Kapu 116

Yezu Kebongisa Balongoki na Yandi Sambu na Kukwenda na Yandi

MADYA ya lusungiminu memana, kansi Yezu ti bantumwa na yandi kele kaka na suku ya etaze. Ata nkutu kubika fyoti Yezu kukwenda, yandi kele kaka ti mambu mingi ya kutuba. Yandi kesyamisa bau nde: “Beno kumona mpasi ve na ntima, Beno tula ntima na Nzambi.” Kansi yandi keyika nde: “Beno tula ntima mpi na mono.”

Yezu kelanda nde: “Bisika ya kulala kele mingi na nzo ya Tata; mono ke kwenda kuyidikila beno kisika . . . sambu beno mpi kuvanda ti mono kuna ya mono ta vanda. Beno zaba nzila ya kwisa kukuma na kisika ya mono ke kwenda.” Bantumwa kebakisa ve nde Yezu ketubila kukwenda na zulu, yau yina Toma keyufula nde: “Mfumu, beto zaba ve kana nge ke kwenda wapi. Nki mutindu beto lenda zaba nzila?”

Yezu mevutula nde: “Mono kele nzila, mono kele kieleka, mono kele moyo.” Ee, muntu lenda kukota na nzo ya zulu ya Tata kaka na kundimaka yandi mpi kufululaka nkadilu na yandi ya luzingu sambu, mutindu yandi ketuba nde: “Ata muntu mosi ve lenda kwenda na Tata na nzila ya nkaka kana yandi kwisa na [nzila na mono] ve.”

Filipo meyufula nde: “Mfumu, songa beto Tata, mpidina [yau mefwana sambu na beto, NW].” Yau kemonana nde Filipo kezola Yezu kupesa kidimbu ya Nzambi ya kemonana na meso, bonso yina ya kupesamaka na ntangu ya ntama na Moize, Elia ti Yezaya. Kansi, ya kyeleka, bantumwa kele ti kima mosi ya kuluta kibeni bambona-meso ya mutindu yina, mutindu Yezu ketuba nde: “Ntama-ntama yina mono kele ti beno, Filipo, nge zaba mono ve? Muntu yina me mona mono, yandi me mona mpi Tata.”

Yezu kele kifwani ya bumuntu ya Tata na yandi na mutindu mosi ya kukuka mpenza na mpila nde kuzinga ti yandi mpi kutala yandi, kele kibeni bonso kumona Tata. Kansi, Tata kele ya kuluta Mwana, mutindu Yezu kendima nde: “Mambu yonso ya mono ke tubilaka beno, yo ke katukaka na mono ve.” Yezu kepesa lukumu yonso ya malongi na yandi na Tata na yandi ya zulu.

Nsyamisa ya inki mutindu yau fwete kuvanda sambu na bantumwa na kuwa mutindu Yezu ketubila bau ntangu yai nde: “Muntu yina ke tulaka ntima na mono, yandi ta salaka mpi bisalu yai ya mono ke salaka. Yandi ta salaka ata bisalu ya kuluta nene”! Yezu kezola kutuba ve nde balandi na yandi tasala bimangu ya ngolo ya kuluta yina ya yandi salaka na nene. Ve, kansi yandi kezola kutuba nde bau talanda kisalu ya kusamuna sambu na ntangu ya kuluta nda, na bisika ya kuluta ntama, mpi na bantu ya kuluta mingi.

Yezu tayambula ve balongoki na yandi na nima ya kukwenda na yandi. Yandi kesila nde: “Mono ta sala mambu yonso yina ya beno ta lomba na zina na mono.” Dyaka, yandi ketuba nde: “Mono ta bondila Tata sambu yandi kupesa beno [nsadisi, NW] ya nkaka . . . sambu yandi ta vandaka ti beno ntangu yonso. Yandi kele Mpeve ya kieleka.” Ebuna, na nima ya yandi tatombuka na zulu, Yezu tatyamunina balongoki na yandi mpeve santu, nsadisi yai ya nkaka.

Kukwenda ya Yezu mefinama, mutindu yandi ketuba nde: “Kubika ntangu fioti, bantu ya nsi-ntoto yai ta mona mono diaka ve.” Yezu tavanda kigangwa ya kimpeve ya muntu lenda kumona ve. Kansi Yezu kesila dyaka bantumwa na yandi ya kwikama nde: “Kansi beno, beno ta mona mono, sambu mono ke na moyo, beno mpi ta vanda na moyo.” Ee, Yezu tamonana kaka ve na bau na mutindu ya kimuntu na nima ya lufutumuku na yandi kansi na ntangu ya mbote yandi tafutumuna bau sambu na kuzinga ti yandi na zulu bonso bigangwa ya kimpeve.

Ntangu yai, Yezu kepesa nsiku ya petepete: “Muntu yina ke ndimaka bansiku na mono ti ke landaka yo, yandi muntu ke zolaka mono. Tata na mono ta zolaka muntu yina ke zolaka mono; mono ta zolaka mpi yandi, mono ta monikaka na yandi.”

Ntangu bau mewa mpila yina, ntumwa Yudasi, yina bau kebingaka mpi Tadeo, mezengisa nde: “Mfumu, nki mutindu nge fweti kwisa kumonika na beto, kansi na bantu ya nkaka yonso ve?”

Yezu mevutula nde: “Muntu yina ke zolaka mono, yandi ta landaka malongi na mono. Tata na mono ta zolaka yandi . . . Muntu yina ke zolaka mono ve, yandi ke landaka ve mambu ya mono ke tubaka.” Ya kuswaswana ti balandi na yandi ya bulemfu, nsi-ntoto kezabaka ve malongi ya Kristu. Yau yina, yandi kekudisongaka ve na bau.

Na ntangu ya kisalu na yandi na zulu ya ntoto, Yezu mekatuka kulonga bantumwa na yandi mambu mingi. Inki mutindu bau tayibuka yau yonso, mingimingi sambu, ata tii ntangu yai, bau kebakisa ve mambu mingi? Kyese mingi, Yezu kesila nde: “Muntu yina ta sadisaka beno kele Mpeve-Santu yina ya Tata Nzambi ta tinda na zina na mono; yandi ta longaka beno mambu yonso, yandi ta songaka mpi beno diaka mambu yai yonso ya mono me tubila beno.”

Na kusyamisaka bau dyaka, Yezu ketuba nde: “Mono ke bikila beno ngemba, ngemba ya mono ke pesa beno kele ya mono mosi. . . . Beno vanda ntima na zulu ve.” Ya kyeleka, Yezu kekwenda, kansi yandi ketendula nde: “Kana beno ke zolaka mono, beno zolaka kuvanda na kiese mingi na kuzaba nde mono ke kwenda na Tata, sambu Tata me luta mono na nene.”

Yezu mebikala ti ntangu fyoti ya kuvanda ti bau. Yandi ketuba nde: “Mono ke tuba diaka na beno mingi ve, sambu mfumu ya nsi-ntoto yai ke kwisa. Yandi lenda sala mono kima ve.” Satana Dyabulu, yina kukukaka na kukota na Yudasi mpi na kuyala yandi, kele mfumu ya inza. Kansi Yezu kele ve ata ti lebakanu ya fyoti ya Satana lenda kumonina sambu na kuvengumuna yandi na kisalu ya Nzambi.

Bau Mesepela na Ngwisana ya Mbote

Na nima ya madya ya lusungiminu, Yezu vandaka kusyamisa bantumwa ti disolo mosi ya vandaka kukatuka na ntima kibeni na mutindu mosi ya pwelele. Yau lenda kuvanda na nima ya minwi ya mpimpa. Ebuna Yezu kesyamisa nde: “Beno telama, beto katuka awa.” Kansi, na ntwala ya kukatuka, Yezu, ya kupusama na zola na yandi sambu na bau, melanda na kutuba, na kutaka kingana ya kele ti bupusi.

Yandi keyantika nde: “Mono kele nti ya vinu ya kieleka. Tata na mono kele muntu ke salaka bilanga ya vinu.” Nsadi ya Nene ya Bilanga, Yehowa Nzambi, kukunaka nti ya vinu yai ya kifwani ntangu yandi kupakulaka Yezu na mpeve santu na mbotika na yandi na automne ya mvu 29 T.B. Kansi Yezu melanda na kumonisa nde nti ya vinu kele kifwani ya kima ya kuluta kaka yandi, na kutubaka nde: “Yandi ke zengaka konso lutangu yina kele na mono ke butaka bambuma ve. Yandi ke bongisaka konso lutangu yina ke butaka bambuma sambu yo kuma mbote, yo buta diaka bambuma ya kuluta mingi. . . . Lutangu ya nti ya vinu yo mosi lenda buta bambuma ve, kana yo me vukanaka ve na nti yina; mutindu mosi, beno mpi lenda buta bambuma kaka kana beno ke zinga na kimvuka ti mono. Mono kele nti ya vinu, beno kele balutangu.”

Na Pantekoti, na nima ya bilumbu 51, bantumwa ti bantu ya nkaka mekuma balutangu ya nti ya vinu ntangu mpeve santu metyamuka na zulu na bau. Na nsukansuka, bantu 144000 takuma balutangu ya nti ya vinu ya kifwani. Kumosi ti nti ya vinu, Yezu Kristu, bau kesala nti ya vinu ya kifwani yina kebutaka bambuma ya Kimfumu ya Nzambi.

Yezu ketendula kinsweki ya kubutila bambuma nde: “Muntu yina ke zingaka kaka na kimvuka ti mono, mono mpi na kimvuka ti yandi, yandi ke butaka bambuma mingi, sambu kana mono kele ve, beno lenda sala kima ve.” Kansi, kana muntu kebuta ve bambuma, Yezu ketuba nde, “bo fweti losa yandi na nganda mutindu bo ke losaka lutangu ya nti, ebuna yandi ta yuma. Balutangu yina me yumaka, bo ke lokutaka yo, bo ke losaka yo na tiya, yo zika.” Na ndambu ya nkaka, Yezu kesila nde: “Kana beno kezingaka na kimvuka ti mono, kana mpi malongi na mono ke zingaka na beno, beno lomba konso kima ya beno zola, beno ta baka yo.”

Dyaka, Yezu metubila bantumwa na yandi nde: “Lukumu ya Tata ke monikaka mutindu yai: Kana beno buta bambuma mingi, mpidina ke songa nde beno kele balonguki na mono.” Bambuma ya Nzambi kezolaka yina kekatukaka na balutangu kele nsonga na bau ya bankadulu ya kufwanana na yina ya Kristu, mingimingi zola. Kuluta dyaka, sambu Kristu kuvandaka nsamuni ya Kimfumu ya Nzambi, bambuma yango ya kuzolama fwete kulomba mpi kisalu na bau ya kukumisa bantu balongoki mutindu yandi kusalaka.

Ntangu yai, Yezu kesyamisa nde: “Beno zinga na kuzola na mono.” Kansi, inki mutindu bantumwa na yandi lenda kusala mutindu yina? Yandi ketuba nde: “Kana beno landa bansiku na mono, beno ta zinga na kuzola na mono.” Na kulandaka, Yezu ketendula nde: “Nsiku na mono yo yai: Beno zolana beno na beno, mutindu mono ke zolaka beno. Kuzola ya kuluta nene ya muntu lenda vanda na yo na ntima yo yai: kana yandi pesa moyo na yandi sambu na banduku na yandi.”

Na nima ya bangunga fyoti, Yezu tasonga zola yango yina ya muntu lenda kutesa ve na kupesaka luzingu na yandi sambu na bantumwa na yandi, ye sambu na bantu ya nkaka yonso yina takwikila na yandi. Mbandu na yandi fwete kupusa balandi na yandi na kuvanda na zola ya kuditambika ya kiteso mosi sambu na mosi ti ya nkaka. Bau tazabana na zola yai, mutindu Yezu kutubaka na ntwala nde: “Kana beno ke zolana beno na beno, bantu yonso ta zaba nde beno kele balonguki na mono.”

Na kusongaka banani kele banduku na yandi, Yezu ketuba nde: “Beno kele banduku na mono kana beno sala mambu yai ya mono ke songa beno na kusala. Mono ta binga beno diaka bampika ve, sambu mpika ke zabaka ve mambu ya mfumu na yandi ke salaka. Kansi mono ke binga beno banduku, sambu mono me zabisaka beno mambu yonso ya mono waka na Tata na mono.”

Ngwisana ya mbote ya inki mutindu​—⁠ya kuvanda banduku ya ngolo ya Yezu! Kansi sambu na kulanda na kusepela na ngwisana yai, balandi na yandi fwete “[landa] na kubuta bambuma.” Kana bau kesala yau, Yezu ketuba nde: “Mpidina Tata ta pesa beno konso kima ya beno [ta] lomba yandi na zina na mono.” Ya kyeleka, yai kele nsendo ya nene na kubuta bambuma ya Kimfumu! Na nima ya kusyamisa dyaka bantumwa na “kuzolana bo na bo,” Yezu ketendula nde inza tamenga bau. Kansi, yandi kesyamisa bau nde: “Kana bantu ya inza ke menga beno, beno fweti zaba nde bo mengaka mono ntete.” Na nima, Yezu kesonga kikuma ya inza tamengaka balandi na yandi, na kutubaka nde: “Kansi mono me solaka beno, mono me katulaka beno na nsi-ntoto, beno mpi kele bantu ya nsi-ntoto ve, yo yina bantu ke mengaka beno.”

Na kutendulaka dyaka kikuma ya luyinu ya inza, Yezu kelanda nde: “Bo ta sala beno mambu yina yonso sambu na mono, sambu bo zaba ve muntu [Yehowa Nzambi] yina tindaka mono.” Ya kyeleka, bisalu ya Yezu ya mutindu ya kimangu, kebedisa bayina kemengaka yandi, mutindu yandi ketuba nde: “Kana mono salaka ve na meso na bo bisalu yina ya muntu ya nkaka me salaka ntete ve, bo zolaka kuvanda na masumu ve. Kansi ntangu yai, bo me mona bisalu na mono, ebuna bo ke menga beto ti Tata.” Yau yina, mutindu Yezu ketuba, Masonuku melungana: “Bo mengaka mono na mpamba.”

Mutindu yandi kusalaka na ntwala, Yezu mesyamisa bau dyaka na kusilaka na kutindila bau nsadisi, mpeve santu, yina kele ngolo ya kisalu ya Nzambi. “Yandi ta zabisa beno nsangu na mono. Ebuna beno mpi, beno ta zabisa nsangu na mono.”

Ntuma ya Nkaka ya Kukwendila

Yezu ti bantumwa na yandi mefinama na kubasika na suku ya etaze. Yandi kelanda nde: “Mono me tubila beno mambu yina, sambu beno [kutesa sakuba ve, NW].” Na nima yandi mepesa lukebisu yai ya nene: “Bantu ta kulaka beno na [basinagoga, NW]. Mpi na bilumbu ke kwisa, bantu yina ta fwa beno, bo ta yindula nde kana bo fwa beno, bo ke sadila Nzambi.”

Ya kyeleka, bantumwa meyangisama ngolo kibeni sambu na lukebisu yai. Ata nkutu Yezu kuyitaka kutubila bau nde inza tamenga bau, yandi kusongaka ve mbala mosi nde bau tafwa bau. Yezu ketendula nde: “Na luyantiku mono tubilaka beno mambu yina ve, sambu mono vandaka ti beno.” Kansi, yau kele mbote mpenza na mutindu yandi meyita kupesa bau binwaninu na kupesaka bau nsangu yai na ntwala yandi kukwenda!

Yezu kelanda nde: “Kansi ntangu yai, mono me kwenda na Tata yina tindaka mono, kansi ata muntu mosi ve na kati na beno ke yula mono nde: ‘Nge ke kwenda wapi?’ ” Na luyantiku ya nkokila, bau kuyulaka Yezu na yina metala kisika ya yandi takwenda, kansi ntangu yai bau mewa kibeni mpasi na ntima sambu na mpila ya yandi mesonga bau na mpila nde bau meyufula yau dyaka ve. Mutindu Yezu ketuba nde: “Mawa me simba beno mingi na ntima, sambu mono me tubila beno mambu yina.” Bantumwa kele na mawa kaka ve sambu bau mezaba nde bau fwete kunyokwama mpi nde bau tafwa bau, kansi mpi sambu Mfumu na bau kebikisa bau.

Yau yina, Yezu ketendula nde: “[Mono kekwenda sambu na mambote na beno, NW], sambu kana mono kwenda ve, muntu yina ta sadisaka beno ta kwisila beno ve; kansi kana mono kwenda, mono ta tindilaka yandi.” Bonso muntu, Yezu lenda kaka kuvanda kisika mosi na ntangu mosi, kansi na ntangu yandi kele na zulu yandi lenda kutinda nsadisi, mpeve santu ya Nzambi, na balandi na yandi konso kisika yina ya bau lenda kuvanda na zulu ya ntoto. Yau yina, kukwenda ya Yezu tanata mambote.

Yezu ketuba nde mpeve santu “ta songa bantu yonso mpenza kana masumu kele nki, kana [lunungu ti mfundusu, NW] kele nki.” Disumu ya inza, kukonda kumonisa lukwikilu na yau na Mwana ya Nzambi, tatungululama. Dyaka, nzikisa ya lunungu ya Yezu tamonisama na kumata na yandi na Tata. Mpi kubela ya Satana ti inza na yandi ya mbi na yina metala kubebisa kwikama ya Yezu kele nzikisa ya kendimisa nde mfumu ya inza mebedisamaka.

Yezu kelanda nde: “Mono ke na mambu mingi diaka ya kutubila beno, kansi beno lenda [kunata, NW] yo ve ntangu yai.” Yau yina, Yezu kesila nde ntangu yandi tatyamuna mpeve santu, yina kele ngolo ya kisalu ya Nzambi, yau tatwadisa bau na mbakisa ya mambu yai na kuwakana ti kingangu na bau ya kusimba yau.

Mingimingi, bantumwa kebakisa ve nde Yezu tafwa mpi na nima yandi tamonana na bau na nima ya kufutumuka. Yau yina bau keyulana bau na bau nde: “Mambu yina, disongidila nki? Yandi ke tubila beto nde: ‘Kubika ntangu fioti, beno ta mona mono diaka ve, ebuna na nima ya ntangu fioti, beno ta mona mono diaka.’ Yandi me tuba mpi nde: ‘Mono me kwenda na Tata.’ ”

Yezu mebakisa nde bau kezola kuyufula yandi, yau yina yandi ketendula nde: “Mono ke tubila beno mambu ya kieleka: Beno ta dila, beno ta mona mawa, kansi bantu ya nsi-ntoto yai ta mon[a] kiese; beno ta vanda na mawa, kansi mawa na beno ta kituka kiese.” Na nima na kilumbu yango yina, na nima ya midi, ntangu Yezu tagondama, bamfumu ya mabundu ya nsi-ntoto tawa kyese, kansi balongoki tavanda na mawa. Kansi, mawa na bau takituka kyese ntangu Yezu tafutumuka! Mpi kyese na bau talanda ntangu yandi tapesa bau ngolo na Pantekoti sambu bau kuvanda bambangi na yandi, na kutyamuninaka bau mpeve santu ya Nzambi!

Na kufwanisaka mvwandilu ya bantumwa na yina ya nkento na ntangu ya misongu na yandi, Yezu ketuba nde: “Ntangu nkento ke zolaka kubuta mwana, yandi ke vandaka na mawa, sambu ntangu ya kumona mpasi me kwisila yandi.” Kansi Yezu ketuba nde yandi keyibukaka dyaka ve mpasi na yandi kana mwana na yandi mebutuka, mpi yandi kesyamisa bantumwa na yandi, na kutubaka nde: “Kiteso mosi, beno mpi, beno ke na mawa ntangu yai; kansi mono ta mona beno diaka [ntangu mono tafutumuka], ebuna ntima na beno ta vanda kiese; ata muntu mosi ve ta kuka kukatula kiese na beno.”

Tii ntangu yai, bantumwa melombaka ntete ve na zina ya Yezu. Kansi yandi ketuba ntangu yai nde: “Tata ta pesa beno mambu yonso yina ya beno ta lomba yandi na zina na mono. . . . Sambu Tata yandi mosi ke zolaka beno. Yandi ke zolaka beno sambu beno me zolaka mono, yandi ke zolaka beno mpi sambu beno ke kwikilaka nde mono katukaka na Nzambi. Mono katukaka na Tata, mono kwisaka kukuma awa na nsi-ntoto. Ntangu yai, mono ke bika nsi-ntoto yai, mono ke kwenda na Tata.”

Bangogo ya Yezu kele nsyamisa ya nene sambu na bantumwa. Bau ketuba nde: “Yo yina beto me kwikila nde nge katukaka na Nzambi.” Yezu meyufula nde: “Beno me kwikila ntangu yai? Ntangu ke kwisa, ya kieleka, yo me lunga dezia, ya beno ta panzana mosi-mosi, konso muntu na nzo na yandi, ebuna beno ta bikisa mono mono mosi.” Yau kemonana mpenza nde yau lendaka kusalama ve, yau mesalama na ntwala ya mpimpa yango kumana!

“Mono metubila beno mambu yina yonso sambu beno kuvanda na ngemba [na nsadisa na mono, NW].” Yezu kesukisa nde: “Beno ta mona mpasi mingi awa na nsi-ntoto. Kansi beno vanda na kikesa! Mono me bedisaka mbi ya nsi-ntoto yai.” Yezu kunungaka nsi-ntoto na kulungisaka luzolo ya Nzambi na kwikama yonso ata nkutu mambu yonso ya Satana ti nsi-ntoto na yandi kumekaka na kubebisa kwikama ya Yezu.

Kisambu ya Nsuka na Suku ya Etaze

Ya kupusama na zola ya mudindu sambu na bantumwa na yandi, Yezu vandaka kubongisa bau sambu na kukwenda na yandi ya mefinama. Ntangu yai, na nima ya kulongisila mpi ya kusyamisa bau na bunda, yandi metedimisa meso na yandi na zulu mpi medodokila Tata na yandi nde: “Pesa lukumu na Mwana na nge, sambu Mwana mpi kupesa nge lukumu. Sambu nge me pesaka yandi kiyeka na kuyala bantu yonso, sambu yandi pesa moyo ya mvula na mvula na bantu yonso yina ya nge pesaka yandi.”

Disolo ya kepesa kyese ya inki mutindu Yezu meyantika​—⁠luzingu ya mvula na mvula! Mutindu yandi mebakaka “kiyeka na kuyala bantu yonso,” Yezu lenda kupesa mambote ya kimenga ya nkudulu na yandi na bantu yina yonso ya kefwaka. Kansi, yandi kepesa kipiku ya “luzingu ya mvula na mvula” kaka na bayina ya Tata kendimaka. Na kutubilaka disolo yai ya luzingu ya mvula na mvula, Yezu kelanda kisambu na yandi nde:

“Yai ketendula luzingu ya mvula na mvula, bau kulonguka na kuzaba nge, Nzambi mosi kaka ya kyeleka, ti yina ya nge tindaka, Yezu Kristu.” (NW) Ee, luguluku mesimbama na kulonguka nzayilu ya Nzambi ti ya Mwana na yandi. Kansi mambu mingi melombama kuluta nzayilu ya ntu.

Muntu fwete kubakisa bau mbotembote, na kuyedisaka kinduku ya ngolo ti bau. Muntu fwete kudiwa mutindu bau kekudiwaka na yina metala mambu mpi kumona mambu mutindu bau kemonaka yau. Mpi Kuluta dyaka, muntu fwete kusala ngolo sambu na kufulula bankadulu na bau ya kukonda kutesa na mutindu ya yandi ketadila bantu ya nkaka.

Na nima Yezu kesamba nde: “Mono me songaka lukumu na nge awa na nsi-ntoto; mono me manisa kisalu ya nge me pesaka mono na kusala.” Na kulungisaka kisalu na yandi tii ntangu yai mpi na kundimisamaka na ndungunu na yandi ya makwisa, yandi medodokila nde: “Tata, ntangu yai pesa mono lukumu bonso yina ya mono vandaka na yo ntete ntangu mono vandaka ti nge, pana [nsi-]ntoto vandaka me salama ntete ve.” Ee, ntangu yai, yandi kelomba nde yandi kuvutulama na nkembo na yandi ya ntete na zulu na nzila ya lufutumuku.

Na kutubilaka na bunkufi kisalu na yandi ya ntetentete na zulu ya ntoto, Yezu ketuba nde: “Bantu ya nge bakaka na nsi-ntoto sambu na kupesa mono, mono me songaka bo [zina na nge, NW]. Bo vandaka ntete bantu na nge, ebuna nge pesaka mono bo. Bo vandaka kulemfukila mambu na nge.” Yezu kusadilaka zina ya Nzambi, Yehowa, na kisalu na yandi mpi yandi kumonisaka mutindu ya kukonda kifu ya kusopila yau, kansi yandi salaka mambu ya kuluta mingi katula kuzabisa zina ya Nzambi na bantumwa na yandi. Yandi kugedisaka mpi nzayilu ti ntonda na bau ya Yehowa, ya bumuntu ti balukanu na yandi.

Na kundimaka nde Yehowa kele Muntu ya kuluta yandi, Muntu yina ya yandi kesadilaka, Yezu kendima na kudikulumusa yonso nde: “Mono tubilaka bo mambu ya nge pesaka mono, ebuna bo me simbaka yo. Bo me bakisaka nde ya kieleka, mono katukaka na nge, bo me kwikilaka mpi nde nge muntu tindaka mono.”

Na kusalaka luswaswanu na kati ya balandi na yandi ti bantu ya nkaka yina mebikala, Yezu kesamba dyaka nde: “Mono ke samba nge sambu na bo. Mono ke samba sambu na bantu ya nsi-ntoto yai ve, kansi sambu na bantu yina ya nge me pesaka mono, . . . Ntangu mono vandaka ti bo, mono vandaka kukeba bo . . . Mono talaka bo mbote; na bo yonso, ata muntu mosi ve vilaka, katula kaka [mwana ya mbungulu, NW],” disongidila Yudasi Iskariote. Kaka na ntangu yai, Yudasi kele na kulungisa kisalu na yandi ya mbi ya kuteka Yezu. Na yau, Yudasi kelungisa Masonuku nkatu kudizaba.

Yezu kelanda na kusamba nde: “Bantu ya nsi-ntoto [me] mengaka bo, . . . Mono ke bondila nge ve na kukatula bo na nsi-ntoto yai, kansi na kukeba bo sambu Muntu ya Mbi kwisa kukota na bo ve. Bo kele bantu ya nsi-ntoto yai ve, mutindu mono mpi kele muntu ya nsi-ntoto yai ve.” Balandi ya Yezu kele na nsi-ntoto, kimvuka ya bantu yai ya kubongisama ya ketwadisamaka na Satana, kansi bau kele mpi bau fwete kusikila ntangu yonso ya kukabwana ti yau mpi ti mambi na yau.

Yezu kelanda nde: “Santisa bau na nzila ya kyeleka, Ndinga na nge kele kyeleka.” (NW) Awa Yezu kebinga Masonuku ya kupemama ya Kiebreo, yina ya yandi vandaka kutubila mbala mingi, “kyeleka.” Kansi mambu ya yandi kulongaka na balongoki na yandi mpi yina ya bau kusonikaka na nima na nsadisa ya mpeve santu bonso Masonuku ya Kigreki ya Bukristu kele mpi “kyeleka.” Kyeleka yai lenda kusantisa muntu, kusoba luzingu na yandi ya mvimba, mpi kukumisa muntu ya kugambana ti inza.

Ntangu yai Yezu kesamba “kaka ve sambu na balonguki na [yandi] mpamba, kansi [yandi] ke samba mpi sambu na bantu yina ta tula ntima na [yandi] sambu na malongi na bo.” Ebuna Yezu kesamba sambu na bayina tavanda balandi na yandi ya kupakulama ti balongoki ya nkaka ya makwisa yina tavukisama na nima na “kibuka mosi.” Inki kima yandi kelomba sambu na bayai yonso?

“Sambu bo yonso kuvanda muntu mosi. Tata, bo vanda na kimvuka ti beto, mutindu nge kele na mono, mono mpi kele na nge. . . . Sambu bo vanda muntu mosi, mutindu mono ti nge beto kele muntu mosi.” Yezu ti Tata na yandi kele ve muntu mosi na mutindu mosi ya kyeleka, kansi bau kele na kuwakana na mambu yonso. Yezu kesamba sambu nde balongoki na yandi kuvanda na bumosi ya mutindu mosi, sambu “nsi-ntoto yai ta bakisa nde nge muntu tindaka mono, nge mpi ke zolaka bo mutindu nge ke zolaka mono.”

Sambu na mambote ya bayina tavanda balandi na yandi ya kupakulama, Yezu kelomba ntangu yai na Tata na yandi ya zulu. Inki yandi kelomba? “Nde bo vanda ti mono na kisika yina ya mono ta vanda, sambu bo mon[a] lukumu na mono. Nge me pesaka mono lukumu yango, sambu nge vandaka kuzola mono ntangu [inza] vandaka me salama ntete ve,” disongidila, na ntwala Adami ti Eva kubuta bana. Nzambi yitaka kuzola Mwana na yandi mosi kaka, yina kukumaka Yezu Kristu.

Na kumanisaka kisambu na yandi, Yezu metubila dyaka mingi nde: “[Mono longaka bau zina na nge mpi mono talonga yau, NW], sambu kuzola yina ya nge ke zolaka mono, yo vanda mpi na bo, ebuna mono mosi mpi mono vanda na bo.” Sambu na bantumwa, kuzaba zina ya Nzambi vandaka kulomba kuzaba kibeni zola ya Nzambi na ntima mosi. Yoane 14:1–17:26; 13:​27, 35, 36; 10:16; Luka 22:​3, 4; Kubasika 24:10; 1 Bantotila 19:​9-13; Yezaya 6:​1-5; Galatia 6:16; Nkunga 35:19; 69:4; Bingana 8:​22, 30.

▪ Yezu kekwenda na wapi, mpi inki mvutu Toma mebaka na yina metala nzila ya kukuma kuna?

▪ Na ndomba na yandi, yau kemonana nde Filipo kezola nde Yezu kupesa inki?

▪ Sambu na inki muntu yina memona Yezu memona mpi Tata?

▪ Inki mutindu balandi ya Yezu tasala bisalu ya kuluta yina ya yandi salaka na nene?

▪ Na inki sansa Satana kele ve ti kima ya kusala Yezu?

▪ Inki ntangu Yehowa kukunaka nti ya vinu ya kifwani, inki ntangu mpi inki mutindu bantu ya nkaka mekuma ndambu ya nti ya vinu?

▪ Na nsukansuka, balutangu ikwa nti ya vinu ya kifwani kele na yau?

▪ Inki mbuma Nzambi kezola nde balutangu kubuta?

▪ Inki mutindu beto lenda kuvanda banduku ya Yezu?

▪ Sambu na inki inza keyinaka balandi ya Yezu?

▪ Inki lukebisu ya Yezu mepesa metungisa bantumwa na yandi?

▪ Sambu na inki bantumwa mekuka ve na kuyufula Yezu mambu yina metala kisika ya yandi kekwenda?

▪ Mingimingi, inki bantumwa mebakisa ve?

▪ Inki mutindu Yezu mepesa mbandu ya mutindu mvwandilu ya bantumwa tasoba katuka na mawa tii na kyese?

▪ Inki kima Yezu metuba nde kubika fyoti bantumwa tasala yau?

▪ Inki mutindu Yezu menunga nsi-ntoto?

▪ Na inki sansa Yezu mebaka “kiyeka na kuyala bantu yonso”?

▪ Kulonguka sambu na kuzaba Nzambi ti Mwana na yandi ketendula inki?

▪ Na inki mutindu Yezu mezabisa zina ya Nzambi?

▪ “Kyeleka,” kele inki, mpi inki mutindu yau “kesantisaka” Mukristu?

▪ Inki mutindu Nzambi, Mwana na yandi ti bansambidi yonso kele muntu mosi?

▪ Inki ntangu “nsi-ntoto kusalamaka?”