Kapu 118

Kutekama mpi Kukangama

MIDI ya mpimpa meluta ntangu Yudasi ketwadisa kibuka ya basoda, bambuta ya banganga-Nzambi, Bafarize, ti bantu ya nkaka na kati ya masamba ya Getsemane. Banganga-Nzambi mewakana sambu na kufuta Yudasi bibende 30 ya palata sambu na kuteka Yezu.

Na ntwala, ntangu Yudasi kukulamaka na madya ya Paki, yau kemonana nde yandi kwendaka na bambuta ya banganga-Nzambi. Bau kuvukisaka mbala mosi bapolisi na bau ti basoda. Mbala ya nkaka, Yudasi kunataka bau ntete kisika ya yandi ti bantumwa na yandi kutaka nkinsi Paki. Na ntangu ya yandi mesengumuna nde bau mekatuka, kibuka yango ti binwaninu na maboko, mpi na kunataka bamwinda ti batorshe melanda Yudasi na nganda ya Yeruzalemi mpi bau mesabuka Muwanda ya Sedroni.

Ntangu Yudasi kenata bantu na ndambu ya Ngumba ya Baolive, yandi kendima nde yandi kezaba kisika ya yandi fwete kuzwa Yezu. Na mposo yina kulutaka, ntangu Yezu ti bantumwa vandaka kukwenda na Yeruzalemi mpi kuvutuka na Betania, bau vandaka kutelama mbala mingi na masamba ya Getsemane sambu na kupema mpi na kusolula. Kansi, ntangu yai, ngatu Yezu kemonana ve sambu na mudidi ya nsi ya banti ya baolive, inki mutindu basoda tazaba yandi? Mbala ya nkaka bau memonaka yandi ntete ve. Yau yina, Yudasi mepesa kidimbu, na kutubaka nde: “Muntu yina ya mono ta pesa beze, yandi yina ya beno ta kanga. Beno simba yandi, beno nata yandi, ebuna beno kengila yandi mbote-mbote ntangu beno ke nata yandi.”

Yudasi kenata kibuka ya nene na kati ya masamba, yandi memona Yezu ti bantumwa na yandi, mpi yandi mekwenda mbala mosi na yandi. Yandi metuba nde: “Mbote, Longi!” mpi yandi meyamba yandi na bumbote yonso.

Yezu mevutula nde: “Nkundi, sambu na inki nge kele awa?” (NW) Na nima na kupesaka mvutu na ngyufula na yandi mosi, yandi metuba nde: “Yudasi, keti nge ke zola kupesa Mwana-muntu beze sambu na kuteka yandi?” Kansi muyekudi memanisa kisalu na yandi! Yezu mepusana na nsemo ya batorshe ya kepela ti minda mpi meyufula nde: “Beno ke sosa nani?”

Mvutu mebasika nde: “Yezu, muntu ya Nazareti.”

Yezu mevutula nde: “Mono yandi yai” mpi yandi metelama na kikesa yonso na ntwala na bau yonso. Bau meyituka sambu na kikesa na yandi mpi nkatu kuzaba inki tabwa, bantu yango mevutuka na nima mpi mebwa na ntoto.

Yezu melanda na malembe yonso nde: “Mono me tubila beno ntete nde mono yandi yai. Ebuna kana beno ke sosa mono, beno bikisa bantu yai ya nkaka, bo kwenda.” Mwa ntangu fyoti na ntwala na suku ya etaze, Yezu kutubilaka Tata na yandi na kisambu nde yandi kulundaka bantumwa na yandi ya kwikama mpi ata mosi ve na kati na bau kuvilaka, “katula mwana ya mbungulu.” Yau yina, sambu ndinga na yandi kulungana, yandi kelomba nde bau yambula balandi na yandi bau kwenda.

Ntangu basoda mebaka kikesa, bau metelama mpi meyantika na kukangisa Yezu, bantumwa mebakisa kima ya kezola kusalama. Bau meyufula nde: “Mfumu, keti beto fweti bula bo bambele?” Na ntwala Yezu kupesa mvutu, Piere yina kele ti mosi na kati ya bambele yina zole ya bantumwa kunataka, mebula Malkusi, mpika ya mfumu ya banganga-Nzambi. Mbele ya Piere mezangisa na kuzenga ntu ya mpika yango kansi yau mezenga yandi dikutu ya diboko ya kibakala.

Na ntangu ya Yezu kekota na makambu yango, yandi metuba nde: “Bika! Kusala mpidina ve.” Yandi mesimba dikutu ya Malkusi, yandi mebelula mputa yango. Na nima, yandi melonga dilongi ya mfunu, na kutumaka Piere nde: “Vutula mbele na nge na kisika na yo, sambu bantu yina yonso ke sadilaka mbele bo ta fwa mpi na mbele. Nge zaba ve nde kana mono zola, mono lenda lomba lusadisu na tata na mono, ebuna yandi tindila mono nswalu ndonga [kuluta, NW] kumi na zole ya bawanzio?”

Yezu kendima nde bau kukanga yandi, sambu yandi ketendula nde: “Nki mutindu mambu yina ya bo sonikaka na Mukanda ya Nzambi lenda kwisa kulunga?” Mpi yandi keyika nde: “Dikopa . . . ya Tata me pesa[ka] mono, mono ta nwa yo ve?” Yandi kendima kibeni luzolo ya Nzambi sambu na yandi!

Na nima, Yezu metubila kibuka. Yandi meyufula nde: “Beno me kwisa na bambele ti banti sambu na kukanga mono bonso nde mono kele muyibi? Konso kilumbu mono vandaka me vanda na [tempelo, NW] sambu na kulonga, kansi beno kangaka mono ve. Kansi mambu yai ke bwa sambu na kulungisa mambu yina ya [baprofete] sonikaka na Mukanda ya Nzambi.”

Ntangu bau mewa mpila yina, mfumu ya basoda ti bansadi ya Bayuda mekanga Yezu mpi mekangisa yandi. Ntangu bau memona mpidina, bantumwa meyambula Yezu mpi bau metina. Kansi, mwana bakala mosi​—⁠mbala ya nkaka kele longoki Marko​—⁠mebikala na kati ya kibuka. Ngatu yandi kuvandaka na nzo kisika Yezu kutaka Paki mpi na nima yandi kulandaka kibuka katuka pana. Kansi, ntangu yai, bau mezaba yandi, mpi bau mesosa na kukanga yandi. Kansi yandi meyambula lele na yandi ya lino mpi yandi metina. Matayo 26:​47-56; Marko 14:​43-52; Luka 22:​47-53; Yoane 17:12; 18:​3-12.

▪ Sambu na inki Yudasi mendimisama nde yandi takuta Yezu na masamba ya Getsemane?

▪ Inki mutindu Yezu memonisa nde yandi kekudibanza sambu na bantumwa na yandi?

▪ Inki kima Piere mesala sambu na kukotila Yezu, kansi inki Yezu metubila Piere sambu na yau?

▪ Inki mutindu Yezu mesonga nde yandi kendima kibeni luzolo ya Nzambi sambu na yandi?

▪ Ntangu bantumwa meyambula Yezu, nani mebikala, mpi inki mebwila yandi?