Kapu 81

Bau Mesosa Dyaka na Kufwa Yezu

SAMBU yai kele hiver, Yezu kele na kutambula na ndambu ya kibumbaninu ya kyelo yina bau kebingaka velanda ya Salomo. Yau kele na mbela ya tempelo. Awa Bayuda mezyunga yandi mpi meyantika na kutuba nde: “Nki ntangu nge ta pesa beto mvutu? Tubila beto mbote-mbote kana nge kele Mesia.”

Yezu mevutula nde: “Mono me tubila beno ntete, kansi beno ke kwikilaka ve.” Yezu kutubilaka bau ve mbala mosi nde yandi kele Kristu, mutindu yandi tubilaka nkento ya Samaria na dibulu ya masa. Kansi ya kyeleka, yandi tubaka nani yandi kele ntangu yandi tendudilaka bau nde yandi katukaka na zulu mpi nde yandi zingaka na ntwala ya Abrahami.

Kansi, Yezu kezola bantu kubakisa bau mosi nde yandi kele Kristu na kufwanisaka bisalu na yandi ti mambu yina ya Biblia kutubaka na ntwala nde Kristu tasala. Yau yina, yandi yitaka kubuyisa balongoki na yandi na kutubila konso muntu yina nde yandi kuvanda Kristu. Mpi yau yina ntangu yai, yandi kelanda na kutubila Bayuda yai ya ntu-ngolo nde: “Bisalu ya mono ke salaka na kiyeka ya Tata na mono, yo ke songaka kitemwe ya mbote sambu na mono. Kansi beno ke kwikilaka ve.”

Sambu na inki bau kekwikilaka ve? Sambu nzikisa yina kemonisa nde Yezu kele Kristu kekonda? Ve, kansi sambu na kikuma ya Yezu kepesa ntangu yandi ketubila bau nde: “Beno kele mameme na mono ve. Mameme na mono ke waka ndinga na mono; mono zaba bo, bo ke landaka mono. Mono ke pesaka bo moyo ya mvula na mvula; bo ta fwa ve. Ata muntu mosi ve ta botula bo na maboko na mono. Bayina ya Tata na mono me pesaka mono bo me luta bo yonso; ata muntu mosi ve lenda botula bo na maboko ya Tata.”

Na nima, Yezu metendula kuwakana na yandi ya ngolo ti Tata na yandi, na kutendulaka nde: “Tata ti mono beto kele muntu mosi kaka.” Sambu Yezu kele na zulu ya ntoto mpi Tata na yandi kele na zulu, yau kemonana pwelele nde yandi kele na kutuba ve nde yandi ti Tata na yandi kele muntu mosi na mutindu mosi ya kyeleka, to na kinsuni. Kansi, yandi kezola kutuba nde bau kele na lukanu mosi, nde bau kele ya kuvukana.

Na makasi yonso sambu na bangogo ya Yezu, Bayuda melokuta matadi sambu na kufwa yandi, kaka mutindu bau salaka na ntwala, na ntangu ya Nkinsi ya Bisasa. Na kutalaka bantu yina kezola kufwa yandi na kikesa yonso, Yezu ketuba nde: “Mono salaka bisalu mingi ya mbote na meso na beno na ngolo ya Tata. Na kati ya bisalu yina yonso, sambu na nki kisalu beno ke zola kufwa mono na matadi?”

Bau kevutula nde: “Beto ke zola kufwa nge na matadi ve sambu na kisalu ya mbote ya nge salaka, kansi sambu nge ke vwenza Nzambi: Nge kele kaka muntu, kansi nge ke kuditula na kisika ya [n]zambi.” Sambu Yezu metubaka ve ata fyoti nde yandi kele nzambi, sambu na inki Bayuda ketuba dyambu yai?

Na ntembe ve, yau kele sambu Yezu kudipesaka biyeka yina bau kekwikilaka nde yau kele kaka ya Nzambi. Mu mbandu, yandi mekatuka kutubila “mameme,” nde “mono ke pesaka bo moyo ya mvula na mvula,” yina kele dyambu mosi ya muntu ata mosi ve lenda kusala. Kansi, Bayuda kevila dyambu ya kyeleka ya kemonisa nde Yezu kendimaka nde yandi kubakaka kiyeka na Tata na yandi.

Na nima, kuyufulaka ngyufula, Yezu kemonisa nde yandi kele na nsi ya Nzambi: “Na mikanda na beno ya Bansiku [na Nkunga 82:6] bo sonikaka nde Nzambi tubaka nde: ‘Beno kele banzambi.’ . . . [Kana yandi bingaka ‘banzambi’ bantu yina ndinga ya Nzambi kukwisaka kontre bau, NW] . . . Kansi mono, Nzambi solaka mono, ebuna yandi tindaka mono awa na nsi-ntoto. Nki mutindu beno ke tuba nde mono ke vwenzaka Nzambi, sambu mono vandaka kutuba nde mono kele Mwana-Nzambi?”

Sambu Masonuku kebinga nkutu bazuzi ya bantu ya kukonda lunungu nde “banzambi,” inki mbi Bayuda yai lenda kumona Yezu sambu yandi ketuba nde: “Mono kele Mwana-Nzambi”? Yezu keyika nde: “Kana mono ke sala bisalu ya Tata na mono ve, mfunu kele ve beno na kukwikila mono. Kansi kana mono ke sala yo, ata beno ke kwikilaka mono ve, kansi mbote beno kwikila sambu na bisalu na mono. Mpidina beno ta zaba mbote-mbote nde Tata kele na mono, mono kele na Tata.”

Ntangu Yezu metuba dyambu yai, Bayuda memeka na kukanga yandi. Kansi yandi metina, mutindu yandi salaka na ntwala na Nkinsi ya Bisasa. Yandi mekatuka na Yeruzalemi mpi mesabuka na simu ya Nzadi ya Yordani, kuna Yoane yantikaka na kubotika kiteso ya bamvula iya na ntwala. Kisika yai kemonana nde yau kele ve ntama ti mbela ya ndambu ya Sudi ya Nzadi ya Galilea, yau kebakaka kiteso ya bilumbu zole na kutambula na makulu katuka na Yeruzalemi.

Bantu mingi kekwisa na Yezu na kisika yai mpi meyantika na kutuba nde: “Yoane salaka ata kidimbu mosi ve, kansi mambu yonso ya yandi tubaka sambu na muntu yai kele ya kieleka.” Yau yina, na kisika yai bantu mingi kukwikilaka na Yezu. Yoane 10:​22-42; 4:26; 8:​23, 58; Matayo 16:⁠20.

▪ Na nsadisa ya inki Yezu kezola nde bantu kuzabila yandi bonso Kristu?

▪ Inki mutindu Yezu ti Tata na yandi kele muntu mosi?

▪ Yau kemonana nde sambu na inki Bayuda ketuba nde Yezu kekudikumisa nzambi?

▪ Inki mutindu mambu yina kele na Nkunga ya Yezu metubila kemonisa nde yandi ketuba ve nde yandi kele kiteso mosi ti Nzambi?