Kapu 78

Beno Vanda ya Kuyilama!

NA NIMA ya kukebisa bantu na yina metala bizolazola, mpi kupesa balongoki na yandi mayele na yina metala kutula dikebi ya ngolo na bima ya kinsuni, Yezu kesyamisa nde: “Beno kuwa boma ve, [kibuka ya fyoti, NW]. Sambu Tata na beno ke mona kiese na kupesa beno Kimfumu na yandi.” Na yau, yandi kemonisa nde kaka ntalu ya fyoti (yina kuzabanaka na nima nde 144000) tavanda na Kimfumu ya zulu. Ntalu ya mingi ya bantu yina tabaka luzingu ya mvula na mvula tavanda bantu yina tayalama na ntoto na Kimfumu yango.

Dikabu ya kitoko ya inki mutindu, “Kimfumu”! Na kupusaka balongoki na yandi na kubaka dikabu yango na mutindu mosi ya mbote, Yezu kesyamisa bau nde: “Beno teka bima na beno, ebuna beno pesa [makabu ya nkenda, NW].” Ee, bau fwete kusadila bima yina ya bau kele na yau sambu na kusadisa bantu ya nkaka na kimpeve mpi mpila yina na kudifulusilaka “kimvwama yina kemanaka ve na zulu.” (NW)

Na nima Yezu kesyamisa balongoki na yandi na kuvanda ya kuyilama sambu na kuvutuka na yandi. Yandi ketuba nde: “[Bika baluketu na beno kuvandaka ya kukanga na mikaba, NW], bamwinda na beno fweti vanda ya kupela. Beno vanda bonso bampika yina ke vingila mfumu na bo ntangu yandi ke katuka na [makwela, NW] sambu na kwisa kuvutuka na nzo na yandi. Kana yandi kwisa kukuma, yandi kubula na kielo, bo ta kangula yandi kielo nswalu. Kiese na bampika yai kana mfumu na bo kwisa kukuta bo ya kutelama! Mono ke tubila beno mambu ya kieleka: yandi ta lwata tablie yandi mosi, yandi ta vandisa bo na mesa, ebuna yandi ta kwisa kupesa bo madia.”

Na kingana yai, kuyilama ya bansadi sambu na kuvutuka ya mfumu na bau kemonisama na mpila bau metombula bamvwela na bau sambu na kukangisa yau na nsi ya mikaba na bau, mpi na kufula na bau na kulungisa mikumba na bau na kati ya mpimpa na nsemo ya mwinda ya kufuluka mbote. Yezu ketendula nde: ‘Kana mfumu mekuma na kingengi ya zole [kubanda mfinama na ntangu ya nana na nkokila tii na midi ya mpimpa], ata na kingengi ya tatu [kubanda na midi ya mpimpa, tii na kiteso ya ntangu ya tatu na suka], mpi yandi kukuta bo ya kuyilama, bau kele na kyese!’ (NW)

Mfumu kepesa nsendo na bansadi na mutindu mosi ya kesalamaka ve. Yandi kevandisa bau na mesa mpi keyantika na kupesa bau madya. Yandi kebaka bau, bonso bampika ve, kansi bonso banduku ya kwikama. Nsendo ya mbote ya inki mutindu sambu bau kulandaka na kusadila mfumu na bau na mpimpa ya mvimba na kuvingilaka kuvutuka na yandi! Yezu kesukisa nde: “Beno mpi, beno yilama; sambu Mwana-muntu ta kwisa na ntangu yina ya beno ta zaba ve nde yandi ke kwisa.” (Beto bantu metengimisa bisono.)

Ntangu yai Piere keyufula nde: “Mfumu, kingana yai ya nge me ta, yo kele kaka sambu na beto mpamba to sambu na bantu yonso?”

Na kisika ya kupesa mvutu na mbala mosi, Yezu meta kingana ya nkaka. Yandi meyufula nde: “[Nani kibeni kele mpika ya kwikama, yina mfumu na yandi tatula yandi na zulu ya kibuka ya bantu yai yonso sambu na kupesa bau madya na bau na ntangu ya mbote, NW]? Kiese na mpika yina, kana mfumu na yandi kwisa kukuta yandi ke sala mambu ya mutindu yina! Mono ke tubila beno mambu ya kieleka: mfumu yina ta pesa mpika yina kiyeka ya kutala bima na yandi yonso.”

Na ntembe ve, “mfumu“ ya bau ketubila awa kele Yezu Kristu. “Mpika” kele kifwani ya “kibuka ya fyoti” ya balongoki na kimvuka, mpi “kibuka ya bantu” ketendula kaka kibuka yai mosi ya bantu 144000 yina kebaka Kimfumu ya zulu, kansi ntubilu yai ketendula kisalu ya mosi mosi na kati na bau kesala. “Bima” ya bau metula mpika ya kwikama na kusungimina kele mambote ya kimfumu ya mfumu na zulu ya ntoto, yina kele na kati na yau ti bantu ya tayalama na kimfumu na zulu ya ntoto.

Na kulandaka kingana, Yezu memonisa nde bamambere ya kalasa ya nsadi to mpika yango yonso ve tavanda ya kwikama, na kutendulaka nde: “Kana mpika yina kutuba na ntima na yandi nde: ‘Mfumu na mono me sukinina na kwisa kuvutuka,’ ebuna ntangu yai, kana mpika yango yantika kubula bampika yina ya nkaka ya babakala ti ya bankento, kana yandi yantika kudia, kunwa ti kulauka malafu, mfumu na yandi ta kwisa kukuma na kilumbu yina ya mpika yango ke vingila yandi ve . . . Mfumu ta pesa yandi ndola ya ngolo mpenza.”

Yezu kemonisa nde kukwisa na yandi menataka ntangu ya tiya sambu na Bayuda, mutindu bamosi kendima mpi bankaka kebuya malongi na yandi. Bamvula kuluta tatu na ntwala, yandi kubakaka mbotika na masa, kansi ntangu yai mbotika na yandi na kati ya lufwa kele na kufinama kibeni sambu na kusalama, mpi mutindu yandi ketuba nde: “Ebuna ntangu yai ya mono ke vingila yo, mono ke mona mpasi mingi na ntima!”

Na nima ya kutuba mambu yai na balongoki na yandi, Yezu metubila dyaka bibuka. Yandi kewa mawa sambu na kubuya na bau ya ntu-ngolo sambu na kundima nzikisa ya pwelele ya ketadila yina ya yandi kele mpi ntendula na yau. Yandi ketuba nde: “Kana beno mona dituti me telama na ndambu ya weste, beno ke tuba nswalu nde: ‘Mvula [ya ngolo] ke noka,’ ebuna yo ke nokaka mpi. Diaka, kana beno mona mupepe me katuka na ndambu ya sude ke kwisa kuluta, beno ke tubaka nde: ‘Mwini ta vanda mingi,’ ebuna mwini ke vandaka mingi mpi. Beno bantu ya luvunu, kana beno zaba kumona diswaswanu mutindu ntoto ti zulu ke monikaka, ebuna sambu na nki beno ke bakisa mambu ya ntangu yai ve?” Luka 12:​32-59.

▪ Bantu ikwa kele na kati ya “kibuka ya fyoti,” mpi inki bau kebaka?

▪ Inki mutindu Yezu kemonisa na bansadi na yandi mfunu ya mingi ya kuvanda ya kuyilama?

▪ Na kingana ya Yezu, nani kele “mfumu,” “mpika,” “kimvuka ya bantu,” mpi “bima”?