Kapu 109

Yezu Mebedisa Batelemini na Yandi

YEZU mekangisa kibeni batelemini na yandi munoko na mpila nde bau kebanga na kuyufula yandi kima ya nkaka. Ebuna yandi meyantika na kutungulula kukonda kuzaba na bau ya mambu. Yandi meyufula nde: “Nki beno ke banzaka sambu na Mesia? Yandi fweti vanda mwana ya nani?”

Bafarize mevutula nde: “Ya Davidi.”

Ata nkutu Yezu kebuya ve nde Davidi kele nkaka ya kinsuni ya Kristu, to Mesia, yandi meyufula nde: “Nki mutindu mpeve ya Nzambi songaka Davidi [na Nkunga 110] na kubinga Mesia ‘Mfumu [na mono, NW]’? Sambu Davidi tubaka nde ‘Mfumu Nzambi tubilaka Mfumu na mono nde: Vanda awa na diboko na mono ya kibakala tii kuna ya mono ta tula bambeni na nge [bonso kazune na nsi, NW] ya makulu na nge?’ Ebuna, kana Davidi bingaka yandi nde ‘Mfumu,’ nki mutindu Mesia lenda vanda diaka mwana ya Davidi?”

Bafarize mevanda pima, sambu bau kezaba ve Kristu to mupakulami kele kibeni nani. Mesia kele kaka ve muntu mosi ya kubutukaka na divumu ya Davidi, bonso Bafarize kekwikila, kansi yandi zingaka na zulu mpi yandi vandaka mbuta ya Davidi, to Mfumu.

Ntangu yai, na kubalukaka na bibuka mpi na balongoki na yandi, Yezu mekebisa bau sambu na yina metala balongi ya Bansiku ti Bafarize. Sambu bau yai kelongaka Nsiku ya Nzambi, na “kubakaka kiti ya Moize,” Yezu kekebisa nde: “Beno fweti lemfuka . . . ti kulanda mambu yonso ya bo ke tubilaka beno.” Kansi yandi keyika nde: “Beno landa bikalulu na bo ve, sambu bo ke salaka ve mambu yina ya bo ke longaka bantu ya nkaka na kusala.”

Bau kele bantu ya luvunu, mpi Yezu ketungulula bau na bangogo ya yandi kusadilaka ntangu yandi vandaka kudya madya ya midi na nzo ya Mufarize mwa bangonda na ntwala. Yandi ketuba nde: “Mambu yina yonso ya bo ke salaka, bo ke salaka yo sambu na kudisonga na bantu.” Na nima yandi mepesa bambandu, na kutubaka nde:

“Bo ke lwataka babwate [yina bau kekumisaka, NW] kuluta nene ya baverse ya Mukanda ya Nzambi na ilungi na bo ti na maboko na bo.” Babwate ya fyoti ya bau kelwataka na ilungi to na diboko, kele ti bitini iya ya Nsiku: Kubasika 13:​1-10, 11-16; ti Kulonga 6:​4-9; 11:​13-21. Kansi Bafarize kekumisa babwate yango nene sambu na kupesa ngindu nde bau kele kikesa na mambu yina metala Nsiku.

Yezu melanda nde: “Bo ke tulaka malenda ya nda na nsuka ya bilele na bo.” Na Kutanga 15:​38-40 bantu ya Izraele mepesama ntuma ya kutula malenda na bilele na bau, kansi Bafarize kekumisa yau nda mingi kuluta ya bantu ya nkaka. Mambu yonso kesalama sambu na kudimonisa! Yezu ketuba nde: “Bo kezolaka kuvanda na bisika ya luzitu.”

Mawa mingi, balongoki na yandi mosi kubakaka mawi yai ya kusosa lukumu. Yau yina, yandi kepesa ndongisila nde: “Kansi beno, muntu lenda binga beno ve nde ‘Longi,’ sambu beno kele bampangi, beno ke kaka na Longi mosi mpamba. Ebuna awa na nsi ntoto beno lenda binga ata muntu mosi ve nde ‘Tata,’ sambu beno ke kaka na Tata mosi mpamba yina kele na zulu. Muntu lenda binga beno nde ‘[ntwadisi, NW]’ mpi ve, sambu beno ke kaka na [Ntwadisi] mosi mpamba, nde Mesia.” Balongoki fwete kudikandikila mpusa ya kuvanda bantu ya ntete. Yau yina, Yezu kelongisila bau nde: “Muntu yina kele mbuta na kati na beno, yandi fweti sadila beno bankaka.”

Na nima yandi metuba bampasi ya kulandana ya balongi ya Bansiku ti Bafarize, na kubingaka bau mbala na mbala bantu ya luvunu. Yandi ketuba nde, bau “ke kangaka bantu nzila na kukota na Kimfumu ya Nzambi; beno mosi ke kotaka ve, kansi beno ke kangaka nzila na bantu yina ke zolaka kukota muna!” Mpi “beno ke botulaka bima ya bankento ya bamifwidi, ebuna beno ke kusaka bantu na bisambu na beno ya nda!”

Yezu ketuba nde: “Mawa na beno bamitwadisi yina ke na meso ya kufwa!” Yandi kebedisa Bafarize sambu bau kezitisaka ve mambu ya mbalu ya kimpeve, yau kemonana na luswaswanu ya mpamba ya bau kesala. Mu mbandu, bau ketuba nde: ‘Ntangu muntu ke tula lusilu, kana yandi tanga zina ya [tempelo], yo kele kima ve; kansi kana yandi tanga zina ya wolo yina kele na kati ya [tempelo], yo kele mambu mosi ya nene.’ Na kutulaka mbalu ya mingi na wolo yina kele na tempelo kuluta na ntoma ya kimpeve ya kisika yina ya lusambu, bau kesonga kufwa meso na bau na kutadila ya mbote.

Na nima, mutindu yandi kusalaka na ntwala, Yezu mebedisa Bafarize sambu bau ketula ve dikebi na “bima ya kuluta mfunu ya Nsiku, mingimingi, lunungu, ndolula mpi kwikama,” (NW) na kutulaka dikebi ya nene na kufuta dikumi, to kitini mosi na kati ya kumi, ya matiti ya kukonda mfunu.

Yezu mebinga Bafarize “[bamitwadisi] yina ke na meso ya kufwa! Beno ke yungulaka yina ya beno ke nwaka sambu na kukatula bambembele, kansi beno ke minaka mbisi yai shamo!” Bau kekangaka bambembele yina kebwaka na malafu na muyungulu sambu yau kele nyama mpamba ve, kansi sambu yau kele ya kukonda kugedila na kutadila nsiku. Kansi na kutulaka ve dikebi na mambu ya kuluta mfunu ya Nsiku, yau kemonana bonso nde bau kemina shamo, yina kele mpi ya kukonda kugedila na kutadila nsiku. Matayo 22:41–23:24; Marko 12:​35-40; Luka 20:​41-47; Levi 11:​4, 21-24.

▪ Sambu na inki Bafarize mekanga munoko ntangu Yezu meyufula bau mambu yina metala Davidi yina kele na Nkunga 110?

▪ Sambu na inki Bafarize kekumisa babwate na bau ya kele ti bamvese ya Masonuku nene, mpi sambu na inki bau kekumisa malenda ya bilele na bau nda?

▪ Inki ndongisila Yezu mepesa na balongoki na yandi?

▪ Inki luswaswanu ya kukonda mfunu Bafarize kesala, mpi inki mutindu Yezu mebedisa bau sambu na kukonda kutula dikebi na mambu ya kuluta mfunu?