Kapu 92

Bantu Kumi ya Lepre Mebelulama na Nzyetolo ya Nsuka ya Yezu na Yeruzalemi

YEZU mebalula bikesa ya Sanedreni ya mesosa kufwa yandi na kukatukaka na Yeruzalemi mpi na kukwendaka na mbanza ya Efrayimi, ngatu kiteso ya bakilometere 25 na ndambu ya nordi-esti ya Yeruzalemi. Kuna yandi mevanda ti balongoki na yandi, ntama ti bambeni na yandi.

Kansi, ntangu ya Paki ya mvu 33 T.B. kele na kufinama, mpi ntama ve Yezu kevutuka dyaka. Yandi mekwendila na Samaria mpi memata tii na Galilea. Yai kele mbala ya nsuka ya yandi kekwenda na ndambu yai na ntwala ya lufwa na yandi. Ntangu yandi kele na Galilea, yau kemonana nde yandi ti balongoki na yandi mevukana ti bantu ya nkaka yina kele na nzila sambu na kwenda na Yeruzalemi na kuta nkinsi ya Paki. Bau mebaka nzila yina kelutilaka na distrike ya Perea, na esti ya Nzadi ya Yordani.

Na luyantiku ya nzyetolo, ntangu Yezu kekota na bwala mosi ya Samaria to ya Galilea, bantu kumi ya lepre kekwisa kukutana ti yandi. Maladi yai ya ngolo kedyaka malembemalembe bitini ya nitu ya muntu​—⁠misapi na yandi ya maboko, ya makulu, mbombo, ti bikobo na yandi. Sambu na kutanina bantu ya nkaka na nsambukila, Nsiku ya Nzambi ketuba mpila yai sambu na yina metala muntu ya lepre: “Yandi fweti fika munoko na yandi, ebuna yandi fweti tuba na ndinga ya ngolo nde: ‘[Mvindu, mvindu, NW]!’ . . . Yandi ta bikalaka kaka mpidina kana yandi me beluka ntete ve. Yandi ta zingaka kaka yandi mosi na kingenga, ntama na bwala.”

Bantu ya lepre yina kumi kelanda Bansiku ya bantu ya lepre mpi bau mebikala ntama ti Yezu. Kansi, bau keboka na ndinga ya ngolo nde: “Yezu! Mfumu! Wila beto mawa!”

Na ntangu yandi memona bau na ntama, Yezu mepesa ntuma nde: “Beno kwenda kudisonga na banganga-Nzambi.” Yezu metuba mpila yina sambu Nsiku ya Nzambi kepesaka nswa na banganga-Nzambi na kutubila bantu ya lepre yina mebeluka na maladi na bau nde bau kele ya kugedila. Mpila yina bantu ya mutindu yai kendimamaka na kuzinga dyaka ti bantu yina kele na mavimpi ya mbote.

Bantu yina kumi ya lepre ketula ntima na ngolo ya kimangu ya Yezu. Ebuna bau kekwenda nswalu sambu na kumona banganga-Nzambi, ata nkutu bau mebeluka ntete ve. Ntangu bau kekwenda na nzila, lukwikilu na bau na Yezu mebaka nsendo. Bau meyantika na kumona mpi na kudiwa nde mavimpi na bau kevutuka!

Bantu uvwa na kati ya bantu ya lepre yina megedisama kelanda na kukwenda na nzila na bau, kansi muntu ya lepre yina ya nkaka, muntu ya Samaria, mevutuka na kusosa Yezu. Sambu na inki? Sambu yandi kele na ntonda mingi sambu na dyambu yina mekumina yandi. Yandi kekumisa Nzambi na ndinga ya ngolo, mpi ntangu yandi memona Yezu, yandi mefukama na makulu na yandi, na kutondaka yandi.

Sambu na kupesa mvutu Yezu ketuba nde: “Si bantu yina yonso kumi me beluka! Kansi wapi bantu yina ya nkaka uvwa? Kaka nzenza yai mpamba me kwisa kuvutuka sambu na kupesa Nzambi mersi?”

Ebuna yandi metubila muntu ya Samaria yina nde: “Telama, kwenda ka nge, lukwikilu na nge me belula nge.”

Ntangu beto ketanga mambu yina metala kubelula ya Yezu kubelulaka bantu ya lepre yai kumi, beto fwete kusimba dilongi ya kebasika na ngyufula na yandi: “Kansi wapi bantu yina ya nkaka uvwa?” Kukonda ntonda ya bantu yina uvwa kumonisaka kele kifu mosi ya ngolo. Bonso muntu ya Samaria, keti beto takudimonisa bantu ya ntonda sambu na mambu yonso ya beto kebakaka na Nzambi, na kati na yau lusilu ya kyeleka ya luzingu ya mvula na mvula na kati ya inza ya mpa ya lunungu ya Nzambi? Yoane 11:​54, 55; Luka 17:​11-19; Levi 13:​16, 17, 45, 46; Kusonga 21:​3, 4.

▪ Inki mutindu Yezu mesukisa bikesa ya kesosa kufwa yandi?

▪ Na nima, Yezu mekwenda na wapi, mpi na wapi yandi kekana na kukwenda?

▪ Sambu na inki bantu ya lepre metelama na ntama, mpi sambu na inki Yezu metubila bau na kwenda kumona banganga-Nzambi?

▪ Inki dilongi beto kebaka na disolo yai?