Kapu 79

Dikanda Mosi Mevila, Kansi Yonso Ve

NTANGU fyoti na nima ya disolo ya Yezu ti bayina ya kuvukanaka na nganda ya nzo ya Mufarize, bantu ya nkaka ketela yandi “nsangu ya bantu ya Galilea yina ya Pilate [guvernere ya Roma, Ponse] fwaka ntangu bo vandaka ke pesa makabu ya [ki]menga.” Mbala ya nkaka bantu ya Galilea yina, kele bayina bau kufwaka ntangu mafunda ya Bayuda kutelamaninaka mutindu Pilate vandaka kusadila mbongo ya kibumbilu ya tempelo ya kutungila kanale ya kukotisila masa na kati ya Yeruzalemi. Bayina ketela Yezu mambu yai lenda kuvanda bau kepesa ngindu nde bantu ya Galilea kumonaka mpasi yina sambu na bisalu na bau mosi ya mbi.

Kansi, Yezu mesungika bau, na kuyufulaka nde: “Beno ke banza nde kana bantu yina ya Galilea fwaka mpidina, yo ke songa nde bo vandaka kusala masumu kuluta bantu ya nkaka yonso ya Galilea?” Yezu kevutula nde: “Ve!” Na nima yandi mesadila okazio yango sambu na kukebisa Bayuda nde: “Kana beno balula ntima ve, beno yonso ta fwa mutindu mosi bonso bo.”

Na kulandaka, Yezu meyibusa dyambu ya nkaka ya mpasi yina mekatuka kusalama na kisika yina, mbala ya nkaka yau kele na kuwakana ti lutungu ya kanale yina. Yandi keyufula nde: “Ebwe sambu na bantu yina kumi na nana fwaka ntangu nzo ya nda yina vandaka penepene na kiziba ya Siloe kwisaka kubwila bo? Keti beno ke banza nde bo vandaka mbi kuluta bantu ya nkaka yonso ya Yeruzalemi?” Yezu ketuba nde, ve, bantu yai kufwaka ve sambu na mambi na bau. Kansi, “ntangu mpi mambu ya kukonda kukana” kevandaka mbala mingi na nto ya makambu ya mpasi ya mutindu yai. Kansi, Yezu mesadila dyaka okazio yango sambu na kukebisa nde: “Kansi, . . . kana beno balula ntima ve, beno yonso ta fwa mutindu mosi bonso bo.”

Na nima, Yezu melanda na kuta kingana mosi ya kufwana kibeni, na kutendulaka nde: “Kuvandaka na muntu mosi, yandi vandaka na nti ya bafige ya yandi kunaka na bilanga na yandi. Yandi kwendaka kusosa bafige, kansi yandi monaka yo ve. Ebuna yandi tubilaka muntu ke salaka na bilanga na yandi nde: ‘Tala, katuka bamvula tatu, mono ke kwisaka kusosa bambuma na nti yai, kansi mono ke monaka yo ve. Zenga yo! Sambu na nki yo ke vanda mpamba-mpamba na bilanga?’ Kansi muntu yina vandaka kukeba bilanga nde: ‘Patro, bika yo vanda mpidina na mvula yai; mono ta bundula ntoto na nsi ya nti yango, ebuna mono ta tula mvindu ya bambisi. Ebuna, kana yo buta bambuma na mvula ke kwisa, mambu ve; kansi kana yo buta ve, nge ta zenga yo.’ ”

Na kiteso ya bamvula kuluta tatu, Yezu kemekaka na kukuna lukwikilu na kati ya dikanda ya Bayuda. Kansi kaka ndambu ya bankama ya balongoki lenda kutangama bonso bambuma ya bikesa na yandi. Ntangu yai, na mvula yai ya iya ya kisalu na yandi, yandi kekumisa bikesa na yandi ngolo, na mutindu ya kifwani, na kubundulaka mpi na kutulaka mvindu ya bimbisi na nsi ya nti ya bafige ya Bayuda na kusamunaka na kikesa yonso mpi na kulongaka na Yudea ti na Perea. Kansi na mpamba! Dikanda mebuya na kubalula ntima mpi mpila yina yau kele na nzila ya mbungulu. Kaka nsadila ya dikanda yango kendima.

Na nima ya ntangu fyoti, Yezu kelonga na sinagoga na Kisabatu. Kuna yandi memona nkento mosi yina, sambu na mpeve ya mbi ya ketungisaka yandi, mekumaka ti nkuki bamvula 18 melunga. Na mawa yonso, Yezu metubila yandi nde: “Mama yai, maladi na nge me mana.” Ebuna Yezu metula yandi diboko na yandi, mpi na mbala mosi yandi mesungama mpi meyantika na kukumisa Nzambi.

Kansi, ntwadisi ya sinagoga mewa makasi. Yandi kebuya nde: “Bilumbu kele sambanu sambu na kusala kisalu. Beno kwisa na bilumbu yina sambu bo belula beno, kansi na [kisabatu, NW] ve!” Mpila yina, ntwadisi yango kendima ngolo ya Yezu ya kubelula kansi yandi kebuyisa bantu na kwisa kusosa kubeluka na Kisabatu!

Yezu mevutula nde: “Beno bantu ya luvunu! Na [kisabatu, NW], nani na kati na beno ke basisaka ve ngombe na yandi to mpunda na yandi na nzo ya yo ke dilaka sambu na kunata yo na kwenda kunwa masa? Tala nkento yai mwana ya Abrahami; Satana kangaka yandi me luta bamvula kumi na nana. Keti yo kele mfunu ve na kukatula yandi na bansinga na [kisabatu, NW]?”

Ebuna, ntangu bau mewa mpila yina, bayina ketelamanina Yezu meyantika na kuwa nsoni. Kansi, kibuka keyangalala sambu na mambu ya lukumu ya bau kemona Yezu kesala. Sambu na kupesa mvutu, Yezu mevutukila bingana zole ya mbikudulu yina ketadila Kimfumu ya Nzambi, mosi na kati na yau yandi kutaka yau ntangu yandi vandaka na bwatu na Nzadi ya Galilea kiteso ya mvula mosi na ntwala. Luka 13:​1-21; Longi 9:​11, NW; Matayo 13:​31-33.

▪ Inki mambu ya mpasi metubilama awa, mpi inki dilongi Yezu kebasisa na kati na yau?

▪ Na inki dyambu beto lenda kuwakanisa kingana ya nti ya bafige yina kebutaka ve bambuma, ti bikesa ya mesalama sambu na kubutisa yau bambuma?

▪ Inki mutindu ntwadisi mendima kingangu ya Yezu ya kubelula, kansi inki mutindu Yezu metungulula luvunu ya muntu yango?