Kapu 96

Yezu ti Mfumu-toko ya Mvwama

NTANGU Yezu kele na kukwenda na distrike ya Perea na Yeruzalemi, toko mosi mebaka ntinu mpi mefukama na ntwala na yandi. Muntu yango kebingama mfumu, ngatu yau ketendula nde yandi kele ti pozisio mosi ya lukumu na sinagoga ya kisika yina to nkutu nde yandi kele mambere ya Sanedreni. Dyaka, yandi kele kibeni mvwama. Yandi keyufula nde: “Longi, nge muntu ya mbote. Nki mono fweti sala sambu na kubaka moyo ya mvula na mvula?”

Yezu mevutula nde: “Sambu na nki nge ke tuba nde mono ya mbote? Ata muntu mosi ve kele muntu ya mbote, kaka Nzambi mpamba.” Yau kemonana nde toko yango mesadila “mbote” bonso titre, ebuna Yezu memonisa yandi nde titre ya mutindu yina kele kaka ya Nzambi.

Yezu kelanda nde: “Kana nge zola vanda na moyo, landa bansiku.”

Muntu yango meyufula nde: “Nki bansiku?”

Na kutangaka bansiku tanu na kati ya kumi, Yezu mevutula nde: “Kufwa bantu ve; kusala [bizumba, NW] ve; kuyiba ve; [kuta kimbangi, NW] ya luvunu ve; zitisa tata na nge ti mama na nge.” Mpi na kuyikaka nsiku ya nkaka, Yezu ketuba nde: “Zola mpangi na nge bonso nge mosi.”

Muntu yango mevutula na masonga yonso nde: “Mono ke landaka bansiku yina yonso katuka kileki na mono.” “Nki mono fweti sala diaka?”

Na kuwidikilaka ngyufula ya muntu yango ya ngolo mpi ya kele ti bupusi, Yezu memonisa zola sambu na yandi. Kansi Yezu mebakisa kukangama ya muntu yango na bima ya kinsuni mpi yandi mebasisa kima ya yandi fwete kusala: “Kima mosi me konda nge. Kwenda kuteka bima na nge yonso, nge pesa mbongo na bansukami, ebuna nge ta vanda na kimvwama na zulu. Na nima, kwisa kulanda mono.”

Yezu ketala, na ntembe ve ti mawa yonso, mutindu muntu yango metelama mpi mebaluka na kukwenda ti mawa yonso. Kimvwama ya muntu yai mekanga yandi meso na kuzaba mbalu ya kimvwama ya kyeleka. Yezu metuba na mawa yonso nde: “Mpasi mingi na bamvwama na kukota na Kimfumu ya Nzambi!”

Bangogo ya Yezu meyitukisa balongoki. Kansi bau keyituka nkutu kuluta ntangu yandi kelanda na kutuba nsiku ya kimvuka: “Mbisi yai ya nene, shamo, fweti mona mpasi [ve] na kukota na munoko ya sindani, kansi mvwama fweti mona mpasi . . . na kukota na Kimfumu ya Nzambi.”

Balongoki keyufula nde: “Nani lenda guluka?”

Na kutalaka bau mbotembote na ntwala, Yezu kevutula nde: “Mambu yina ya bantu ke monaka mpasi na kusala, Nzambi ke monaka mpasi ve na kusala yo, sambu yandi lunga sala yonso.”

Na kubakisaka nde bau mesalaka nsola ya kuswaswana kibeni ti yina ya toko yina ya mvwama, Piere metuba nde: “Tala, beto me bikisaka bima na beto yonso sambu na kwisa kulanda nge.” Ebuna yandi meyufula nde: “Nki beto ta baka?”

Yezu mesila nde: “[Na ntangu ya lugangululu, NW], ntangu Mwana-muntu ta vanda na zulu ya kiti na yandi ya kimfumu ti lukumu, beno bantu yai kumi na zole ke landaka mono, beno mpi ta vanda na zulu ya bakiti kumi na zole ya kimfumu sambu na kusambisa makanda kumi na zole ya Israele.” Ee, Yezu kele na kumonisa nde lugangululu ya bankadilu na zulu ya ntoto tavanda na mpila nde bima tavanda mutindu yau kuvandaka na masamba ya Edeni. Mpi Piere ti balongoki ya nkaka tabaka nsendo ya kuyala ti Kristu na zulu ya Paladisu yai tafuluka na ntoto ya mvimba. Ya kyeleka, nsendo ya nene ya mutindu yina kele na mbalu kuluta kibansa!

Kansi, ata ntangu yai, bansendo kele, mutindu Yezu ketuba yau na nsyamu yonso nde: “Kana muntu kubikisa nzo na yandi, bampangi na yandi ya babakala to ya bankento, tata ti mama na yandi, bana na yandi, to bilanga na yandi sambu na mono, ti sambu na Nsangu ya Mbote, na bilumbu yai ya beto kele, yandi ta baka yina me luta yina ya yandi vandaka na yo ntete mbala nkama: banzo, bampangi ya babakala ti ya bankento, bamama, bana ti bilanga, kansi bo ta monisa yandi mpi mpasi. Ebuna na [Ngidika ya bima, NW] yina ke kwisa na ntwala, yandi ta baka moyo ya mvula na mvula.”

Mutindu Yezu kesila, konso kisika yina ya balongoki na yandi kekwendaka na inza, bau kesepelaka na bangwisana ya ngolo ti bankundi Bakristu, bangwisana ya mbalu ya kuluta yina ya bau vandaka kusepela na yau ti bamambere ya dibuta ya bau kubutukaka ti bau. Yau kemonana nde mfumu-toko ya mvwama mevidisa nsendo yai ti luzingu ya mvula na mvula na Kimfumu ya Nzambi ya zulu.

Na nima, Yezu keyika nde: “Kansi bantu mingi yina kele bantu ya ntete . . . bo ta kuma bantu ya nsuka, ebuna bantu mingi kele bantu ya nsuka . . . bo ta kuma bantu ya ntete.” Inki yandi kezola kutuba?

Yandi kezola kutuba nde bantu mingi yina kele “bantu ya ntete” na kusepela ti mabaku ya dibundu, bonso mfumu-toko ya mvwama, takota ve na Kimfumu. Bau tavanda “bantu ya nsuka.” Kansi bamingi, na kati na bau balongoki ya Yezu ya kudikulumusa, yina Bafarize ya kekudimonaka bantu ya lunungu kevwenzaka bonso “bantu ya nsuka”​—⁠bonso bantu ya ntoto, to ʽam ha·’aʹrets​—⁠takuma “bantu ya ntete.” Kukuma na bau “bantu ya ntete” ketendula nde bau tabaka dibaku ya kukuma bankundi bamfumu ya Kristu na Kimfumu. Marko 10:​17-31; Matayo 19:​16-30; Luka 18:​18-30.

▪ Na mpila yau kemonana, mfumu-toko ya mvwama yai kele mfumu ya inki mutindu?

▪ Sambu na inki Yezu mebuya na kubingama muntu ya mbote?

▪ Inki mutindu dyambu yina mekumina mfumu-toko kemonisa kigonsa ya kuvanda mvwama?

▪ Inki bansendo Yezu mesila balandi na yandi?

▪ Inki mutindu bantu ya ntete kekuma bantu ya nsuka, mpi bantu ya nsuka bantu ya ntete?