Kapu 88

Mvwama ti Lazare

YEZU vandaka kutubila balongoki na yandi mambu yina metala mutindu ya mbote ya kusadila bimvwama ya kinsuni, na kutendulaka nde beto lenda ve kuvanda bampika na yau mpi na mbala mosi kuvanda bampika ya Nzambi. Bafarize mpi kewidikila, mpi bau meyantika na kuseka Yezu sambu bau kezolaka mbongo. Ebuna yandi metubila bau nde: “[Beno ketubaka beno mosi nde beno kele bantu ya lunungu, NW] na meso ya bantu, kansi Nzambi zaba ntima na beno. Sambu mambu yina ya bantu ke monaka nde yo kele mambu ya mfunu, Nzambi ke monaka nde yo kele mambu ya mpamba.”

Ntangu ya kubalula bamvwandilu sambu na bantu yina kele bamvwama na bima ya nsi-ntoto, na kiyeka ya politiki, ti na lutwadisu ti bupusi ya lusambu melunga. Bau fwete kubwa. Kansi, bayina kekudibanzaka sambu na mpusa na bau ya kimpeve fwete kutombusama. Yezu kemonisa nsoba ya mutindu yina ntangu yandi kelanda na kutubila Bafarize nde:

“Mikanda ya Bansiku ti mikanda ya baprofete yo vandaka kaka tii ntangu ya Yoane-Batiste yantikaka kisalu na yandi. Katuka ntangu yina, bo ke zabisaka Nsangu ya Mbote sambu na Kimfumu ya Nzambi, ebuna bantu yonso ke mekaka kukota muna na kingolo-ngolo. Zulu ti ntoto lenda vila kukonda mpasi, kansi kamwa-kisono ya fioti ya mikanda ya Bansiku na kuvila, yo kele mpasi mingi.”

Balongi ya Bansiku ti Bafarize ketubaka na lulendo yonso nde bau kele ya kukangama na Nsiku ya Moize. Yibuka nde Ntangu Yezu kubelulaka kifwa-meso na mutindu mosi ya kimangu na Yeruzalemi, bau kubulaka ntulu nde: “Beto kele balonguki ya Moize! Beto zaba nde Nzambi tubanaka na Moize.” Kansi ntangu yai Nsiku ya Moize melungisa lukanu na yau ya kunata bantu ya kudikulumusa na Ntotila ya kusolamaka na Nzambi, Yezu Kristu. Yau yina, tuka luyantiku ya kisalu ya Yoane, bantu ya mitindu yonso, mingimingi bantu ya kudikulumusa ti bansukami, kele na kudipesa sambu na kukuma bantu yina tayalama na Kimfumu ya Nzambi.

Sambu Nsiku ya Moize kele na kulungana ntangu yai, ntuma ya kulunda yau fwete kukatulama. Nsiku kepesa nzila na kufwa makwela na bikuma ya mutindu na mutindu, kansi Yezu ketuba ntangu yai nde: “Konso muntu yina me bikisa nkento na yandi, me kwela nkento ya nkaka, yandi me sala [bizumba, NW]; muntu yina me kwela nkento yina ya bakala ya nkaka me bikisa, yandi me sala [bizumba, NW].” Makasi ya inki mutindu ntubilu ya mutindu yai fwete kupesa Bafarize, mingimingi sambu bau kepesaka nzila na kufwa makwela na bikuma ya mutindu na mutindu!

Na kulandaka kutubila Bafarize, Yezu meta kingana mosi yina kemonisa nkadilu to mvwandilu ya bantu zole yina kusobaka nsukansuka na mutindu mosi ya kuyituka. Keti nge lenda kuzaba bantu yango kele banani mpi inki kusoba ya mvwandilu na bau ketendula?

Yezu ketendula nde: “Kuvandaka na mvwama mosi, yandi vandaka kulwata bilele ya [mpumbu ti ya lino ya kitoko, NW]. Konso kilumbu, yandi vandaka kusala fete ya nene. Kuvandaka mpi na nsukami mosi, zina na yandi Lazare. Yandi vandaka na bamputa mingi na nitu na yandi. Yandi vandaka kulala penepene na kielo ya nzo ya mvwama yina. Yandi vandaka kuzola kudia bamwa-ndambu ya bima yina vandaka kubwa na nsi ya mesa ya mvwama yina, sambu yandi kufuluka. Bambwa mpi vandaka kwisa kulekita bamputa na yandi.”

Awa Yezu kesadila mvwama sambu na kufwanisa bamfumu ya mabundu ya Bayuda, na kati na bau Bafarize ti balongi ya Bansiku mpamba ve, kansi mpi Basaduse ti bambuta ya banganga-Nzambi. Bau kele bamvwama na mabaku mpi mikumba ya mbote ya kimpeve, mpi bau kekuditwadisaka bonso mvwama vandaka kusala. Bilele na bau ya mpumbu ya kitoko kemonisa pozisio na bau ya lemvo, mpi lino ya mpembe kele kifwani ya lunungu ya bau kekudipesaka.

Kalasa ya mvwama yai ya lulendo ketadilaka bansukami, bonso bantu ya mpamba ti luvwezo, na kubingaka bau ‛am ha·’aʹrets, to bantu ya ntoto. Mulombi Lazare kele kifwani ya bantu yai ya bamfumu ya mabundu kepimisaka madya ya kimpeve ya mbote ti mabaku. Yau yina, bonso Lazare yina kele ya kufuluka na bamputa, bantu ya mpamba bau ketalaka bau ti nzanzi bonso bantu ya kubela na kimpeve yina mefwana kaka na kusala kinduku ti bambwa. Kansi, bayina kele na kalasa ya Lazare kele na nzala mpi na kiwina ya madya ya kimpeve mpi, mpila yina bau kele na kyelo, na kusosaka kuzwa konso binsengensenge ya madya ya kimpeve yina lenda kubwa na nsi ya mesa ya mvwama.

Ntangu yai, Yezu kelanda na kutendula bansoba ya nkadilu ya mvwama ti ya Lazare. Inki kele bansoba yango, mpi yau kele kifwani ya inki?

Luzingu ya Mvwama Ti ya Lazare Mesoba

Mvwama kele kifwani ya bamfumu ya dibundu yina kele na lemvo na mabaku ya kimpeve ti mikumba, mpi Lazare kele kifwani ya bantu ya mpamba yina kele na nzala ya madya ya kimpeve. Yezu kelanda nkenda na yandi, na kutendulaka nsoba ya ngituka na bankadilu ya bantu yango.

Yezu ketuba nde: “Ntangu yai, nsukami yina fwaka, ebuna bawanzio kwisaka kubaka yandi, bo nataka yandi penepene na Abrahami. Mvwama yina mpi fwaka, ebuna bantu kwendaka kuzika yandi. Yandi vandaka kumona mpasi mingi na [Hadesi, NW]. Yandi talaka [na zulu, sambu yandi vandaka na mpasi, NW], ebuna yandi monaka Abrahami kuna ntama, ti Lazare me vanda [na ntulu na yandi, NW].”

Sambu mvwama ti Lazare kele ve bantu ya kyeleka kansi kele kifwani ya bakalasa ya bantu, na kutuba ya mbote lufwa na bau kele mpi ya kifwani. Lufwa na bau kele kifwani ya inki to yau kesongidila inki?

Yezu mekatuka kumanisa na kutubila nsoba ya bankadilu na kutubaka nde ‘mikanda ya Bansiku ti mikanda ya baprofete yo vandaka kaka tii na ntangu yina Yoane-Batiste yantikaka kulonga. Katuka ntangu yina, bo ke zabisaka Nsangu ya Mbote sambu na Kimfumu ya Nzambi.’ Ebuna kele kisalu ya kusamuna ya Yoane ti ya Yezu Kristu kenata lufwa ya mvwama ti ya Lazare sambu na yina metala bamvwandilu na bau ya ntama, to bankadilu.

Bayina ya kudikulumusa, kalasa ya Lazare ya kubalula ntima kefwa na nkadilu na bau ya kimpeve ya ntama mpi kekwisa na pozisio ya lemvo ya Nzambi. Kansi ntete bau vandaka kutula meso na bamfumu ya dibundu sambu na kulokuta yina ya fyoti ya vandaka kubwa na mesa ya kimpeve, ntangu yai bakyeleka ya Masonuku ya Yezu kemonisa kele na kulungisa bampusa na bau. Na yau, bau menatama penepene na ntulu, to na pozisio ya lemvo ya Abrahami ya Nene, Yehowa Nzambi.

Na ndambu ya nkaka, bayina kele na kalasa ya mvwama kebuyama na Nzambi sambu bau kekwamina na kubuya kundima nsangu ya Kimfumu ya Yezu kelonga. Yau yina, bau kefwa na pozisio na bau ya ntama ya vandaka bonso ya lemvo. Ya kyeleka, yau ketubama sambu na bau nde bau kenyokwama na mutindu mosi ya kifwani. Ntangu yai, widikila mutindu mvwama ketuba:

“Tata Abrahami, wila mono mawa. Tinda Lazare yandi kutula nsongi ya musapi na yandi na masa sambu na kwisa kutula madidi na zulu ya ludimi na mono, sambu mono ke mona mpasi mingi na tiya yai.” Bansangu ya ngolo ya mfundusu ya Nzambi yina balongoki ya Yezu kesamunaka kele yau yina ya kunyokulaka bantu ya kalasa ya mvwama. Bau kezola nde balongoki kuyambula na kusamuna bansangu yai, mpila yina na kupesaka bau mwa ndembikilu na kati ya mpasi na bau.

“Kansi Abrahami nde: ‘Mwana na mono, yindula fioti, ntangu nge vandaka na moyo nge vandaka kumona kiese mingi. Kansi Lazare vandaka kumona mpasi mingi. Ebuna ntangu yai, yandi ke mona mbote awa, kansi nge, nge ke mona mpasi. Diaka, ke na dibulu ya nene ke kabula beto ti beno. Yo yina, mpila kele ve bantu yai kele kwaku na beto na kwisa kuna na beno, mpila mpi kele ve bantu yina kele kuna na beno na kwisa kwaku na beto.’ ”

Yau kele kibeni lunungu mpi yau mefwana nde nsoba ya kuyituka ya mutindu yai kusalama na kati ya kalasa ya Lazare ti kalasa ya mvwama! Nsoba ya bankadilu melungisama mwa bangonda na nima na Pantekoti ya mvu 33 T.B., ntangu Nsiku ya ntama ya ngwakana meyingisama na ngwakana ya mpa. Na ntangu yina yau kekuma kibeni pwelele nde balongoki, kansi Bafarize ve ti bamfumu ya nkaka ya mabundu, bantu kele na lemvo ya Nzambi. “Dibulu ya nene” yina kekabisa mvwama ya kifwani ti balongoki ya Yezu kele kifwani ya mfundusu ya Nzambi yina kesobaka ve mpi ya lunungu.

Na nima, mvwama kelomba nde: “Tata [Abrahami] . . . tinda Lazare na nzo ya tata na mono, sambu mono ke na bampangi na mono tanu ya babakala kuna.” Mpila yai, mvwama kendima nde yandi kele na ngwisana ya ngolo ti tata ya nkaka, yina kele na masonga yonso Satana Dyabulu. Mvwama kelomba nde Lazare kulembika bansangu ya mfundusu ya Nzambi na mpila nde “bampangi” na yandi “tanu,” bankundi na yandi ya dibundu, kutulama ve na “kisika yai ya mpasi.”

“Abrahami nde: ‘Bo ke na mikanda ya Moize ti mikanda ya baprofete. Bo landa mambu yina kele muna.’ ” Ee, kana “bampangi tanu” yina kezola kutina mpasi, kima ya bau fwete kusala kele kutula dikebi na masonama ya Moize ti ya bambikudi yina kemonisa Yezu bonso Mesia mpi na nima bau kukuma balongoki na yandi. Kansi mvwama mebuya nde: “Ve, tata Abrahami, . . . kana muntu mosi na kati ya bantu yina me fwaka kwenda kuna na bo, mpidina bo ta balula ntima.”

Kansi, yandi mevutudila yandi nde: “Kana bo buya na kulanda mambu yina kele na mikanda ya Moize ti na mikanda ya baprofete, bo ta mona mfunu ya kubalula ntima ve, ata bo mona muntu yina me telama na lufwa.” Nzambi tapesa ve bidimbu to bimangu ya sipesiali sambu na kundimisa bantu. Bau fwete kutanga mpi kusadila Masonuku kana bau kezola kubaka lemvo na yandi.  Luka 16:​14-31; Yoane 9:28, 29; Matayo 19:​3-9; Galatia 3:24; Kolosai 2:14; Yoane 8:44.

▪ Sambu na inki lufwa ya mvwama ti ya Lazare fwete kuvanda ya kifwani, mpi lufwa na bau kele kifwani ya inki?

▪ Tuka luyantiku ya kisalu ya Yoane, inki nsoba Yezu memonisa nde yau kesalama?

▪ Inki fwete kukatulama na nima ya lufwa ya Yezu, mpi inki mutindu yau tasimba dyambu yina metala kufwa makwela?

▪ Na kingana ya Yezu, mvwama ti Lazare kele kifwani ya banani?

▪ Inki bampasi mvwama kemona, mpi na nzila ya inki yandi kelomba nde bau kulembika bau?

▪ “Dibulu ya nene” kele kifwani ya inki?

▪ Tata ya kyeleka ya mvwama kele nani, mpi bampangi na yandi tanu ya babakala kele banani?