu mebwila balongoki ya nkaka. Na kuvutuka na yandi, Yezu memona na mbala mosi nde kima mosi kekwendila ve. Bantu mezyunga balongoki na yandi, mpi balongi ya Bansiku ketula ntembe ti bau. Na ntangu bau memona Yezu, bantu keyituka kibeni mpi kekwenda ntinu sambu na kupesa yandi mbote. Yandi meyufula nde: “Sambu na nki beno ke tula ntembe ti bo?”

Na kubasikaka na kati ya bibuka, muntu mosi mefukama na ntwala ya Yezu mpi metendula nde: “Longi mono kwisaka kunatila nge mwana na mono ya bakala, sambu yandi ke na mpeve ya mbi yina me kumisaka yandi baba. Konso ntangu, kana mpeve me simba yandi, yo fweti bwisa yandi na ntoto; mafulu-fulu ke basika yandi na munoko, yandi ke kangisa meno ngolo, nitu na yandi ke kuma ngolo bonso nti. Yo yina mono me kwisa kubondila balonguki na nge na kubasisa mpeve yina, kansi bo me kuka ve.”

Yau kemonana nde balongi ya Bansiku kesadila kubela ya balongoki ya kukonda kukuka na kubelula mwana-bakala yina, ngatu na kuvwenzaka bikesa na bau. Kaka na ntangu yai ya mpasi, Yezu mekuma. Yandi ketuba nde: “A, beno bantu yai ke kwikilaka ve! Mono fweti vanda na beno tii nki ntangu? Mono fweti kangila beno ntima tii nki ntangu?”

Yezu kemonana bonso nde yandi ketubila bantu yonso yina kele pana, kansi na ntembe ve yandi ketubila mingimingi balongi ya Bansiku, yina vandaka kutula mavwanga sambu na balongoki na yandi. Na nima, yandi ketuba sambu na mwana-bakala yango nde: “Beno kwisa kunatila mono mwana awa.” Kansi ntangu mwana-balaka mekwisa na Yezu, demo yina kele na kati na yandi mebwisa yandi na ntoto mpi mekonisa yandi ngolo kibeni. Mwana-bakala mebaluka na ntoto mpi mafulu-fulu mebasika na munoko.

Yezu meyufula nde: “Maladi yai yantikaka yandi nki ntangu?”

Tata yango mevutula nde: “Yo yantikaka yandi katuka na kimwana na yandi. Mbala mingi mpeve ke losaka yandi na tiya ti na masa; yo ke sosaka mpila ya kufwa yandi.” Na nima, tata mebondila nde: “Kansi kana nge lunga kusala konso kima, wila beto mawa, sadisa beto.”

Mbala ya nkaka, bamvula mingi meluta, tata kesosaka lusadisu. Kansi, ntangu yai, mutindu balongoki ya Yezu mebela, kukonda kivuvu na yandi mekuma ngolo. Na kubendaka dikebi na mvwandilu na yandi ya kukonda kivuvu, Yezu metuba na kikesa yonso nde: “Nge me tuba: ‘Kana nge lunga.’ Mambu yonso kele mpasi ve na muntu yina ke kwikilaka.”

Na mbala mosi tata meboka nde: “Mono ke kwikila,” kansi yandi mebondila nde: “Kansi sadisa mono, sambu lukwikilu na mono kele ya fioti!”

Na ntangu yandi memona nde bantu kekwisa ntinu kuna ya bau kele, Yezu menganina mpeve ya mbi nde: “Nge mpeve yai me kumisaka mwana yai baba, me fwaka mpi makutu na yandi, mono ke songa nge nde: Basika na mwana yai, nge lenda kwisa kuvutuka diaka na yandi ve!” Na ntangu demo yango kebasika na kati ya mwana-bakala, yau mepusa yandi diaka na kuboka mpi mekonisa yandi mingi. Na nima, mwana-bakala melala na ntoto nkatu kunikana, na mpila nde bantu mingi meyantika na kutuba nde: “Yandi me fwa!” Kansi Yezu mesimba mwana-bakala yango na diboko, mpi yandi metelama.

Na ntwala, ntangu balongoki kutindamaka sambu na kusamuna, bau kubasisaka bampeve ya mbi. Ebuna ntangu yai, ya bau mekota na kati ya nzo, bau meyufula Yezu na kingenga nde: “Sambu na nki beto kukaka ve kubasisa mpeve yina?”

Na kumonisaka nde yau kuvandaka sambu na kukonda na bau ya lukwikilu, Yezu mevutula nde: “Na kubasisa mpeve ya mutindu yina nge lenda sala kima ya nkaka ve, kansi nge fweti samba kaka Nzambi.” Ya kyeleka, na mbala yai, yau lombaka lubongisu sambu na kubasisa mpeve ya mbi yina ya ngolo. Lukwikilu ya ngolo kumosi ti kisambu ya kulomba lusadisu ya ngolo ya Nzambi kuvandaka mfunu.

Na nima Yezu keyika nde: “Mono ke tubila beno mambu ya kieleka: Kana beno vandaka na lukwikilu nene bonso mwa-nti yai ya mutarde, beno zolaka kutuba na ngumba yai nde: ‘Katuka awa, kwenda kubwa kuna,’ yo zolaka kwenda. Beno zolaka kumona mpila ya kusala mambu yonso.” Ngolo ya inki mutindu lukwikilu lenda kuvanda na yau!

Balukakilu ti bampasi ya kekakilaka kuyela na kisalu ya Yehowa lenda kuvanda mpasi na kununga to na kukatula bonso ngumba ya nene ya kyeleka. Kansi, Yezu kele na kumonisa nde kana beto kukuna lukwikilu na bantima na beto, na kulosilaka yau masa mpi na kusalaka na mpila nde yau kukula, yau tayela mpi yau tasadisa beto na kununga balukakilu ti bampasi ya kufwanana na bangumba. Marko 9:​14-29; Matayo 17:​19, 20; Luka 9:​37-43.

▪ Inki dikambu Yezu mekuta na ntangu yandi mekatuka na Ngumba ya Hermo?

▪ Inki nsyamisa Yezu kepesa na tata ya mwana-bakala yina kele ti mpeve ya mbi?

▪ Sambu na inki balongoki kukukaka ve na kubasisa mpeve yina ya mbi?

▪ Yezu memonisa nde lukwikilu lenda kukuma na ngolo ya inki mutindu?